AKP កំពង់ឆ្នាំង ថ្ងៃទី០១ ខែមករា ឆ្នាំ២០២៦-- ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានចុះសួរសុខទុក្ខក្មួយៗកុមារកំព្រា កុមារភៀសសឹក និងកុមារគ្រួសារកងទ័ពនៅមណ្ឌលកុមារកំព្រា ស្រុកកំពង់ត្រឡាច ខេត្តកំពង់ឆ្នាំង កាលពីថ្ងៃទី៣១ ខែធ្នូ ឆ្នាំ២០២៥ អមដំណើរដោយ លោកប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទារខេត្ត អាជ្ញាធរមូលដ្ឋាន រួមទាំងប្បុរសជនផងដែរ។

ថ្លែងក្នុងឱកាសនោះ ឯកឧត្តម ស៊ុន សុវណ្ណារិទ្ធិ បានពាំនាំនូវការផ្ដាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ប្រមុខរាជរដ្ឋាភិបាល សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ដែលតែងតែយកចិត្តទុកដាក់ដល់កុមារដែលរស់នៅក្នុងមណ្ឌលនេះ ក្នុងនោះក៏មានកុមារគ្រួសារកងទ័ព និងកុមារភៀសសឹក ដែលរងផលប៉ះពាល់ពីការឈ្លានពានពីប្រទេសថៃផងដែរ។ ឱ្យចេះថែទាំសុខភាពអោយបានល្អ ដោយរស់នៅត្រូវមានអនាម័យ ពិសាទឹកដាំឆ្អិន និងបរិភោគអាហាររូបត្ថម្ភអោយបានត្រឹមត្រូវ ព្រមទាំងកម្ចាត់មូសខ្លាតាមរយ:ការរៀបចំសម្ភារក្នុងផ្ទះមណ្ឌលឱ្យមានសណ្ដាប់ធ្នាប់ ធ្វើយ៉ាងណាឱ្យមានពន្លឺចាំងចូលក្នុងផ្ទះបានល្អ លុបបំបាត់ថ្លុក សំបកកំប៉ុង សំបកកង់ កាប់ឆ្ការព្រៃស៊ុបទ្រុបជុំវិញផ្ទះ មណ្ឌលឱ្យបានស្អាត មិនតែប៉ុណ្ណោះ រាល់ការធ្វើដំណើរទៅទីណាកន្លែងណា ទោះជិតឬឆ្ងាយ សូមមានការប្រុងប្រយ័ត្នអោយបានខ្ពស់ដើម្បីចៀសវាងពីការគ្រោះថ្នាក់ផ្សេង ។

ទន្ទឹមនឹងនេះ ឯកឧត្ដមបានបន្តទៀតថា ប្រមុខរាជរដ្ឋាភិបាល សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត តែងតែយកចិត្តទុកដាក់ដល់គ្រួសារកងទ័ព ប្រជាពលរដ្ឋជួបការលំបាក ពលករភៀសសឹក និងកុមារភៀសសឹក កំពុងចាកចេញពីខេត្តជាប់ព្រំដែនកម្ពុជា-ថៃ ដោយសៀមឈ្លានពាន។ ការឱ្យទទួលបាននូវភាពកក់ក្តៅ ទាំងស្នាក់នៅ សម្លៀកបំពាក់ និងការហូបចុក។ ថ្នាក់ដឹកនាំគ្រប់លំដាប់ថ្នាក់ មិនដែលព្រងើយកន្តើយ ឬនៅឆ្ងាយពីបងប្អូនទាំងអស់គ្នានោះទេ គឺតែងនឹករលឹកជានិច្ច ទោះបីមិនបានរស់នៅជាមួយគ្នា ពិតមែនក៏ប៉ុន្តែសុខទុក្ខទាំងឡាយរបស់បងប្អូននិងកុមារទំាងអស់ក៏ជាសុខទុក្ខរបស់ថ្នាក់ដឹកនាំ។

ផ្អែកលើបរិបទនេះ ឯកឧត្ដមអភិបាលខេត្ត លោកជំទាវ លោក លោកស្រី មន្ត្រីអមដំណើរ ក្រុមការងារ បាននាំយកអំណោយចែកជូនដល់កុមារក្មួយៗកុមារកំព្រា កុមារគ្រួសារកងទ័ព កុមារភៀសឹកនិងលោកគ្រូ អ្នកគ្រូ សម្ភារជារួមមាន អង្ករ២០ការ៉ុង មី៥០កេះ  ត្រីខ៥០យួរ តឹកស៊ីអ៊ីវ២០យួរ ទឹកត្រី២០យួរ និងមានថវិកាមួយចំនួនផងដែរ៕

ដោយ បៃ ស៊ីថុន