AKPបន្ទាយមានជ័យថ្ងៃទី១៤ខែមីនាឆ្នាំ២០២៦– រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នៅតែបន្តជំរុញយ៉ាងសកម្មនូវកំណែទម្រង់ការបណ្តុះបណ្តាលធនធានមនុស្ស ដោយមិនបែងចែករវាងវិស័យអាណាចក្រ និងពុទ្ធិចក្រឡើយ ដើម្បីធានាឱ្យបាននូវសង្គមមួយដែលមានចំណេះដឹងទូទៅផង និងសីលធម៌គុណធម៌ខ្ពស់ផង។

សេចក្តីថ្លែងការណ៍នេះ ត្រូវបានលើកឡើងដោយ លោក យឹម សំណាង អភិបាលរងខេត្តបន្ទាយមានជ័យ ក្នុងឱកាសដែលលោកបានអញ្ជើញជាអធិបតីក្នុងពិធីកាត់វិញ្ញាសាប្រឡងចូលរៀនកម្រិតពុទ្ធិកមធ្យមសិក្សាបឋមភូមិ នៅសាលាពុទ្ធិកអនុវិទ្យាល័យ សម្ដេច ជា ស៊ីម ក្រុងសិរីសោភ័ណ នាព្រឹកថ្ងៃសៅរ៍ ទី១៤ ខែមីនា ឆ្នាំ២០២៦ នេះ។

ក្នុងបរិយាកាសដ៏មានរបៀបរៀបរយ លោកអភិបាលរងខេត្ត បានក្រើនរម្លឹកដល់សាមណសិស្សទាំង ១៩២ អង្គ ដែលកំពុងឈរជើងក្នុងមណ្ឌលប្រឡង ត្រូវយកចិត្តទុកដាក់ និងខិតខំប្រឹងប្រែងឱ្យអស់ពីសមត្ថភាពលើគ្រប់មុខវិញ្ញាសា។ លោកបានសង្កត់ធ្ងន់ថា«ការប្រឡងនេះ គឺជាជំហានដំបូងដ៏សំខាន់ ក្នុងការវាស់ស្ទង់សមត្ថភាព ដើម្បីទទួលបានឱកាសបន្តការសិក្សាក្នុងកម្រិតខ្ពស់ ដែលវានឹងក្លាយជាទុនដ៏មានតម្លៃសម្រាប់អនាគត ទាំងក្នុងផ្លូវធម៌ និងផ្លូវលោក»។

លោក យឹម សំណាង ក៏បានលើកបង្ហាញពីចក្ខុវិស័យវែងឆ្ងាយរបស់រាជរដ្ឋាភិបាល ដែលតែងតែផ្តល់តម្លៃខ្ពស់ដល់វិស័យព្រះពុទ្ធសាសនា ដែលជាសាសនារបស់រដ្ឋ។ ការពង្រឹងគុណភាពអប់រំនៅតាមសាលាពុទ្ធិកសិក្សា គឺជាផ្នែកមួយមិនអាចខ្វះបាននៃយុទ្ធសាស្ត្របញ្ចកោណ ដើម្បីផលិតធនធានមនុស្សដែលមានទាំង "ចំណេះដឹង និងចំណេះធ្វើ" អមដោយ "គុណធម៌"។

តាមរបាយការណ៍របស់ លោក បៀវ ថាន ប្រធានមន្ទីរធម្មការ និងសាសនាខេត្តបន្ទាយមានជ័យ បានឱ្យដឹងថា សម្រាប់ការប្រឡងចូលរៀននៅពុទ្ធិកអនុវិទ្យាល័យ សម្ដេច ជា ស៊ីម ក្នុងឆ្នាំសិក្សា ២០២៦-២០២៧ នេះ មានចំនួនបេក្ខសមណសិស្ស ១៩២ អង្គ ការរៀបចំ ចែកចេញជា ៨ បន្ទប់ប្រឡង។ មុខវិជ្ជាប្រឡង រួមមាន ៤ មុខវិជ្ជាសំខាន់ៗគឺ ភាសាបាលី, សរសេរតាមអាន, ពុទ្ធិវិន័យ និងគណិតវិទ្យាដោយ រយៈពេលប្រឡង ១ ថ្ងៃពេញ។

ពិធីនេះក៏មានការនិមន្តចូលរួមពីសំណាក់ព្រះថេរានុត្ថេរៈជាន់ខ្ពស់ រួមមាន ព្រះឧត្តមសីលញាណ ធុល សុធា ព្រះមេគណខេត្ត និង ព្រះសមណញាណ ណាប់ ម៉ឺន ព្រះបាឡាត់គណខេត្ត ព្រមទាំងមន្ត្រីជំនាញនៃមន្ទីរធម្មការ និងសាសនា ដែលសបញ្ជាក់ឱ្យឃើញពីសាមគ្គីភាព និងការរួមគ្នាយ៉ាងស្អិតរមួតរវាងស្ថាប័នរដ្ឋ និងសាសនា ក្នុងកិច្ចការអប់រំបណ្តុះបណ្តាលសាមណសិស្សឱ្យក្លាយជាសសរទ្រូងដ៏រឹងមាំរបស់ជាតិ៕

ដោយ៖ ឈុន សារ៉ាត