AKPបន្ទាយមានជ័យថ្ងៃទី១៤ខែមីនាឆ្នាំ២០២៦– នៅក្នុងបរិយាកាសដ៏អធិកអធមនៃពិធីអបអរសាទរខួបលើកទី ១១៥ ទិវាអន្តរជាតិនារី ៨ មីនា កាលពីថ្ងៃទី១៣ ខែមីនា ឆ្នាំ២០២៦ កន្លងទៅនេះ ថ្នាក់ដឹកនាំខេត្តបន្ទាយមានជ័យ បានបង្ហាញនូវឆន្ទៈយ៉ាងមុតមាំក្នុងការបន្តជំរុញសមភាពយេនឌ័រ និងការការពារសិទ្ធិស្ត្រី ក្រោមប្រធានបទដ៏មានអត្ថន័យ "សន្តិភាព និងសន្តិសុខសម្រាប់ស្ត្រី និងគ្រួសារ"។

ថ្លែងក្នុងអង្គពិធីនោះ លោកជំទាវ ជ័យ ណារី អ៊ុរាត្រី អនុប្រធានកិត្តិយសសាខាសមាគមនារីដើម្បីសន្តិភាព និងអភិវឌ្ឍន៍ខេត្តបន្ទាយមានជ័យ បានគូសបញ្ជាក់យ៉ាងស៊ីជម្រៅថា តម្លៃនៃសន្តិភាពមិនត្រឹមតែជាការអវត្តមាននៃសង្គ្រាមប៉ុណ្ណោះទេ ប៉ុន្តែគឺជា "ខ្យល់ដង្ហើម" ដែលអនុញ្ញាតឱ្យស្ត្រីអាចបញ្ចេញសមត្ថភាព លះបង់នូវភាពភ័យខ្លាច និងក្លាយជាកម្លាំងចលករមិនអាចខ្វះបានក្នុងអភិវឌ្ឍសង្គមជាតិ។
"នៅពេលដែលគ្រួសារនីមួយៗមានសន្តិសុខ និងសុវត្ថិភាព ស្ត្រីនឹងមានឱកាសពេញលេញក្នុងការអប់រំ ថែទាំសុខភាព និងចូលរួមក្នុងសកម្មភាពសេដ្ឋកិច្ច ដែលនាំមកនូវភាពរុងរឿងដល់គ្រួសារ និងសហគមន៍ទាំងមូល"។ នេះជាប្រសាសន៍សង្កត់ធ្ងន់របស់លោកជំទាវជ័យ ណារីអ៊ុរាត្រី។

ក្នុងនាមជាអ្នកដឹកនាំផ្ទាល់លើការងារស្ត្រីក្នុងខេត្ត លោកស្រី រស់ សុផានី អភិបាលរងខេត្ត និងជាប្រធានសាខាសមាគមនារីដើម្បីសន្តិភាព និងអភិវឌ្ឍន៍ខេត្ត ក៏បានលើកឡើងនូវទស្សនទានសំខាន់ៗអំពីតួនាទីរបស់ស្ត្រីក្នុងយុគសម័យឌីជីថល និងការការពារសិទ្ធិស្ត្រីពីគ្រប់ទម្រង់នៃអំពើហិង្សា។ លោកស្រីបានលើកទឹកចិត្តឱ្យស្ត្រីគ្រប់រូបបន្តពង្រឹងសមត្ថភាពខ្លួនឯង ដើម្បីក្លាយជាបង្អែកដ៏រឹងមាំក្នុងគ្រួសារ និងសង្គម។

សូមបញ្ជាក់ថា  ពិធីនេះត្រូវបានរៀបចំឡើងនៅសាលប្រជុំមន្ទីរកិច្ចការនារីខេត្ត ដោយមានការអញ្ជើញចូលរួមពីសំណាក់ ឯកឧត្តម យុត ស្វីតនី សមាជិកក្រុមប្រឹក្សាខេត្តថ្នាក់ដឹកនាំមន្ទីរ-អង្គភាពជុំវិញខេត្ត និងសមាជិក-សមាជិកា សរុបប្រមាណជាង ៨០នាក់។
ខ្លឹមសារនៃទិវាអន្តរជាតិនារី ៨ មីនា ឆ្នាំនេះ មិនត្រឹមតែជាការរំលឹកដល់ការតស៊ូរបស់ស្ត្រីលើសកលលោកប៉ុណ្ណោះទេ ប៉ុន្តែសម្រាប់ខេត្តបន្ទាយមានជ័យ វាគឺជាការដាក់ចេញនូវយុទ្ធសាស្ត្រពង្រឹង "សន្តិសុខគ្រួសារ" ដើម្បីឆ្លើយតបទៅនឹងបញ្ហាប្រឈមថ្មីៗ។ អង្គពិធីទាំងមូលបានឯកភាពគ្នាថា ការវិនិយោគលើស្ត្រី គឺជាការវិនិយោគលើសន្តិភាព និងការអភិវឌ្ឍប្រកបដោយចីរភាព៕

ដោយ៖ ឈុន សារ៉ាត