AKP ភ្នំពេញ ថ្ងៃទី៣១ ខែធ្នូ ឆ្នាំ២០២៥--

ការប្រារព្ធពិធីបុណ្យចូលឆ្នាំថ្មី ឆ្នាំសាកល២០២៦ ​ខាងមុខនេះ គឺជាឱកាសមួយដែលយើងត្រូវតែឆ្លងដោយស្វាហាប់ ដោយស្នាមញញឹម និងប្រកបដោយភាពរឹងមាំ បង្កប់ដោយការអំណត់ និងជឿជាក់ ដើម្បីរក្សាឲ្យបាននូវសន្តិភាព បូរណភាពទឹកដី និងដែនអធិបតេយ្យភាពរបស់យើង។

រយៈពេលជាងកន្លះឆ្នាំ នៃឆ្នាំ២០២៥ យើងបានដឹកដៃគ្នាឆ្លងកាត់ដំណាក់កាលមួយដ៏ជូរចត់ ដោយសារតែសន្តិភាពដែលយើងរកបានដោយលំបាកនៅចុងឆ្នាំ១៩៩៨ បានរងនូវការគំរាមកំហែង ហើយផ្ទុះជាអរិភាព និងការប៉ះទង្គិចបង្ហូរឈាមដល់ទៅ២ ដង ពោលគឺនៅខែកក្កដាម្តង និង ខែធ្នូ ថ្មីៗនេះម្តងទៀត ជាមួយនឹងប្រទេសថៃ។ ការប៉ះទង្គិចចុងក្រោយនេះគឺធ្ងន់ធ្ងរ ដែលនៅក្នុងនោះគ្រាន់តែជនស៊ីវិលដែលបានបាត់បង់ជីវិត មានរហូតដល់ទៅ ៣២​រូប ​របួស៩៥នាក់ និងប្រជាជនភៀសសឹកជាង៦០ ម៉ឺននាក់ ក្រៅពីនោះទ្រព្យសម្បត្តិ លំនៅស្ថាន ហេដ្ឋារចនាសម្ព័ន្ធ សាលារៀន ជាច្រើននៅក្នុងខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កោះកុង និងសៀមរាប ​បានរងនូវការបំផ្លិចបំផ្លាញ។

ក្រោមការខិតខំដឹកនាំ និងគ្រប់គ្រងសភាពការណ៍ ពីសំណាក់រាជរដ្ឋាភិបាល ​និងអាជ្ញាធរជំនាញនានា ក្រោមគោលនយោបាយសន្តិភាព និងសន្តិសហវិជ្ជមាន នៅពេលនេះការប៉ះទង្គិចបង្ហូរឈាមត្រូវបានបញ្ឈប់ ក្រោមកិច្ចព្រមព្រៀងឈប់បាញ់មួយ ដែលចុះហត្ថលេខាកាលពីថ្ងៃទី​២៧ ខែធ្នូ ប៉ុន្តែស្ថានភាព និងអរិភាព នៅតែមានសភាពផុយស្រួយ​ ដែលយើងចាំបាច់ត្រូវតែប្រុងប្រយ័ត្នខ្ពស់។

ជាការពិតយើងមិនអាចបង្វិលពេលវេលាឲ្យថយក្រោយវិញបានទេ នៅពេលដែលនាឡិការចង្អុលម៉ោង១២អាធ្រាតថ្ងៃទី៣១ ខែធ្នូ ឆ្នាំ២០២៥។ ថ្ងៃទី០១ ខែមករា ឆ្នាំ២០២៦ នឹងចូលមកដល់ ដូច្នេះយើងទាំងអស់គ្នាចាំបាច់ត្រូវតែឆ្លងឆ្នាំនេះទាំងអស់គ្នា ប៉ុន្តែនៅក្នុងសា្ថនភាព និងសភាពការណ៍បច្ចុប្បន្នបែបនេះ យើងចាំបាច់ត្រូវតែឆ្លងឆ្នាំនេះ ដោយភាពក្លាហាន ស្នាមញញឹម និងដោយសេចក្តីថ្លៃថ្នូរ ហើយគ្រប់គ្នាមិនអាចធ្វេសប្រហែសបានទេ។

