AKP បន្ទាយមានជ័យ ថ្ងៃទី០១ ខែមករា ឆ្នាំ២០២៦-- ក្នុងស្មារតីសាមគ្គីជាតិជាធ្លុងមួយ និងការយកចិត្តទុកដាក់ខ្ពស់លើសុខទុក្ខរបស់កងកម្លាំងជួរមុខដែលកំពុងឈរជើងការពារបូរណភាពទឹកដី នៅថ្ងៃទី០១ ខែមករា ឆ្នាំ២០២៦ ឯកឧត្តម អ៊ី ឡុង តំណាងរាស្ត្រមណ្ឌលខេត្តបន្ទាយមានជ័យ រួមជាមួយសប្បុរសជន បានអញ្ជើញចុះសួរសុខទុក្ខ និងនាំយកអំណោយជាស្បៀងអាហារឧបត្ថម្ភដល់កម្លាំងជួរមុខ ក្នុងភូមិសាស្ត្រស្រុកថ្មពួក ខេត្តបន្ទាយមានជ័យ។

ក្នុងឱកាសសំណេះសំណាលនោះ ឯកឧត្តម អ៊ី ឡុង បានពាំនាំនូវការសួរសុខទុក្ខ និងសេចក្តីនឹករលឹកយ៉ាងជ្រាលជ្រៅពីសំណាក់សម្តេចតេជោ ហ៊ុន សែន ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះបងប្អូនកងទ័ពទាំងអស់។

ឯកឧត្តមបានគូសបញ្ជាក់ថាថ្នាក់ដឹកនាំស្ថាប័នព្រឹទ្ធសភា រដ្ឋសភា និងរាជរដ្ឋាភិបាល តែងតែយកចិត្តទុកដាក់ខ្ពស់បំផុតចំពោះសុខទុក្ខ និងជីវភាពរបស់កងកម្លាំងជួរមុខ។ វត្តមានរបស់យើងនៅទីនេះ គឺជាសក្ខីភាពនៃស្មារតី "ខ្មែរស្រឡាញ់ខ្មែរ ខ្មែរជួយខ្មែរ" ដើម្បីរួមចំណែកជាមួយរាជរដ្ឋាភិបាល ក្នុងការគាំទ្រដល់វីរកងទ័ពដែលបានលះបង់សាច់ស្រស់ឈាមស្រស់ ក្នុងបុព្វហេតុការពារបូរណភាពទឹកដីដ៏សក្ការៈនៃយើង។

អំណោយដែលបាននាំយកទៅប្រគល់ជូនកងទ័ពនាពេលនេះ រួមមាន ស្បៀងអាហារ ម្ហូបក្រៀម សាច់ក្រក ត្រីងៀត ទឹកផ្លែឈើ និងទឹកសុទ្ធ ដែលជាការចូលរួមចំណែកយ៉ាងសំខាន់ក្នុងការសម្រាលការលំបាក និងលើកទឹកចិត្តដល់កងទ័ព។

បន្ទាប់ពីបញ្ចប់ការចែកស្បៀងអាហារ ឯកឧត្តម អ៊ី ឡុង ក៏បានបន្តដំណើរចុះពិនិត្យស្ថានភាពលំនៅឋានរបស់បងប្អូនប្រជាពលរដ្ឋដោយផ្ទាល់ នៅក្នុងភូមិសាស្ត្រឃុំគោករមៀត ស្រុកថ្មពួក ដែលរងផលប៉ះពាល់ពីការឈ្លានពានរបស់ទាហានថៃលើអធិបតេយ្យភាពកម្ពុជានៅតាមព្រំដែន។ ការចុះពិនិត្យនេះ គឺដើម្បីស្វែងយល់ពីតម្រូវការជាក់ស្តែង និងត្រៀមលក្ខណៈជួយសង្គ្រោះ ក៏ដូចជាផ្តល់ភាពកក់ក្តៅដល់ប្រជាពលរដ្ឋឱ្យមានសេចក្តីសុខសាន្ត ក្នុងនាមជាអ្នកតំណាងរាស្ត្រដែលតែងតែនៅកៀកកិតជាមួយម្ចាស់ឆ្នោតគ្រប់កាលៈទេសៈ។

សកម្មភាពរបស់ឯកឧត្តម និងក្រុមការងារ មិនត្រឹមតែជាការផ្តល់ជំនួយសម្ភារប៉ុណ្ណោះទេ ប៉ុន្តែគឺជាការបង្ហាញនូវមហាសាមគ្គីជាតិ រវាងមន្ត្រីសាធារណៈ សប្បុរសជន និងកងកម្លាំងប្រដាប់អាវុធ ដើម្បីធានាថា "សមរភូមិក្រោយ ជួយសមរភូមិមុខ" ក្នុងគោលដៅតែមួយគត់គឺ សន្តិភាព និងឯករាជ្យភាពនៃជាតិមាតុភូមិ៕

ដោយ ឈុន សារ៉ាត