AKP ភ្នំពេញ ថ្ងៃទី១៥ ខែមីនា ឆ្នាំ២០២៦--

ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន និងជាមន្រ្ដីបង្គោលរេដបូកជាតិ បានចូលរួមជាអធិបតីក្នុងពិធីចុះហត្ថលេខាលើកិច្ចព្រមព្រៀងផ្ដល់ថវិការេដបូកសម្រាប់សហគមន៍តំបន់ការពារធម្មជាតិវគ្គទី៥។

គួរបញ្ជាក់ថាក្នុងពិធីនេះផងដែរគេឃើញមានការចូលរួមពីលោក ងិន សុវិមាន អភិបាលរងនៃគណៈអភិបាលខេត្តមណ្ឌលគិរី ឯកឧត្តម កែន សេរីរដ្ឋា អគ្គនាយកសហគមន៍មូលដ្ឋាន និងជាប្រធានលេខាធិការដ្ឋានកិច្ចការឥណទានកាបូន ថ្នាក់ដឹកនាំ មន្រ្ដី នៃក្រសួងបរិស្ថាន រដ្ឋបាលខេត្តមណ្ឌលគិរី មន្ទីរបរិស្ថានខេត្ត អង្គការWCS ជនជាតិដើមភាគតិច និងសហគមន៍តំបន់ការពារធម្មជាតិក្នុងដែនជម្រកសត្វព្រៃកែវសីមា សរុបប្រមាណ១៥០នាក់។

ឯកឧត្តម ជួប ប៉ារីស៍ បានគូសបញ្ជាក់ឱ្យដឹងថា តាមរយៈការចូលរួមយ៉ាងសកម្មរបស់សហគមន៍ និងការគាំទ្រពីអាជ្ញាធរមូលដ្ឋាន សហគមន៍នឹងក្លាយជាដៃគូដ៏សំខាន់របស់រាជរដ្ឋាភិបាល ក្នុងការអភិរក្សព្រៃឈើ និងធានាការប្រើប្រាស់ធនធានធម្មជាតិប្រកបដោយនិរន្តរភាព សម្រាប់ជាប្រយោជន៍ដល់សហគមន៍ និងប្រទេសជាតិរយៈពេលវែង។

ឯកឧត្តមរដ្ឋលេខាធិការបានថ្លែងបន្ថែមថា ក្នុងបរិបទនេះ គម្រោងរេដបូកកែវសីមា គឺជាគំរូដ៏សំខាន់មួយ ដែលបានបង្ហាញថា ការអភិរក្សធនធានធម្មជាតិ អាចដំណើរការជាមួយនឹងការអភិវឌ្ឍសេដ្ឋកិច្ច និងសង្គមរបស់សហគមន៍បាន។គម្រោងនេះ បានរួមចំណែកយ៉ាងសំខាន់ក្នុង (១)ការកាត់បន្ថយការបាត់បង់ និងការរេចរឹលព្រៃឈ(២)ការអភិរក្សជីវៈចម្រុះ (៣)ការចូលរួមដោះស្រាយបញ្ហាប្រែប្រួលអាកាសធាតុ (៤)និងការលើកកម្ពស់ជីវភាពរស់នៅរបស់ជនជាតិដើមភាគតិច និងសហគមន៍មូលដ្ឋាន ដោយផ្ដោតលើ មនុស្ស ផ្លូវ ទឹក ភ្លើង។

គួររំលឹកឱ្យដឹងផងដែរថា គម្រោងរេដបូកកែវសីមាមិនត្រឹមតែផ្តល់អត្ថ-ប្រយោជន៍ដូចជាការពង្រឹងសិទ្ធជនជាតិដើមភាគតិចក្នុងការការពារសុវត្ថិភាពដីធ្លី និងធនធានធម្មជាតិតែប៉ុណ្ណោះទេ គម្រោងជួយលើកកម្ពស់ និងអភិវឌ្ឍជីវភាពរស់នៅរបស់ជនជាតិដើមភាគតិច និងសហគមន៍មូលដ្ឋាន ដោយផ្តល់មូលនិធិសម្រាប់ការអភិវឌ្ឍសហគមន៍តាមរយៈកម្មវិធីថវិកាសម្រាប់សហគមន៍ (Cash for Community - C4C)។

មកដល់បច្ចុប្បន្ននេះ ភូមិគោលដៅទាំង២០របស់គម្រោងរេដបូកកែវសីមា បានទទួលមូលនិធិរេដបូកតាមរយៈកម្មវិធីថវិកាសម្រាប់សហគមន៍(C4C)ចំនួន៤លើករួចមកហើយដែលមានមូលនិធិសរុបចំនួន១.៨៣៥.៣២០ដុល្លាអាមេរិក។ សហគមន៍ជាអ្នកគ្រប់គ្រងមូលនិធិទាំងនេះដោយផ្ទាល់ បន្ទាប់ពីគម្រោងបានផ្ទេរមូលនិធិចូលទៅក្នុងគណនីធនាគារបស់ភូមិគោលដៅនីមួយៗ។ ថវិកានេះត្រូវបានប្រើប្រាស់សម្រាប់សកម្មភាពអភិវឌ្ឍន៍សហគមន៍ដែលឆ្លងកាត់កិច្ចពិភាក្សាពិគ្រោះយោបល់កំណត់សកម្មភាពអាទិភាព និងបានដាក់បញ្ចូលទៅក្នុងផែនការវិនិយោគឃុំ និងផែនការវិនិយោគស្រុក៕

ដោយ៖ មករា