AKP ភ្នំពេញ ថ្ងៃទី១១ ខែកុម្ភៈ ឆ្នាំ២០២៦--សហព័ន្ធខ្មែរកីឡាហែលទឹកគ្រោងនឹងរៀបចំការប្រកួតកីឡាហែលទឹក និងហែលទឹកពាក់ជើងទា ជ្រើសរើសជើងឯកយុវជនព្រឹទ្ធាចារ្យ ហែម ថុន លើកទី៨ នាថ្ងៃទី២១ ខែកុម្ភៈ ឆ្នាំ២០២៦ នៅអាងហែលទឹកនៃពហុកីឡដ្ឋានជាតិមរតកតេជោ ខណៈការប្រកួតប្រចាំឆ្នាំនេះនឹងបន្តបើកទូលាយដល់ កីឡាករ កីឡាការិនីខ្មែរ និងបរទេសនៅកម្ពុជាចូលរួមប្រកួតប្រជែងបង្កើនគុណភាពបច្ចេកទេសជាមួយគ្នាឱ្យកាន់តែល្អប្រសើរបន្ថែមទៀត។

នេះជាការគូសបញ្ជាក់របស់លោក ហែម គីរី អគ្គលេខាធិការ សហព័ន្ធខ្មែរកីឡាហែលទឹក នៅថ្ងៃទី១១ ខែកុម្ភៈ ឆ្នាំ២០២៦។ អគ្គលេខាធិការរូនេះបានលើកឡើងថា ការប្រកួតនេះផ្តោតសំខាន់ទៅលើការបំផុសដល់កីឡាករ កីឡាការិនីហែលទឹកកម្រិតយុវជន នៅទូទាំងប្រទេសកម្ពុជាបានចូលរួមប្រកួតកីឡាហែលទឹក និងហែលទឹកពាក់ជើងទាឱ្យកាន់តែខ្លាំងក្លា ដើម្បីសម្រួចគុណភាពបច្ចេកទេសពួកគាត់ឱ្យកាន់តែល្អប្រសើរ។ កាលណាការហ្វឹកហាត់ មានការប្រកួតប្រជែង នោះបច្ចេកទេសរបស់ពួកកាត់កាន់តែល្អប្រសើរឡើងបន្ថែមទៀត។

លោក ហែម គីរី សង្កត់ធ្ងន់ថា គោលបំណងដ៏សំខាន់បំផុតរបស់សហព័ន្ធខ្មែរកីឡាហែលទឹកនោះ គឺឯកឧត្តមឧបនាយករដ្ឋមន្ត្រី ស៊ុន ចាន់ថុល ប្រធានសហព័ន្ធខ្មែរកីឡាហែលទឹកតែងតែជំរុញឱ្យរៀបចំការប្រកួតនេះជារៀងរាល់ឆ្នាំ ពោលគឺបន្ទាប់ពីពីលោកព្រឹទ្ធាចារ្យ ហែម ថុន ទទួលមរណភាពមក ឯកឧត្តមប្រធានសហព័ន្ធតែងតែរៀបចំការប្រកួតកីឡាហែលទឹក និងហែលទឹកពាក់ជើងទា ជើងឯកយុវជនព្រឹទ្ធាចារ្យ ហែម ថុន ដើម្បីជាការរម្លឹកស្នាដៃ និងគុណូបការៈរបស់លោកព្រឹទ្ធាចារ្យ ក្នុងគោលដៅបន្តដំណើរការអភិវឌ្ឍប្រភេទកីឡាអូឡាំពិកដ៏ពេញនិយមមួយនេះរបស់កម្ពុជាឱ្យកាន់តែរីកចម្រើបន្ថែមទៀត។

បន្ថែមពីលើនេះ លោក ហែម គីរី បានឱ្យដឹងទៀតថា តាមរយៈព្រឹត្តិការណ៍ប្រចាំឆ្នាំនេះ សហព័ន្ធក៏ចង់វាស់ស្ទង់គុណភាពបច្ចេកទេសរបស់កីឡាករ កីឡាការិនីខ្មែរ និងបរទេសដែលរស់នៅកម្ពុជាបានចូលរួមប្រកួតប្រជែងជាមួយគ្នា។ ចាប់តាំងពីឆ្នាំ២០២៥មក សហព័ន្ធបានបើកទូលាយដល់ខ្មែរ និងបរទេសបានចូលរួមប្រកួតប្រជែងជាមួយគ្នា ដើម្បីស្វែងរកធនធានឱ្យបានកាន់តែច្រើន សម្រាប់វិស័យហែលទឹកកម្ពុជា។ គោលគំនិតនៃការបើកទូលាយនេះ គឺដើម្បីឱ្យការប្រកួតប្រជែងរវាងយុវជនខ្មែរ និងបរទេសកាន់តែផុសផុលខ្លាំង ពោលគឺនៅពេលប្រកួត កីឡាករ កីឡាការិនីម្នាក់ៗត្រូវតែខ្លាំង ដោយគំនិតបើកឱ្យមានការចូលរួមលក្ខណៈទូលាយនេះ គឺប្រទេសជឿនលឿននៃវិស័យកីឡាហែលទឹកក៏ធ្វើបែបនេះដូចគ្នាផងដែរ។

គួរបញ្ជាកថា សម្រាប់ប្រភេទកីឡាហែលទឹកកម្រិតអាយុ ដែលអាចចូលរួមប្រកួតបាន គឺមានកុមារអាយុ៧ឆ្នាំ-៨ឆ្នាំ, កុមារ៩-១០ឆ្នាំ, កុមារ ១១ឆ្នាំ-១២ឆ្នាំ, កម្រិតយុវជន-យុវនារី  អាយុពី១៣ឆ្នាំ-១៤ឆ្នាំ  និងកម្រិតយុវជន-យុវនារី អាយុពី១៥ឆ្នាំ-១៦ឆ្នាំ។ ចំណែកឯកីឡាហែលទឹកពាក់ជើងទា មានកីឡាករ កីឡាការិនីអាយុច្រើនបំផុតត្រឹម ១៤ឆ្នាំ៕

ដោយ ហេង ណាលីន (រូបភាព៖ ឯកសារសហព័ន្ធ)