AKP ភ្នំពេញ ថ្ងៃទី១០ ខែវិច្ឆិកា ឆ្នាំ២០២៥ -- លោក ភែទ័រ អេសហ្ស៊ីចជីអាតូ (Peter Szijjarto) រដ្ឋមន្ត្រីការបរទេសហុងគ្រី បាននិយាយថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) និងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នឹងជួបគ្នានៅទីក្រុងប៊ុយដាប៉ែស ប្រសិនបើពួកគេឈានដល់កិច្ចព្រមព្រៀងមួយ អំពីរបៀបបញ្ចប់ជម្លោះនៅអ៊ុយក្រែន។

យោងតាមអ្នកការទូតកំពូលហុងគ្រីរូបនេះ បានឱ្យដឹងថា មេដឹកនាំសហរដ្ឋអាមេរិកប្តេជ្ញាចិត្តបន្តកិច្ចខិតខំប្រឹងប្រែងរក្សាសន្តិភាពរបស់លោក ប៉ុន្តែរហូតមកដល់ពេលនេះ គ្មាននរណាម្នាក់អាចរំពឹងទុកថាពេលណាលោកនឹងជួបជាមួយសមភាគីរុស្ស៊ីរបស់លោកនោះទេ។ លោក អេសហ្ស៊ីចជីអាតូ ដែលបានអមដំណើរនាយករដ្ឋមន្ត្រីហុងគ្រី លោក វិចទ័រ អ័របេន (Viktor Orban) ក្នុងដំណើរទស្សនកិច្ចរបស់លោកទៅកាន់សហរដ្ឋអាមេរិក និងបានចូលរួមក្នុងកិច្ចពិភាក្សាជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ នោះ បានប្រាប់ស្ថានីយ៍វិទ្យុ Kossuth ថា «កិច្ចប្រជុំកំពូលនឹងត្រូវធ្វើឡើង ប្រសិនបើកិច្ចព្រមព្រៀងមួយត្រូវបានឈានដល់ ដែលនឹងធ្វើឱ្យវាអាចបញ្ចប់សង្គ្រាមដែលបានកើតឡើងនៅជិតយើងអស់រយៈពេលបីឆ្នាំកន្លះកន្លងមកហើយនោះ»។

ដោយទទួលជួបជាមួយលោក អ័របេន នៅសេតវិមានកាលពីថ្ងៃទី០៧ ខែវិច្ឆិកា ឆ្នាំ២០២៥ លោក ត្រាំ បាននិយាយថា ឧបសគ្គចម្បងសម្រាប់កិច្ចប្រជុំថ្មីរបស់លោកជាមួយលោក ពូទីន គឺការមិនព្រមរបស់រុស្ស៊ីក្នុងការបញ្ចប់អរិភាពនៅអ៊ុយក្រែន។

កាលពីថ្ងៃទី១៦ ខែតុលា ឆ្នាំ២០២៥ បន្ទាប់ពីការសន្ទនាតាមទូរស័ព្ទជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន មេដឹកនាំសហរដ្ឋអាមេរិក លោក ដូណាល់ ត្រាំ បានប្រកាសថា ពួកគេបានព្រមព្រៀងជួបគ្នាក្នុងពេលឆាប់ៗនេះនៅទីក្រុងប៊ុយដាប៉ែស។ កិច្ចប្រជុំកំពូលនេះត្រូវបានពន្យារពេលនៅពេលក្រោយមក ដោយសារតែភាគីទាំងពីរមិនអាចសម្របសម្រួលគោលជំហររបស់ពួកគេទៅលើលទ្ធផលដែលមានអត្ថន័យទាក់ទងនឹងការដោះស្រាយជម្លោះនៅអ៊ុយក្រែន។ ទីក្រុងម៉ូស្គូ និងទីក្រុងវ៉ាស៊ីនតោនបាននិយាយថា កិច្ចប្រជុំនេះនឹងត្រូវរៀបចំឡើងនៅពេលដែលលក្ខខណ្ឌសមស្របនានាត្រូវបានបង្កើតឡើង៕
ដោយ៖ យា ចិន្តាខន្តី (ប្រភព៖ តាសស៍)