មកដល់ពេលនេះក្រោមគោលនយោបាយសន្តិភាព​ និងសន្តិសហវិជ្ជមាន តម្លៃនៃសន្តិភាពត្រូវតែជាមូលដ្ឋានគ្រឹះ ប៉ុន្តែយើងក៏ចាំបាច់រក្សាឲ្យបាននូវឯករាជ្យភាព បូរណភាពទឹកដី​ ដូច្នេះព្រឹត្តិការណ៍អំណរសប្បាយនានាដែលយើងធ្លាប់រៀបចំ និងឆ្លងកាលពីឆ្នាំចាស់ៗកន្លងទៅ គួរតែជំនួសមកវិញនូវសកម្មភាពដែលបង្ហាញពីសាមគ្គីភាព ឯកភាពជាតិ និងសេចក្តីថ្លៃថ្នូរ។

 ​យើងទាំងអស់គ្នាអាចជួបជុំគ្នារីករាយបាន ប៉ុន្តែគួរតែរីករាយនៅក្នុងស្មារតីជាមហាសាមគ្គីគ្នាជាធ្លុងមួយរវាងកងទ័ព រាជរដ្ឋាភិបាល និងប្រជាជន ដើម្បីការពារនូវបូរណភាពទឹកដីឲ្យគត់មត់។ យើងទាំងអស់គ្នាត្រូវតែឈរដោយរឹងមាំ និងមានភាពបត់បែន ក្នុងការកាពារឯករាជ្យភាព អធិបតេយ្យភាពជាតិ។ យើងទាំងអស់គ្នាត្រូវតែរួបរួមគ្នាជាធ្លុងមួយ ដើម្បីហែលឆ្លងវិបត្តិនានា និងបញ្ហាដែលបានជួបនៅក្នុងឆ្នាំ២០២៥ ហើយបោះជំហានចូលឆ្នាំ២០២៦ ដោយភាពស្វាហាប់ ហើយដោះស្រាយស្ថានភាព និងបញ្ហាដោយការជឿជាក់ និងក្លាហាន ដើម្បីសម្រេចឲ្យបាននូវចក្ខុវិស័យកម្ពុជាឆ្នាំ២០៣០ និង ២០៥០។

នៅពេលនេះ យើងនៅក្នុងស្ថានភាពលំបាក ប៉ុន្តែទោះបីជាយ៉ាងណាក៏ដោយ ប្រសិនបើយើងទាំងអស់គ្នារក្សាបាននូវគោលការណ៍ឯកភាព សាមគ្គីភាព និងជាតិនិយមដែលត្រឹមត្រូវ យើងពិតជាអាចនឹងឆ្លងឆ្នាំចាស់ ហើយចូលឆ្នាំថ្មីដោយជំហានមួយច្បាស់លាស់ និងរឹងមាំ​។ យើងទាំងអស់គ្នាត្រូវតែញញឹម ហើយកុំបាត់ម្ចាស់ការ យើងត្រូវតែញញឹមដោយភាពជឿជាក់។ ស្នាមញញឹមដែលមានឫសគល់នៅក្នុងការអត់ធ្មត់បង្ហាញពីភាពចាស់ទុំ។ ស្នាមញញឹមដែលមានមូលដ្ឋានលើទំនុកចិត្ត ឆ្លុះបញ្ចាំងពីជំនឿលើច្បាប់អន្តរជាតិ ការទូត និងមនសិការមនុស្សជាតិរួមរបស់សហគមន៍ពិភពលោក។

សរុបទៅ រាល់ឆ្នាំនៅពេលដែលនាឡិការោទ៍នៅពាក់កណ្តាលអធ្រាត្រ យើងរីករាយជាមួយនឹងការបាញ់កាំជ្រួច រីករាយនឹងការគយគន់ភ្លើងពណ៌ រីករាយនឹងការជួបជុំ រីករាយនឹងកម្មវិធីសប្បាយៗ ប៉ុន្តែព្រឹត្តិការណ៍ឆ្លងឆ្នាំពេលនេះ សូមប្តូរមកជាការជួបជុំឆ្លងឆ្នាំដោយស្នាមញញឹម ជាមហាសាមគ្គីគ្រួសារខ្មែរ ជាស្នាមញញឹមនៃការឯកភាពជាតិ ស្នាមញញឹមនៃការពង្រឹងការជឿជាក់ ស្នាមញញឹមនៃភាពអត់ធ្មត់ ហើយជាស្នាមញញឹមបញ្ជាក់ពីការត្រៀមខ្លួននៅក្នុងការឆ្លងកាត់នូវអ្វីដែលនឹងកើតឡើងគ្រប់យ៉ាងនៅក្នុងឆ្នាំ២០២៦។ សូមជូនពរឆ្នាំថ្មី !

AKP