AKP ភ្នំពេញ ថ្ងៃទី១៣ ខែមីនា ឆ្នាំ២០២៦—ក្រោមពន្លឺព្រះច័ន្ទដ៏ត្រចះត្រចង់ ក្រុមការងាររបស់ អង្គការអភិរក្សសមុទ្រកម្ពុជា MCC បានសង្កេតឃើញនូវ "ការផ្ទុះឡើងនៃជីវិត" នៅក្រោមផ្ទៃទឹកយ៉ាងស្ងប់ស្ងាត់។ នោះគឺជាការបង្កកំណើតរបស់ផ្កាថ្មក្នុងពេលដំណាលគ្នា (Coral Spawning)។ នេះបើតាមការឱ្យពីអង្គការ MCC​ នៅរសៀលថ្ងៃទី១៣ ខែមីនា ឆ្នាំ២០២៦។

ក្នុងចលនាដ៏ស៊ីចង្វាក់គ្នាបំផុត បណ្ដុំផ្កាថ្ម បានបញ្ចេញពង និងមេជីវិត​ (Gamete bundles) ដែលធ្វើឱ្យផ្ទៃទឹកដ៏ងងឹត ប្រែទៅជាពោរពេញដោយគ្រាប់ពន្លឺពណ៌សតូចៗអណ្តែតពេញសមុទ្រ។ បាតុភូតធម្មជាតិដែលកើតឡើងតាមរយ:អងដំណេីរវិលជុំរបស់ព្រះច័ន្ទនេះ គឺជាមូលដ្ឋានគ្រឹះនៃការកកើតឡើងថ្មីរបស់ផ្កាថ្ម។ លើសពីនេះទៅទៀត ការកកើតឡើងនេះមានភាពចម្រុះនៃប្រភេទពូជជាច្រើន (Genetic Diversity) ដែលចាំបាច់សម្រាប់ផ្កាថ្មជំនាន់ក្រោយអាចលូតលាស់ និងរីកសាយភាយបានយ៉ាងល្អ។ 
អ្វីដែលសំខាន់បំផុតនោះគឺ អង្គការអភិរក្សសមុទ្រកម្ពុជា MCC បានធ្វើការរកឃើញនេះគឺជាការកត់ត្រាជាផ្លូវការលើកដំបូងបង្អស់នៃ "ការបន្តពូជរបស់ផ្កាថ្ម" នៅក្នុងប្រជុំកោះនៃខេត្តកែប ៕

ដោយ៖ ណយ នឿន (ប្រភព៖MCC)