AKP ព្រះសីហនុ ថ្ងៃទី១៣ ខែមីនា ឆ្នាំ២០២៦–លោកស្រី ម៉ាក់ សំណាង អនុប្រធានគណៈកម្មាធិការសាខា និងជាអនុប្រធានក្រុមការងារឥស្សរជនឆ្នើមថ្នាក់ជាតិនៃសាខាក្រុមប្រតិបត្តិសាខាកាកបាទ ក្រហមកម្ពុជា ខេត្តព្រះសីហនុ និងប្រតិភូចុះសួរសុខទុក្ខដល់ស្ត្រីមានផ្ទៃពោះ ស្រ្តីសម្រាលកូន និងស្រ្តីមានកូនតូចចំនួន ១៧នាក់ ស្ថិតនៅពន្ធនាគារខេត្តព្រះសីហនុ ក្នងឱកាសអបអរទិវាជាតិសុខភាពមាតា ទារក និងកុមារ ២១កុម្ភៈ ២០២៦ ក្រោមប្រធានបទ “រួមគ្នាលើកកម្តស់គុណភាព សុវត្ថិភាព ប្រសិទ្ធភាពនៃការថែទាំផ្ទៃពោះមុនសម្រាល រួមទាំងក្នុងបរិបទមានគ្រោះអាសន្ន ឬគ្រោះមហន្តរាយ ដើម្បីធានាថាទាំងម្តាយ និងទារកមានសុខភាពល្អ” ពិធីនេះបានប្រារព្ធធ្វើនៅក្នុងពន្ធនាគារខេត្តព្រះសីហនុ នារសៀលថ្ងៃសុក្រទី ១៣ ខែមីនា ឆ្នាំ២០២៦ ។

   ក្នុងឱកាសនោះ លោកស្រី ម៉ាក់ សំណាង បានពាំនាំប្រសាសន៍ផ្តាំផ្ញើសួរសុខទុក្ខ និងសេចក្តីនឹករលឹកពី ឯកឧត្តម ម៉ាង សុីណេត ប្រធានគណៈ កម្មាធិការសាខាកាកបាទក្រហមកម្ពុជា ខេត្តព្រះ សីហនុ ជាប្រធានក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមខេត្តព្រះសីហនុ  ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គ លេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ តែងតែគិតគូរអំពីសុខទុក្ខ និងសុខុមាលភាពចំពោះស្រ្តី កុមារ និងទារក។ 

  លោកស្រី អនុប្រធានគណៈកម្មាធិការសាខាកាកបាទក្រហមខេត្តព្រះសីហនុ បន្តថា ការលើកកម្ពស់សុខភាពមាតា និងទារកឱ្យកាន់តែប្រសើរឡើង និងគោលដៅអភិវឌ្ឍន៍ប្រកបដោយជ័យភាពឆ្នាំ២០៣០ ហើយលោកស្រីក៏សូមឱ្យមានការផ្តល់អាហារូបត្ថម្ភសម្រាប់កូនៗឱ្យបានគ្រប់គ្រាន់ដូចជាអាហារសារជាតិវីតាមីន និងត្រូវចាក់វ៉ាក់សាំងឱ្យកូនបានគ្រប់ដូស ហើយសូមបងប្អូនរស់នៅមានអនាម័យល្អ សម្រាប់ខ្លួនយើង និងកូនរបស់យើងមានសុខភាពល្អគ្រប់គ្នា។

  អំណោយដែលបានផ្តល់ជូនស្ត្រី និងទារកចំនួន ១៧នាក់ ក្នុង១នាក់ៗទទួលបាន អង្ករ ២៥គីឡូក្រាម មី១កេស ត្រីខ១យួរ ទឹកត្រី១យួរ កន្ទេល១ ឃីត ១កញ្ចប់ (សារុង១ ភួយ១ មុង១ ក្រមា១) ឃីតទារក ១កញ្ចប់ (អាវខោកូនង៉ា២ ស្រោមដៃ២ ស្រោម ជើង២ ខោទឹកនោម១យួរ សាប៊ូម្សៅ១កញ្ចប់ ដបទឹកដោះគោ១ សាប៊ូកូនក្មេង១ដប និងថវិកា ចំនួន ៥០.០០០រៀល ៕ 
ដោយ៖ ងូ សុមុនី