AKP ព្រះសីហនុ ថ្ងៃទី៣១ ខែធ្នូ ឆ្នាំ២០២៥--

ឯកឧត្តម ម៉ាង ស៊ីណេត អភិបាលនៃគណ: អភិបាលខេត្តព្រះសីហនុ នារសៀលថ្ងៃពុធ ទី៣១ ខែធ្នូ ឆ្នាំ២០២៥ បានអញ្ជើញដឹកនាំមន្ត្រី និងអាជ្ញាធរស្រុក សួរសុខទុក្ខវីរកងទ័ពជួមុខឈរជើងនៅសមរភូមិ តាមាន់ ទិសខេត្តឧត្តរមានជ័យ ដែលពុលផ្សែងពុលកាលពីថ្ងៃទី២២ ខែធ្នូ ឆ្នាំ២០២៥ កន្លងមក បច្ចុប្បន្នកំពុងសម្រាកព្យាបាលនៅបន្ទប់ព្យាបាលជំងឺ អ៊ី វិទូ មុខផ្សារវាលរេញ ឃុំវាលរេញ ស្រុកព្រៃនប់ ខេត្តព្រះសីហនុ។

វីរកងទ័ពជួមុខឈ្មោះ មន បូរី អាយុ អាយុ ២៣ឆ្នាំ អត្តលេខ២៧០៣៧៦ ជាសមាជិកនៅក្នុងអង្គភាពវរសេនាតូចលេខ ៤៤២ ឈរជើងនៅសមរភូមិតាមាន់ ទិសខេត្តឧត្តរមាន ជ័យ ត្រូវបានពុលផ្សែងពុលកាលពីថ្ងៃទី២២ ខែធ្នូ ឆ្នាំ២០២៥  ហើយត្រូវបានលោកមេបញ្ជាការបញ្ជូនមកសម្រាកព្យាបាលនៅមន្ទីរពេទ្យបង្អែក ស្រុកក្រឡាញ់។ វីរកងទ័ពបានចេញពីពេទ្យបង្អែក ស្រុកក្រឡាញ់កាលពីថ្ងៃទី២៤ ខែធ្នូ បន្ទាប់មកសម្រាកនៅប៉ៃ លិន ១យប់។ ហើយវីរកងទ័ពជួមុខ មន បូរី ត្រូវបានមកដល់ស្រុកកំណើត គឺឃុំវាលរេញ ស្រុកព្រៃនប់នៅវេលាម៉ោង ១៦ល្ងាច ថ្ងៃទី២៦ ខែធ្នូ ឆ្នាំ២០២៥ បច្ចុប្បន្នកំពុងសម្រាកព្យាបាលនៅបន្ទប់ព្យាបាលជំងឺ អ៊ី វិទូ ខាងមុខផ្សាររេញ ស្រុកព្រៃនប់។ លោកវីរកងទ័ពជួមុខ មន បូរី មានទីលំនៅស្ថិតនៅភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ។

ក្នុងឱកាសដឹកនាំមន្ត្រី និងអាជ្ញាធរស្រុកចុះសួរសុខទុក្ខវីរកងទ័ពជួមុខ ឯកឧត្តម ម៉ាង ស៊ីណេត អភិបាលខេត្តព្រះសីហនុ ក៏បានធ្វើការសំណេះសំណាលសួរសុខទុក្ខដល់វីរកងទ័ពរបស់យើង ជាពិសេសចង់ដឹងអំពីសុខភាព និងជីវភាពរស់នៅក្នុងអង្គភាព ក្នុងនាមរដ្ឋបាលខេត្ត ប្រជាពលរដ្ឋខេត្តព្រះសីហនុ សមភូមិក្រោយមានការយកចិត្តទុកដាក់អំពីសុខទុក្ខវីរកងទ័ពរបស់យើងដែលកំពុងឈរជើងនៅតាមខ្សែបន្ទាត់ព្រំដែនកម្ពុជា-ថៃ ក្នុងកិច្ចការការពារបូរណភាពទឹកដី ការពារជាតិ មាតុភូមិកម្ពុជា មិនឱ្យសត្រូវចូលមកឈ្លានពានបានឡើយ។ នេះជាវីរភាពអង់អាចក្លាហានរបស់បងប្អូនវីរកងទ័ពរបស់យើង ក្នុងនាមសមភូមិក្រោយបានយកចិត្តទុកដាក់ជាប់ជាប្រចាំចំពោះវីរកងទ័ពជួមុខ ក៏ដូចជាជនភៀសសឹករបស់យើងដែលកំពុងស្នាក់នៅតាមមណ្ឌលសុវត្ថិភាពនានានៅតាមបណ្តាខេត្តទាំង៧។ ទន្ទឹមនោះរដ្ឋបាលខេត្តព្រះសីហនុក៏បាននាំយកស្បៀងអាហារ គ្រឿងឧបភោគ បរិភោគ សម្ភារប្រើប្រាស់ ថ្នាំពេទ្យ និងថវិកាបញ្ជូនទៅកាន់រដ្ឋបាលខេត្តទាំង៧ និងវីរកងទ័ពដែលកំពុងឈរជើងនៅតាមគោលដៅផងដែរ។

ឯកឧត្តម អភិបាលខេត្ត ក៏បានធ្វើការជូនពរឱ្យវីរកងទ័ព មន បូរី ឆាប់ជាសះស្បើយពីផ្សែងពុល បានវិលត្រឡប់ទៅកាន់អង្គភាពវិញ ក្នុងបុព្វហេតុការពារទឹកដី ការពារប្រជាពលរដ្ឋ ជាតិ មាតុភូមិកម្ពុជា នៅពេលខាងមុខ ព្រមទាំងជូនពរដល់វីរកងទ័ពជួមុខទាំងអស់ដែលកំពុងឈរជើងនៅតាមគោលដៅផ្សេងៗគ្នា សូមមានសុខភាពល្អគ្រប់គ្នា និងទទួលបានជោគជ័យក្នុងបុព្វហេតុជាតិ មាតុភូមិ  និងប្រជាពលរដ្ឋកម្ពុជា។

ជាមួយគ្នានោះដែរ ឯកឧត្តមអភិបាលខេត្តព្រះសីហនុក៏បាននាំយកអំណោយឧបត្ថម្ភជូនវីរកងទ័ព មន បូរី មានដូចជា អង្ករ ១០០គីឡូក្រាម មី ១០កេស ត្រីខ ២យួរ ទឹកស៊ីអ៊ីវ ២យួរ ទឹកត្រី ២យួរ ភេសជ្ជ: ៤កេស ទឹកសុទ្ធ១០កេស នំចម្រុះ ៥ថង់ ប្រហុក ១០ក្រឡ ឆៃប៉ូវ ១០ក្រឡ និងថវិកា ៥០ម៉ឺនរៀល៕

ដោយ ងូ សុមុនី