AKP ភ្នំពេញ ថ្ងៃទី០៩ ខែតុលា ឆ្នាំ២០២៥-- ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី០៨ ខែតុលា ឆ្នាំ២០២៥ បានទទួលអំណោយជានិមិត្តរូបនូវអគារសិក្សា១ខ្នង៦បន្ទប់ ព្រមទាំងសម្ភារសិក្សាមួយចំនួនពីក្រុមហ៊ុន Danone សម្រាប់សាលារៀនរងផលប៉ះពាល់នៅខេត្តឧត្តរមានជ័យ ដោយក្នុងឱកាសនេះលោក VAN LEEUWEN Maarten នាយកគ្រប់គ្រងប្រចាំប្រទេសនៃក្រុមហ៊ុន Danone កម្ពុជា បានថ្លែងថា អគារ និងសម្ភារសិក្សាតម្លៃ ១១០,០០០ដុល្លារអាមេរិក ដែលក្រុមហ៊ុនរបស់លោកបានផ្តល់ជូននាពេលនេះ គឺជានិមិត្តរូបនៃក្តីសង្ឃឹម ភាពអត់ធ្មត់ និងឱកាសសម្រាប់សិស្សានុសិស្សពាន់នាក់។

លោកបានបន្តថា កុមារកម្ពុជាទាំងអស់គួរតែទទួលបាននូវអាហារូបត្ថម្ភដែលត្រឹមត្រូវ និងការអប់រំដែលមានគុណភាពខ្ពស់ ព្រោះថាសុខភាពល្អអាចនាំមកនូវលទ្ធផលសិក្សាល្អ ដោយលោកបានគូសបញ្ជាក់នូវការប្តេជ្ញាចិត្តក្នុងការបន្តចូលរួមគាំទ្រកុមារ និងគ្រួសារកម្ពុជាតាមរយៈគំនិតផ្តួចផ្តើមសង្គម និងសេដ្ឋកិច្ចជាច្រើនទៀតនាពេលអនាគត។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះការជួយគាំទ្ររបស់ក្រុមហ៊ុន Danone ក្នុងការលើកកម្ពស់សុខុមាលភាពកុមារ និងគ្រួសារកម្ពុជា ដែលនេះជាការចូលរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្សឱ្យកាន់តែរឹងមាំ ឆ្ពោះទៅសម្រេចចក្ខុវិស័យអភិវឌ្ឍន៍សេដ្ឋកិច្ចសង្គមជាតិប្រកបដោយចីរភាព។

ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងថា ចាប់តាំងពីកើតមានការប៉ះទង្គិចនៅព្រំដែនមកក្រសួងអប់រំ យុវជន និងកីឡា បានចុះទៅពិនិត្យទីតាំងសាលារៀនទាំង៧ ដែលរងការខូចខាតក្នុងខេត្តព្រះវិហារ និងឧត្តរមានជ័យ ដោយបានជួបជាមួយនាយកសាលា លោកគ្រូ អ្នកគ្រូ និងបន្តតាមដានស្ថានភាពសាលារៀនយ៉ាងយកចិត្តទុកដាក់ ព្រមទាំងជួយគាំទ្រ លើកទឹកចិត្តដល់លោកគ្រូ អ្នកគ្រូ សិស្សានុសិស្ស និងមាតាបិតា តាមរយៈការបន្តគាំទ្រជាសម្ភារប្រើប្រាស់ចាំបាច់សម្រាប់ការរស់នៅទីសុវត្ថិភាព និងសម្ភារជំនួយដល់ការរៀន និងបង្រៀន។

សូមបញ្ជាក់ថា តាមរយៈគំនិតផ្តួចផ្តើមគាំទ្រដល់សេដ្ឋកិច្ច និងសង្គម ក្រុមហ៊ុន Danone បានបរិច្ចាគជាទឹកប្រាក់សុរបប្រមាណ ២៧៥.០០០ដុល្លារអាម៉េរិកដល់ក្រុមគ្រួសារជនភៀសសឹក និងកុមារប្រមាណ ១៥០០គ្រួសារ ក្នុងកិច្ចសហប្រតិបត្តិការជាមួយក្រសួងអប់រំ យុវជន និងកីឡា កាកបាទក្រហមកម្ពុជា អង្គការមូលនិធិកុមារកម្ពុជា (CCF) និងសមាគមគ្រូពេទ្យស្មគ្រ័ចិត្តយុវជនសម្តេចតេជោ (TYDA) តាមរយៈបេសកកម្ម ដូចជា៖ ១. គាំទ្រដល់ការសាងសង់សាលារៀនដែលរងផលប៉ះពាល់នៅខេត្តឧត្តរមានជ័យឡើងវិញ។ ២. ផ្តល់ជូនជាអាហារូបត្ថម្ភ  គ្រឿងឧបភោគ បរិភោគ ទឹកពិសា និងសម្ភារប្រើប្រាស់ចាំបាច់ប្រចាំថ្ងៃ និង ៣. សម្ភារសិក្សាសម្រាប់កុមារក្នុងខេត្តព្រះវិហារ និងឧត្តរមានជ័យ៕

ដោយ៖ ចាន់ សុភឿន (ប្រភព៖ ក្រសួងអប់រំ)