AKP ភ្នំពេញ ថ្ងៃទី០៩ ខែមិថុនា ឆ្នាំ២០២៦ -- ក្រសួងអប់រំ យុវជន និងកីឡា និងក្រុមហ៊ុន Huawei Technologies (Cambodia) Co., Ltd. កាលពីថ្ងៃទី០៨ ខែមិថុនា ឆ្នាំ២០២៦ បានចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការគាំទ្រការអនុវត្តយុទ្ធសាស្ត្រអប់រំឌីជីថលសម្រាប់សាលារៀននៅកម្ពុជា។

ការចុះហត្ថលេខានេះធ្វើឡើងរវាង ឯកឧត្តមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា និងលោក Dilan Huang អនុប្រធានក្រុមហ៊ុន Huawei ប្រចាំតំបន់អាស៊ីអាគ្នេយ៍ ក្នុងគោលបំណងពង្រឹងកិច្ចសហប្រតិបត្តិការលើការអភិវឌ្ឍហេដ្ឋារចនាសម្ព័ន្ធឌីជីថល ការកសាងសមត្ថភាពធនធានមនុស្ស ការលើកកម្ពស់ជំនាញ ICT និង AI ការអនុវត្តដំណោះស្រាយអប់រំឆ្លាតវៃ និងការពង្រឹងប្រព័ន្ធគ្រប់គ្រងទិន្នន័យក្នុងវិស័យអប់រំស្របតាមទិសដៅអភិវឌ្ឍវិស័យអប់រំរបស់កម្ពុជា។ តាមរយៈកិច្ចសហការនេះភាគីទាំងពីររំពឹងថានឹងរួមចំណែកជំរុញការផ្លាស់ប្ដូរឌីជីថលក្នុងវិស័យអប់រំ និងពង្រីកឱកាសសិក្សាប្រកបដោយគុណភាព និងបរិយាបន្នសម្រាប់សិស្សានុសិស្សកម្ពុជា៕