AKP ភ្នំពេញ ថ្ងៃទី៣១ ខែតុលា ឆ្នាំ២០២៥--

ខណៈពេលដែលពិភពលោកកាន់តែរីកចម្រើន យុវជនភាគច្រើនបានមើលរំលងពីសារៈសំខាន់នៃការធានារ៉ាប់រង ពិសេសការធានារ៉ាប់រងអាយុជីវិត។ យោងតាមអត្ថបទ “Importance of Life Insurance for Youth" ដែលចេញផ្សាយលើគេហទំព័រ Bajaj Finserv យុវជនភាគច្រើនតែងតែមានការភ័ន្តច្រឡំលើទស្សនៈ “យុវជនដែលមានសុខភាពល្អ មិនចាំបាច់មានធានារ៉ាប់រងអាយុជីវិត” ឡើយ ជាហេតុធ្វើឱ្យមានការយល់ច្រឡំថាមានតែមនុស្សចាស់ប៉ុណ្ណោះដែលត្រូវការការធានារ៉ាប់រងអាយុជីវិត ប៉ុន្តែជាក់ស្តែងការធានារ៉ាប់រងអាយុជីវិតសម្រាប់យុវជនក៏ជាផ្នែកមួយយ៉ាងសំខាន់ដែលមិនគួរមើលរំលងនោះទេ ទោះបីពួកគេយល់ឃើញថាខ្លួនមានសុខភាពល្អ និងមានកម្រិតហានិភ័យទាបក៏ដោយ។

ចំពោះសំណួរដែលថា «ហេតុអ្វីបានជាយុវជនគួរចាប់ផ្តើមមានធានារ៉ាប់រងអាយុជីវិត?»។ បើតាមការលើកឡើងរបស់និយ័តករធានារ៉ាប់រងកម្ពុជាថា អត្ថប្រយោជន៍នៃការធានារ៉ាប់រងអាយុជីវិតសម្រាប់យុវជនមានច្រើន ដូចជា ការទទួលបានកម្រិតបុព្វលាភធានារ៉ាប់រងទាប៖ យុវជននឹងទទួលបានកម្រិតបុព្វលាភធានារ៉ាប់រងទាបជាងមនុស្សចាស់ ដែលធ្វើឱ្យការទិញផលិតផលធានារ៉ាប់រងអាយុជីវិតកាន់តែមានតម្លៃសមរម្យ។ ការសន្សំ៖ ការធានារ៉ាប់រងអាយុជីវិតមួយចំនួនមានលក្ខណៈជាការសន្សំរយៈពេលវែងដែលអាចផ្តល់នូវអត្ថប្រយោជន៍ផ្នែកហិរញ្ញវត្ថុ។ ការទទួលបានការការពារពីការជាប់បំណុល៖ តាមរយៈការទិញផលិតផលធានារ៉ាប់រងអាយុជីវិតនៅវ័យក្មេង យុវជន ឬម្ចាស់បណ្ណសន្យារ៉ាប់រងនឹងទទួលបានសំណងហិរញ្ញវត្ថុក្នុងការដោះស្រាយបញ្ហា ឬបំណុល នៅពេលមានហានិភ័យកើតឡើងលើពួកគេ។ ការមានចំណេះដឹងផ្នែកហិរញ្ញវត្ថុ៖ ការយល់ដឹងអំពីការធានារ៉ាប់រងអាយុជីវិតនៅវ័យក្មេង ជាកត្តាធ្វើឱ្យយុវជនមានចំណេះដឹងផ្នែកហិរញ្ញវត្ថុ និងមានទំនួលខុសត្រូវខ្ពស់ក្នុងការគ្រប់គ្រងហិរញ្ញវត្ថុ។ ការមានសន្តិភាពផ្លូវចិត្ត និងផែនការអនាគតរយៈពេលវែង៖ តាមរយៈការទិញផលិតផលធានារ៉ាប់រងអាយុជីវិតនៅវ័យក្មេង យុវជនចាប់ផ្តើមមានផែនការអនាគតច្បាស់លាស់ដែលអាចបំពេញតម្រូវការផ្ទាល់ខ្លួន និងគ្រួសារ។

