AKP ភ្នំពេញ ថ្ងៃទី០១ ខែមករា ឆ្នាំ២០២៥–លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការជាតិ ក្នុងការធ្វើបច្ចុប្បន្នភាពស្ដីពីការវិវត្តន៍ស្ថានការណ៍ព្រំដែនកម្ពុជា-ថៃ នាព្រឹកថ្ងៃទី១ ខែមករា ឆ្នាំ២០២៦នេះបានគូសបញ្ជាក់ថា អនុវត្តតាមកិច្ចព្រមព្រៀងនៃបទឈប់បាញ់នាពេលកន្លងទៅ រហូតមកដល់ព្រឹកនេះស្ថានការណ៍ជួរមុខគឺបានបន្តភាពស្ងប់ស្ងាត់ ខណៈដែលកម្ពុជា បាន និងកំពុងតាមដានសភាពការណ៍យ៉ាងយកចិត្តទុកដាក់ដើម្បីការការពារបូរណភាពទឹកដី និងការអនុវត្តតាមកិច្ចព្រមព្រៀងនេះបទឈប់បាញ់យ៉ាងពេញលេញ។

លោកជំទាវបានបន្តថា នៅក្នុងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ GBC ដែលបានចុះហត្ថលេខាដោយកម្ពុជា និងថៃកាលពីថ្ងៃទី២៧ ខែធ្នូ ឆ្នាំ២០២៥ ក្នុងវិធានការកាត់បន្ថយភាពតានតឹងត្រង់ចំណុចទី៨ ភាគីទាំងពីរបានឯកភាពគ្នាជៀសវាងការចែកចាយ ព័ត៌មានមិនពិត ឬព័ត៌មានក្លែងក្លាយ ដើម្បីកាត់បន្ថយភាពតានតឹង និងកាត់បន្ថយសាធារណមតិអវិជ្ជ មាន និងលើកកំពស់បរិយាកាសអំណោយផលសម្រាប់កិច្ចសន្ទនាដោយសន្តិវិធី ដោយផ្អែកលើស្មារតី នៃការប្តេជ្ញាចិត្តរបស់កម្ពុជាក្នុងការគោរព និងអនុវត្តតាមលក្ខខណ្ឌនៃបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា ថៃ និងឯកសារពាក់ព័ន្ធផ្សេងៗប្រកបដោយសុឆន្ទៈ និងការទទួលខុសត្រូវខ្ពស់ ដើម្បីចូលរួមក្នុងការអនុវត្តវិធានការខាងលើឱ្យមានប្រសិទ្ធភាពក៏ដូចជាគាំទ្រដល់ លទ្ធផលនៃសេចក្តីប្រកាសរួមឱ្យបានពេញលេញ ពិសេសក្នុងដំណាក់កាលដែលកម្ពុជា និងថៃកំពុង

កសាងទំនុកចិត្តគ្នាដើម្បីឱ្យមានបទឈប់បាញ់ជាអចិន្ត្រៃយ៍ និងមានសន្តិភាពឡើង។

លោកជំទាវ ឧត្តមសេនីយ៍ឯក ម៉ាលី សុជាតា បានបន្ថែមថា ក្រសួងព័ត៌មាននៃព្រះរាជាណាចក្រកម្ពុជា បានចេញសេចក្តីណែនាំបន្ថែមទៀតដល់សាធារណជន និងអ្នកប្រកបអាជីពក្នុងវិស័យព័ត៌មាន និងសោតទស្សន៍ ដែលជាការរួមចំណែកជំរុញជាក់ស្តែងឱ្យមានការអនុវត្តកាន់តែពេញលេញនូវសេចក្តីប្រកាសរួមនេះដើម្បីធ្វើឱ្យបទឈប់បាញ់អចិន្ត្រៃយ៍ក្លាយជាមូលដ្ឋានដ៏រឹងមាំសម្រាប់យន្តការដោះស្រាយ បញ្ហាដោយសន្តិវិធី៕

ដោយ៖ ចាន់ សុភឿន