AKP កំពង់ឆ្នាំង ថ្ងៃទី២០ ខែវិច្ឆិកា ឆ្នាំ២០២៥-- ឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង បានអញ្ជើញផ្សព្វផ្សាយសភាពការណ៍ថ្មីៗ និងពង្រឹងតួនាទី ភារកិច្ចដល់យោធិនរបស់អង្គភាព ដោយពិធីនេះបានរៀបចំនៅទីបញ្ជាការតំបន់ប្រតិបត្តិការសឹករងកំពង់ឆ្នាំងនាថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥។

ឧត្តមសេនីយ៍ត្រី អ៊ុំ សុភា បានផ្សព្វផ្សាយសភាពការណ៍ថ្មីៗ ដែលកើតមានឡើង ពិសេសសភាពការណ៍ព្រំដែនកម្ពុជា-ថៃ និងបានបញ្ជាក់ជូនអំពីកិច្ចខិតខំប្រឹងប្រែងអត់ធ្មត់គ្រប់បែបយ៉ាង និងភាពស្ងាត់ តែមិនស្ងៀមរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីបញ្ចៀសនូវសង្គ្រាម ដែលនាំឱ្យមានការបាត់បង់ ទាំងជីវិតកងទ័ព ប្រជាជនស៊ីវិល និងបង្កវិនាសកម្មយ៉ាងធ្ងន់ធ្ងរដល់ប្រទេសជាតិ។

ក្នុងឱកាសនោះ ឧត្តមសេនីយ៍ត្រី អ៊ុំ សុភា បានថ្លែងអំណរគុណចំពោះនាយទាហាន នាយទាហានរង និងពលទាហានទាំងអស់ ដែលបានខិតខំបំពេញការងារយ៉ាងល្អប្រសើរ តាមបទបញ្ជារបស់ថ្នាក់ដឹកនាំគ្រប់លំដាប់ថ្នាក់ ក្នុងការគ្រប់គ្រងកងកម្លាំង មធ្យោបាយ និងគ្រឿងបំពាក់ ក្នុងភារកិច្ចការពារបូរណភាពទឹកដី និង បានចូលរួមសហការយ៉ាងសកម្មជាមួយអាជ្ញាធរមូលដ្ឋានគ្រប់លំដាប់ថ្នាក់ ក្នុងការអនុវត្តនូវគោលនយោបាយភូមិ ឃុំ សង្កាត់ មានសុវត្ថិភាព ព្រមទាំងជាកម្លាំងស្នូលក្នុងការសហការបង្ក្រាបបទល្មើសនេសាទ នៅក្នុងភូមិសាស្ត្រខេត្ត ទទួលបានលទ្ធផលល្អប្រសើរ ដែលធ្វើឱ្យផលត្រីសំបូរឡើងវិញ ធ្វើឱ្យប្រជាពលរដ្ឋមានការសប្បាយរីករាយ អបអរសារទរយ៉ាងខ្លាំង ។ 

ឯកឧត្តមមេបញ្ជាការបានណែនាំដល់គ្រប់បណ្តាកងឯកភាព ត្រូវបន្តពង្រឹងតួនាទី ភារកិច្ចរបស់ខ្លួន និងបន្តសកម្មភាពការងារបង្ក្រាបបទល្មើសនេសាទ ឱ្យមានប្រសិទ្ធភាព ដើម្បីសង្គមជាតិ និងសម្រាប់បម្រើឱ្យប្រជាជនកម្ពុជានៅទូទាំងប្រទេស៕

ដោយ សំ សាម៉ន (ប្រភព៖ បញ្ជាការកងទ័ពជើងគោក)