AKP បន្ទាយមានជ័យ ថ្ងៃទី០៣ ខែកុម្ភៈ ឆ្នាំ២០២៦--ក្នុងស្មារតីជំរុញការអភិវឌ្ឍឱ្យដល់មូលដ្ឋាន កាត់បន្ថយគម្លាតរវាងទីក្រុង និងជនបទ ក្រសួងអភិវឌ្ឍន៍ជនបទបានដាក់ចេញនូវផែនទីចង្អុលផ្លូវយុទ្ធសាស្ត្រថ្មីមួយ ដែលផ្តោតសំខាន់លើការលើកកម្ពស់គុណភាពជីវិតពលរដ្ឋតាមរយៈសសរស្តម្ភគន្លឹះចំនួន ៤ ដើម្បីឆ្លើយតបទៅនឹងចក្ខុវិស័យកម្ពុជាឆ្នាំ២០៥០។

កាលពីរសៀលថ្ងៃទី០២ ខែកុម្ភៈ ឆ្នាំ២០២៦ នៅសាលាខេត្តបន្ទាយមានជ័យ ឯកឧត្តម ភួង សោភា រដ្ឋលេខាធិការក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងកិច្ចប្រជុំផ្សព្វផ្សាយ «គោលនយោបាយជាតិស្តីពីការអភិវឌ្ឍជនបទឆ្នាំ ២០២៥-២០៣៥» ដោយមានការចូលរួមពីមន្ត្រីជាន់ខ្ពស់ អាជ្ញាធរដែនដី និងមន្ត្រីពាក់ព័ន្ធយ៉ាងច្រើនកុះករ ដែលបង្ហាញពីសាមគ្គីភាពក្នុងការអនុវត្តយុទ្ធសាស្ត្រជាតិ។

ក្នុងឱកាសនោះ ឯកឧត្តមរដ្ឋលេខាធិការបានគូសបញ្ជាក់ថា គោលនយោបាយជាតិរយៈពេល ១០ឆ្នាំនេះ មិនត្រឹមតែជាការអភិវឌ្ឍរូបវន្តប៉ុណ្ណោះទេ ប៉ុន្តែគឺជាការកសាងប្រព័ន្ធអេកូឡូស៊ីរស់នៅដ៏រឹងមាំសម្រាប់ពលរដ្ឋជនបទ ដោយផ្តោតលើគោលដៅអាទិភាពចំនួន ៤៖ ហេដ្ឋារចនាសម្ព័ន្ធប្រទាក់ក្រឡា៖ ការតភ្ជាប់ផ្លូវជនបទឱ្យក្លាយជាសរសៃឈាមសេដ្ឋកិច្ចដ៏រឹងមាំ។ សុខភាព និងអាយុសង្ឃឹមរស់៖ ធានាឱ្យពលរដ្ឋទទួលបានសេវាសុខាភិបាល និងអាហារូបត្ថម្ភល្អ។ សន្តិសុខ និងបរិស្ថានស្អាត៖ បង្កើតភូមិឋានដែលមានសុវត្ថិភាព គ្មានការភ័យខ្លាច និងមានបរិស្ថានបៃតង។ កំណើនប្រាក់ចំណូលចីរភាព៖ បង្កើនឱកាសការងារ និងមុខរបរនៅនឹងកន្លែង ដើម្បីកាត់បន្ថយការចំណាកស្រុក។ ការផ្សារភ្ជាប់ទៅនឹង «យុទ្ធសាស្ត្របញ្ចកោណ» ដំណាក់កាលទី១។

គោលនយោបាយថ្មីនេះ ត្រូវបានរៀបចំឡើងយ៉ាងសម្រិតសម្រាំងដើម្បីគាំទ្រដល់យុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត។ គោលដៅចម្បងគឺការកាត់បន្ថយអត្រាភាពក្រីក្រឱ្យចុះមកក្រោម១០% និងការរៀបចំគ្រឹះដើម្បីឱ្យកម្ពុជាក្លាយជាប្រទេសដែលមានប្រាក់ចំណូលខ្ពស់នៅឆ្នាំ២០៥០។

«យើងមិនទុកចោលតំបន់ណាមួយឡើយ មិនថាជាតំបន់ទំនាប បឹងទន្លេសាប ឆ្នេរសមុទ្រ ឬខ្ពង់រាប ជាពិសេសតំបន់តាមបន្ទាត់ព្រំដែន នឹងត្រូវប្រែក្លាយទៅជាតំបន់សន្តិភាព មិត្តភាព និងការអភិវឌ្ឍពិតប្រាកដ»។ នេះជាប្រសាសន៍បន្ថែមឯកឧត្តម ភួង សោភា។

ជាមួយគ្នានោះ លោក ឃ្លោក នួយ អភិបាលរងខេត្តបន្ទាយមានជ័យ បានបង្ហាញនូវក្តីសង្ឃឹមយ៉ាងមុតមាំថា គោលនយោបាយនេះគឺជា «ទំព័រថ្មី» សម្រាប់ខេត្ត។ លោកបានសង្កត់ធ្ងន់ថា រដ្ឋបាលខេត្តនឹងសហការជាមួយគ្រប់ស្ថាប័ន ដើម្បីធានាថាការអភិវឌ្ឍនឹងទៅដល់ដៃពលរដ្ឋគ្រប់រូប ប្រកបដោយប្រសិទ្ធភាព និងតម្លាភាព។

សូមបញ្ជាក់ថា គោលនយោបាយជាតិស្តីពីការអភិវឌ្ឍជនបទឆ្នាំ ២០២៥-២០៣៥ គឺជាក្តីសង្ឃឹមថ្មីសម្រាប់កសាងអនាគតជនបទកម្ពុជា ដែលមិនត្រឹមតែមានផ្លូវ មានទឹក មានភ្លើងប៉ុណ្ណោះទេ ប៉ុន្តែគឺជាសហគមន៍ដែលពោរពេញដោយស្នាមញញឹម និងភាពចម្រុងចម្រើនប្រកបដោយចីរភាព៕

ដោយ ឈុន សារ៉ាត