AKP កំពង់ធំ ថ្ងៃទី១៥ ខែមីនា ឆ្នាំ២០២៦--

ដោយអនុវត្តតាមអនុសាសន៍ដឹកនាំរបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ កាលពីថ្ងៃទី១៤ ខែមីនា  ឆ្នាំ២០២៦ ឧត្តមសេនីយ៍ទោ ហេង សុផលស្នងការនគរបាលខេត្តកំពង់ធំ បានយកចិត្តទុកដាក់និងបន្តបញ្ចុះកងកម្លាំងការពាររក្សាសន្តិសុខ សុវត្ថិភាពសណ្តាប់ធ្នាប់ជូនភ្ញៀវទេសចរណ៍ជាតិនិងអន្តរជាតិតាមមណ្ឌលរមណីយដ្ឋានទូទាំងខេត្ត។

ទន្ទឹមនឹងការអនុវត្តតួនាទី/ភារកិច្ចជាប្រចាំថ្ងៃកម្លាំងការិយាល័យនគរបាលទេសចរណ៍បានផ្លាស់ប្ដូរវេនប្រចាំការ និងចុះល្បាតត្រួតពិនិត្យភូមិសាស្ត្រជាប្រចាំ ដោយប្រើប្រាស់មធ្យោបាយនឹងការល្បាតដោយថ្មើរជើងតាមទីជិតឬទីឆ្ងាយ។

ស្នងការដ្ឋាននគរបាលរាជធានី-ខេត្ត ដោយមានការយកចិត្តទុកពីសំណាក់ថ្នាក់ដឹកនាំក្រសួងមហាផ្ទៃនិងអគ្គស្នងការដ្ឋាននគរបាលជាតិបានឧបត្ថម្ភសម្ភារមធ្យោបាយជាបន្តបន្ទាប់តាមដំណាក់កាលនីមួយៗ រយៈពេលថ្មីៗនេះថ្នាក់ដឹកនាំបានឧបត្ថម្ភកង់មួយចំនួនដល់អង្គភាពដើម្បីផ្តល់ភាពងាយស្រួលដល់មន្ត្រីការិយាល័យជំនាញយកទៅប្រើប្រាស់ស្របតាមតម្រូវការចាំបាច់ ក្នុងការអនុវត្ត តួនាទី
 ភារកិច្ច។

សកម្មភាពចេញល្បាតដោយជិះកង់គឺជាគំនិតដ៏ឈ្លាសវៃប៉ិនប្រសព្វរបស់កងកម្លាំងក្នុងការសន្សំសំចៃថវិកា ព្រមទាំងកាត់បន្ថយការចំណាយលើប្រេងសាំងសម្រាប់មធ្យោបាយធ្វើដំណើរ ស្របតាមវិបត្តិសេដ្ឋកិច្ចពិភពលោកប្រេងឥន្ធនៈកំពុងតែឡើងថ្លៃជាពិសេសចៀសផុតពីការបំពុលបរិស្ថាន ដែលបញ្ចេញពីយានយន្តគ្រប់ប្រភេទព្រមទាំងបំផុសគំនិតស្មារតីដល់ប្រជាពលរដ្ឋកម្ពុជា។ ដោយឡែកប្រជាពលរដ្ឋខេត្តកំពង់ធំឱ្យចូលរួមថែរក្សាអនាម័យបរិស្ថានការពារអភិរក្សធនធានធម្មជាតិឱ្យមាននិរន្តរភាពប្រកបដោយភាពស្អាតស្រស់បំព្រង។

សូមបញ្ជាក់ថា ក្នុងកិច្ចប្រជុំនាពេលថ្មីៗនេះកន្លងទាំងនេះ លោកឧត្តមសេនីយ៍ទោ ហេង សុផល បានថ្លែងក្រើនរំឭកដល់បងប្អូនកងកម្លាំងនគរបាលទេសចរណ៍សូមថែទាំសុខភាព គោរពវិន័យរបស់កងកម្លាំងនគរបាលជាតិ ពង្រឹងរបៀបរបបការងារគ្រប់ពេលវេលាក្នុងការបំពេញភារកិច្ច។ មន្ត្រីជំនាញត្រូវគ្រងឯកសណ្ឋានឱ្យសក្តិសមជាមន្ត្រីនគរបាលជាតិប្រកាន់ខ្ជាប់សីលធម៌ សាមគ្គីភាពផ្ទៃក្នុងនិងកិច្ចសហការល្អ។ ផ្លាស់ប្តូរវេនប្រចាំការចេញកម្លាំងល្បាត តាមគោលដៅងាយរងគ្រោះនិងរៀបចំសណ្តាប់ធ្នាប់តាមទីសាធារណៈតំបន់ទេសចរណ៍តាមដងផ្លូវ រមណីយដ្ឋានប្រាង្គប្រាសាទដើម្បីធានាបាននូវសន្តិសុខសុវត្តិភាពជូនភ្ញៀវជាតិ-អន្តរជាតិព្រមទាំងការពារសម្បត្តិបេតិកភណ្ឌជាតិ ថែទាំសម្ភារៈមធ្យោបាយដើម្បីធានាក្នុងការប្រើប្រាស់បានយូរអង្វែង៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)