AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៦--សម្រាប់ឆ្នាំ២០២៦នេះ គឺជាឆ្នាំបើកទំព័រសករាជថ្មីនៃការសហការរៀបចំរបស់សហព័ន្ធកីឡាប្រដាល់កម្ពុជាជាមួយក្រុមហ៊ុន វឌ្ឍនៈ គឺកម្មវិធីកីឡាប្រដាល់សកលអាជីព «Dragon the Golden Ring» ដែលជាការឧបត្ថម្ភផ្តាច់មុខរបស់ក្រុមហ៊ុនវឌ្ឍនៈ ជារៀងរាល់ខែ ដោយចាប់ផ្តើមប្រកួតដំបូង នាថ្ងៃទី២៨ ខែកុម្ភៈ ដល់ខែធ្នូ ឆ្នាំ២០២៦។

នេះជាការគូសបញ្ជាក់របស់ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់កម្ពុជា នៅក្នុងបទសម្ភាសន៍មួយជាមួយក្រុមអ្នកសារព័ត៌មានកីឡា ក្នុងឱកាសត្រៀមរៀបចំការប្រកួតឆាប់ៗខាងមុខនេះ។ ប្រធានសហព័ន្ធប្រដាល់សកលកម្ពុជាសង្កត់ធ្ងន់ថា ៖«ការរៀបចំកម្មវិធីកីឡាប្រដាល់សកលអាជីពនេះត្រូវបានចាត់ទុកថាជាកម្មវិធីវិសេសវិសាលខ្លាំងណស់ ដោយបង្ហាញពីភាពជឿជាក់របស់ក្រុមហ៊ុនវឌ្ឍនៈដែលតែងតែចូលរួមឧបត្ថម្ភគាំទ្រដល់វិស័យកីឡាជាតិ ហើយឆ្នាំ២០២៦នេះបានចូលរួមគាំទ្រដល់វិស័យកីឡាប្រដាល់សកលកម្ពុជា ដែលជាប្រភេទកីឡាអូឡាំពិក។ ការរៀបចំនេះបានជួយដល់ការអភិវឌ្ឍធនធានកីឡាករថ្នាល និងឈុតធំ ជាពិសេសជួយដល់ការអភិវឌ្ឍដល់ក្រុមជម្រើសជាតិ ខណៈក្រុមជម្រើសជាតិត្រៀមចូលរួមប្រកួតកីឡាអាស៊ី នៅប្រទេសជប៉ុន និងប្រកួតអន្តរជាតិមួយចំនួនទៀត នៅឆ្នាំ២០២៦នេះ»។

ឯកឧត្តម ប៊ុយ សុភ័ណ្ឌ បានបន្ថែមថា បើរម្លឹកពីការជួយឧបត្ថម្ភគាំទ្ររបស់ក្រុមហ៊ុនវឌ្ឍនៈ កាលពីឆ្នាំ២០២៥ កន្លងទៅមានដូចជា ការជួយដល់ការរៀបចំការប្រកួតជើងឯកថ្នាក់ជាតិ ប្រចាំឆ្នាំ២០២៥។ ជាមួយនឹងការមើលឃើញពីការខិតខំប្រឹងប្រែងរបស់សហព័ន្ធ ក្រុមហ៊ុនដៃគូមួយនេះបានបន្តជួយឧបត្ថម្ភគាំទ្រកាន់តែធំ ក្នុងនោះមានជាជួយគាំទ្រដល់ការប្រកួតអន្តរជាតិនៅក្រៅប្រទេសបន្ថែមទៀត។ ប្រធានសហព័ន្ធរូបនេះចាត់ទុកថា តាមរយៈការជួយគាំទ្រនេះ ប្រភេទកីឡាប្រដាល់សកលកម្ពុជានឹងទទួលបានសមិទ្ធផលថ្មីៗជាប្រវត្តិសាស្ត្រថ្មីៗកាន់តែច្រើន ជាពិសេសឆ្ពោះទៅចូលរួមប្រកួត និងជាប់វគ្គជម្រុះ (Qualify) អូឡាំហ្គេមបន្ថែមទៀត ដូចកីឡាការិនីតេក្វាន់ដូ WT ស៊ន សៀវម៉ី ជាដើម ក្នុងសករាជថ្មីនេះ។

គួរបញ្ជាក់ថា សម្រាប់ការប្រកួតប្រដាល់អាជីព នាថ្ងៃទី២៨ខែកុម្ភៈឆាប់ៗខាងមុខនេះមាន ៦គូ ដោយផ្ដោតទាំងក្រុមថ្នាលយុវជន ក្រុមធំ និងមានគូអន្តរជាតិផងដែរ។ ជាមួយគ្នានេះ ឯកឧត្តម ប៊ុយ សុភ័ណ្ឌ ក៏បានអំពាវនាវឱ្យមហាជនចូលរួមទស្សនាច្រើនកុះករនៅសាលប្រដាល់សកល នៃពហុកីឡដ្ឋានជាតិអូឡាំពិក ហើយប្រធានសហព័ន្ធក៏បានជំរុញលើកទឹកចិត្តឱ្យកីឡាករ កីឡាការិនីខិតខំប្រឹងប្រែងឱ្យអស់ពីសមត្ថភាព ដើម្បីក្ដោបក្តាប់ឱកាសដ៏សំខាន់នេះឱ្យបាន៕

ដោយ ហេង ណាលីន