និយ័តករធានារ៉ាប់រងកម្ពុជាបានលើកឡើងពី៖ ១. ករណីសិក្សាអំពីយុវជន និងធានារ៉ាប់រងអាយុជីវិតនៅប្រទេសឥណ្ឌា៖ តាមការស្រាវជ្រាវរបស់លោកស្រីបណ្ឌិត Archana Kanungo អ្នកស្រាវជ្រាវ និងជាសាស្ត្រាចារ្យមួយរូបដែលបានធ្វើការស្ទង់មតិលើករណីសិក្សាអំពីការធានារ៉ាប់រងអាយុជីវិតរបស់ក្រុមយុវជនចំនួន១១៤នាក់នៅទីក្រុង Bhubaneswar ប្រទេសឥណ្ឌា។ លទ្ធផលនៃការសិក្សាបង្ហាញថា យុវជនភាគច្រើនទិញផលិតផលធានារ៉ាប់រងអាយុជីវិតសម្រាប់ផែនការហិរញ្ញវត្ថុរយៈពេលខ្លី និងការវិនិយោគក្នុងរយៈពេលប្រហែល៥ឆ្នាំ ជាជាងផែនការហិរញ្ញវត្ថុរយៈពេលវែង។ ក្នុងនោះក្រុមយុវជនជឿថាការ ដែលមានធានារ៉ាប់រងក្នុងរយៈពេលខ្លីពិតជាអាចការពារពួកគេបាន នេះបង្ហាញពីកង្វះការយល់ដឹងផ្នែកហិរញ្ញវត្ថុ និងការគ្រប់គ្រងផែនការហិរញ្ញវត្ថុមិនបានល្អ។ ២. ករណីសិក្សាអំពីយុវជន និងធានារ៉ាប់រងអាយុជីវិតនៅសហរដ្ឋអាម៉េរិក៖ នៅសហរដ្ឋអាម៉េរិកក្រុមមនុស្សពេញវ័យមានការយល់ដឹងខ្ពស់ពីការធានារ៉ាប់រងអាយុជីវិត ប៉ុន្តែពួកគេនៅតែយល់ថាការធានារ៉ាប់រងអាយុជីវិតមានតម្លៃខ្ពស់ ហើយការពន្យារពេលនៃការទិញធានារ៉ាប់រងអាយុជីវិតគឺដោយសារចង់ផ្តោតលើការកសាងគ្រួសារជាដើម។ ក្នុងឆ្នាំ២០២៣ យោងតាមគេហទំព័រ LIMRA បានបង្ហាញថា នៅសហរដ្ឋអាម៉េរិកក្រុមមនុស្សពេញវ័យចំនួន ៥២% នៃអ្នកមាន និងមិនមានធានារ៉ាប់រងអាយុជីវិត ក្នុងនោះមានចំនួន៤១% ដែលគិតថាមិនចង់ទិញធានារ៉ាប់រងអាយុជីវិត ដោយសារមិនមានធនធានគ្រប់គ្រាន់។

ជារួម ករណីសិក្សាទាំងពីរខាងលើបានបង្ហាញថា នៅប្រទេសឥណ្ឌាការយល់ដឹងផ្នែកហិរញ្ញវត្ថុរបស់ក្រុមយុវជននៅមានកម្រិតនៅឡើយ ខណៈពេលដែលនៅសហរដ្ឋអាម៉េរិកក្រុមយុវជនមានការព្រួយបារម្ភអំពីតម្លៃនៃការទិញធានារ៉ាប់រងអាយុជីវិត និងគិតគូរពីការកសាងគ្រួសារ។ ដូចនេះ ករណីសិក្សាទាំងពីរខាងលើជាមេរៀនដ៏ល្អ សម្រាប់យុវជនប្រើប្រាស់ជាជំនួយក្នុងការស្វែងយល់អំពីការទទួលបានការធានារ៉ាប់រងអាយុជីវិតទាន់ពេលវេលា និងការគ្រប់គ្រងហិរញ្ញវត្ថុឱ្យកាន់តែប្រសើរឡើង៕

ដោយ៖ ចាន់ សុភឿន (ប្រភព៖ និយ័តករធានារ៉ាប់រងកម្ពុជា)