AKP ព្រះសីហនុ ថ្ងៃទី០១ ខែមករា ឆ្នាំ២០២៦-- នាវាទេសចរណ៍បរទេសមួយគ្រឿងមានឈ្មោះ SIRENA បាននាំភ្ញៀវទេសចរបរទេសចម្រុះជាតិសាសន៍ជាង៦០០នាក់ ចូលសុំចត ដើម្បីធ្វើទស្សនកិច្ចនៅព្រះរាជាណាចក្រកម្ពុជា តាមច្រកកំពង់ផែសមុទ្រខេត្តព្រះសីហនុ  ស្របពេលដែលភ្ញៀវទេសចរមកឆ្លងឆ្នាំសកល២០២៥ ចូល២០២៦ នៅតាមបណ្តោយឆ្នេរក្នុងខេត្តព្រះសីហនុ កាលពីយប់ថ្ងៃទី៣១ ខែធ្នូ ឆ្នាំ២០២៥។

មន្ត្រីនគរបាលអន្តោប្រវេសន៍្តច្រកទ្វារអន្តរជាតិកំពង់ផែស្វយ័តក្រុងព្រះសីហនុបានឱ្យដឹងថា នាវាទេសចរណ៍ SIRENA មានសញ្ជាតិ Marshall Island  មានបណ្តោយ ១៨០.៤៥ម៉ែត្រ ទទឹង ២៥.៤៦ម៉ែត្រ និងមានជម្រៅទឹក ៥.៨៣ម៉ែត្រ បាននាំភ្ញៀវទេសចរចម្រុះជាតិសាសន៍ចំនួន ៦៣៣នាក់ ស្រី៣៣៣នាក់ ស្មើនឹង៣៥សញ្ជាតិ  និងមាននាវិក សរុបចំនួន ៣៩៣នាក់ ស្រី ៨៩នាក់ ស្មើនឹង៤១សញ្ជាតិ។ នាវាទេសចរណ៍ SIRENA បានធ្វើដំណើរចាកចេញពីកំពង់ផែប្រទេសវៀតណាម ចូលសំចតនៅកំពង់ផែស្វយ័តក្រុងព្រះសីហនុ នាវេលាម៉ោង៧  ថ្ងៃទី០១ មករា ឆ្នាំ២០២៦ និងមានគម្រោងចាកចេញពីកំពង់ផែស្វយ័តក្រុងព្រះសីហនុ នៅវេលាម៉ោង១៧ ថ្ងៃដដែលឆ្ពោះទៅកាន់កំពង់ផែប្រទេសថៃ។

ភ្ញៀវទេសចរបរទេសដែលធ្វើដំណើរតាមនាវាទេសចរណ៍បរទេស SIRENA ដែលមានសញ្ជាតិច្រើនជាងគេមាន ដូចជា USA  ២៦៩នាក់ Australia ៨១នាក់ ក្រៅពីនោះមានភ្ញៀវទេសចរ សញ្ជាតិផ្សេងៗទៀត។   ភ្ញៀវទេសចរបរទេសចម្រុះជាតិសាសន៍ធ្វើដំណើទស្សនានៅតំបន់មួយចំនួនក្នុងខេត្តព្រះសីហនុ មានដូចជា ភូមិនេសាទទំនប់រលក សង្កាត់លេខ១ ទីប្រជុំជនផ្សារលើ តំបន់មាត់សមុទ្រ រូបសំណាកតោពីរ តំបន់វប្បធម៌មានដូចជា វត្តឥន្ទញ្ញាណ វត្តជោតញ្ញាណ ក្នុងក្រុងព្រះសីហនុ។ ទៅកម្សាន្តតំបន់អភិឌ្ឍ Boy of light រូបសំណាកព្រះថោងនាងនាគ មជ្ឈមណ្ឌលវិបស្សនាធុរៈគិរីនាគវ័ន (វត្តសមាធិ)  សលាបឋមសិក្សា និងអនុវិទ្យាល័យ បិតត្រាំង សង្កាត់រាម ក្រុងកំពង់សោម។

សូមរម្លឹកថា កាលពីថ្ងៃទី២៩ ខែធ្នូ ឆ្នាំ២០២៥  ក៏មាននាវាទេសចរណ៍ DIAMOND PRINCESS នាំភ្ញៀវទេសចរចម្រុះជាតិសាសន៍ ២ ៨៥០នាក់ ចូលចតធ្វើទស្សនកិច្ចព្រះរាជាណាចក្រកម្ពុជា តាមច្រកកំពង់ផែសមុទ្រអន្តរជាតិ ខេត្តព្រះសីហនុ ប្រកបដោយសុវត្ថិភាព៕

ដោយ ងូ សុមុនី