AKP កំពង់ធំ ថ្ងៃទី១៥ ខែមីនា ឆ្នាំ២០២៦--

លោក សាយ គឹមឡម អភិបាលស្រុកស្ទោងបានថ្លែងអំណរព្រះគុណ និងអរគុណយ៉ាងជ្រាលជ្រៅបំផុតដល់ព្រះគ្រូចៅអធិការ អាចារ្យគណៈកម្មការវត្តករណីដើមដែលបានបរិច្ចាគបច្ច័យសម្រាប់ទិញដីបើកផ្លូវទ័ល ជូនពលរដ្ឋក្នុងមូលដ្ឋានបានធ្វើដំណើរនៅក្នុងឱកាសដែលលោក និងសហការី ព្រមទាំងព្រះគ្រូចៅអធិការ អាចារ្យគណៈកម្មការបានទៅពិនិត្យស្ថានភាពជាក់ស្ដែង និងប្រគល់ថវិកាជូនម្ចាស់ដីក្នុងការទិញដីបើកផ្លូវទ័លភ្ជាប់ពីភូមិចេកទៅភូមិចកស្ថិតនៅក្នុងឃុំកំពង់ចិនជើង ស្រុកស្ទោង ខេត្តកំពង់ធំ កាលពីរសៀលថ្ងៃទី១៤ ខែមីនា ឆ្នាំ២០២៦។

លោកអភិបាលស្រុកបានឱ្យដឹងថា ផ្លូវនេះពិតជាផ្លូវដ៏មមាញឹកមានសារៈសំខាន់ណាស់សម្រាប់ពលរដ្ឋនៅក្នុងមូលដ្ឋាន ជាពិសេសបានសម្រួលការធ្វើដំណើររបស់ពលរដ្ឋក្នុងការដឹកកសិផលនិងទំនិញនានាទៅកាន់ទីផ្សារ ទីរួមស្រុកស្ទោងក៏ដូចជាសិស្សានុសិស្សទៅសាលារៀនបានឆាប់រហ័សលឿនជាងមុនប្រកបដោយសុវត្ថិភាព។

ទន្ទឹមនឹងនេះ ប្រជាពលរដ្ឋនៅក្នុងភូមិចេក និងភូមិចកបានគោរពថ្លែងអំណរគុណ និងអរព្រះគុណយ៉ាងជ្រាលជ្រៅបំផុតដល់លោក សាយ គឹមឡម អភិបាលស្រុកស្ទោង និងព្រះគ្រូចៅអធិការ ព្រមទាំងលោកអាចារ្យគណៈកម្មការវត្តករណីដើមដែលបានដឹកនាំសហការីព្រមទាំងបរិច្ចាគនូវបច្ច័យដ៏ច្រើនដើម្បីទិញដីបើកផ្លូវដែលទ័លរាប់សិបឆ្នាំមកហើយបានជាផ្លូវភ្ជាប់រវាងភូមិទាំងពីរសម្រាប់ធ្វើដំណើរបានងាយស្រួល និងឆាប់រហ័សជាងមុន។

សូមបញ្ជាក់ថា ការទិញដីបើកផ្លូវភ្ជាប់នៅក្នុងពេលនេះមានទំហំ១០ម៉ែត្រគុណ៥០ម៉ែត្រដែលតភ្ជាប់ពីភូមិចេកទៅភូមិចក ដោយត្រូវចំណាយបច្ច័យអស់ប្រមាណ៤៥០០ដុល្លារសហរដ្ឋអាមេរិក៕

ដោយ ស៊ុម វណ្ណា