AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៦--សហព័ន្ធកីឡាទោចក្រយានកម្ពុជាបានប្រកាសរៀបចំព្រឹត្តិការណ៍ជិះកង់ដើម្បីទាំងអស់គ្នា លើកទី៣ ឆ្នាំ២០២៦ ក្រោមប្រធានបទ «ជិះកង់ដើម្បីកុមារកម្ពុជាអបអរទិវាជិះកង់ពិភពលោក និងទិវាកុមារអន្តរជាតិ» ចេញដំណើរនាថ្ងៃសៅរ៍ ទី៣០ ខែឧសភា ឆ្នាំ២០២៦ ចម្ងាយ ៣១០គីឡូម៉ែត្រ ពីរាជធានីភ្នំពេញឆ្ពោះទៅមន្ទីរពេទ្យកុមារអង្គរ ខេត្តសៀមរាប។

លោក នូ ចំរើន អគ្គលេខាធិការ សហព័ន្ធកីឡាទោចក្រយានកម្ពុជាបានគូសបញ្ជាក់ នៅព្រឹកថ្ងៃទី១៨ ខែកុម្ភៈ ឆ្នាំ២០២៦នេះថា នេះជាការឆ្នាំទី៣ដែលសហព័ន្ធកីឡាទោចក្រយានកម្ពុជាបានរៀបចំព្រឹត្តិការណ៍ជិះកង់បែបនេះ ដើម្បីសប្បុរសធម៌ ដោយជិះកង់ពីភ្នំពេញទៅខេត្តសៀមរាប។ ចំពោះគោលបំណងចម្បងនៃការរៀបចំព្រឹត្តិការណ៍ជិះកង់ ដើម្បីទាំងអស់គ្នានេះត្រូវបានលោក នូ ចំរើន បានសង្កត់ធ្ងន់ថា ព្រឹត្តិការណ៍ជិះកង់នេះគឺធ្វើឡើងដើម្បីកៀរគរថវិកា សម្ភារជួយដល់មន្ទីរពេទ្យកុមារអង្គរ ព្រមទាំងបន្តបំផុសការផ្សព្វផ្សាយឱ្យកាន់តែទូលំទូលាយជូនដល់កីឡាករ កីឡាការិនី និងមហាជនឱ្យចូលរួមលេងកីឡាជិះកង់ ដើម្បីសុភាព មិត្តភាព សាមគ្គីភាពឱ្យកាន់តែល្អប្រសើរឡើងបន្ថែមទៀត។

តាមរយៈការរៀបចំនេះ សហព័ន្ធចង់ឱ្យក្រុមជិះកង់នៅខេត្តបានចូលរួមសហការគ្នា ក្នុងដំណើរជិះកង់កម្សាន្ត ដើម្បីគោលដៅសប្បុរសធម៌ទៅកាន់ខេត្តសៀមរាប ក៏ដូចជាគោលដៅរួមចំណែកដល់ការផ្សព្វផ្សាយវិស័យទេសចរណ៍នៅខេត្តសៀមរាបផងដែរ។ ក្នុងនាមតំណាងសហព័ន្ធ លោក នូ ចំរើន បានអំពាវនាវដល់កីឡាករ កីឡាការិនី យុវជន មហាជនចូលរួមចុះឈ្មោះឱ្យបានច្រើនកុះករ ដើម្បីរួមចំណែកដល់កិច្ចការសប្បុរសធម៌ តាមរយៈការបង់ថវិកាសម្រាប់ការជិះកង់ ក៏ដូចជាលើកស្ទួយដល់វិស័យកីឡាទោចក្រយានកម្ពុជាឱ្យមានសកម្មភាពកាន់តែផុសផុលឡើងបន្ថែមទៀត។ ចំពោះមហាជន សប្បុរសជន ឬក្រុមហ៊ុននានា ដែលមិនមានបំណងចូលរួមជិះកង់ដោយផ្ទាល់ ក៏អាចចូលរួមឧបត្ថម្ភជាថវិកា និងសម្ភារបាន ក្នុងន័យជួយគាំទ្រដល់សកម្មភាពសប្បុរសធម៌ដើម្បីកុមារកម្ពុជា ដែលកំពុងខ្វះខាត៕

ដោយ ហេង ណាលីន