AKP កំពង់ចាម ថ្ងៃទី០៩ ខែតុលា ឆ្នាំ២០២៥-- ប្រជាពលរដ្ឋចំនួន៥៤គ្រួសារ ក្នុងស្រុកកំពង់សៀម ខេត្តកំពង់ចាម ដែលរងផលប៉ះពាល់ដោយសារ គ្រោះទឹកជំនន់ទឹកភ្លៀង និងទឹកទន្លេបានទទួលអំណោយពីកាកបាទក្រហមកម្ពុជាខេត្តកំពង់ចាម នៅព្រឹកថ្ងៃទី០៩ ខែតុលា ឆ្នាំ២០២៥ ក្រោមអធិបតីភាពឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្តកំពង់ចាម។

ថ្លែងក្នុងពិធីសំណេះដំណាលជាមួយបងប្អូនប្រជាពលរដ្ឋ ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តកំពង់ចាម បានពាំនាំនូវការសាកសួរសុខទុក្ខពីសំណាក់ប្រមុខដឹកនាំរដ្ឋាភិបាល ដែលជានិច្ចកាលតែងតែចង់ដឹងអំពីសុខទុក្ខយ៉ាងខ្លាំងចំពោះបងប្អូនប្រជាពលរដ្ឋជនរួមជាតិរបស់ខ្លួន។ ប្រមុខថ្នាក់ដឹកនាំយើងតែងបានណែនាំដល់អាជ្ញាធរនៅតាមមូលដ្ឋានរបស់ខ្លួនត្រូវតែតាមដាន ជាប្រចាំនិងមើលអំពីសុខទុក្ខរបស់ប្រជាពលរដ្ឋរបស់ខ្លួននៅក្នុងមូលដ្ឋាន ជាពិសេស ចំពោះពលរដ្ឋរងគ្រោះ និងងាយ រងគ្រោះ ត្រូវតែចុះជួបនិងជួយសម្រួលដល់ការលំបាក ដល់ពួកគាត់ដោយឈរលើគោលការណ៍គ្រឹះ ទីណាពលរដ្ឋជួបការលំបាកកាកបាទក្រហមត្រូវតែចុះជួយ ដោយមិនរើសអើង ពូជសាសន៍ និន្នាការណាឡើយ។

ឯកឧត្តមអភិបាលខេត្តក៏លើកឡើងថា អំណោយនេះគឺជាការគិតគូរខ្ពស់ពីសំណាក់ប្រមុខដឹកនាំ ប្រទេសយើង ចំពោះបងប្អូនប្រជាពលរដ្ឋ ដែលជួបបញ្ហាប្រឈមអ្វីមួយគឺ បានណែនាំដល់អាជ្ញាធរ ត្រូវតែ ចុះជួបដោយផ្ទាល់ និងសួរសុខទុក្ខ។ សូមបងប្អូនប្រជាពលរដ្ឋទាំងអស់នាំគ្នា ចូលរួមថែទាំសុខភាពរបស់ខ្លួនឲ្យបានល្អ ដោយប្រកាន់ខ្ជាប់នូវស្អាតបីប្រការ គឺហូបស្អាត ផឹកស្អាត និងរស់នៅស្អាត។សូមបងប្អូនត្រៀមលក្ខណៈក្នុងការ ប្រកបការងារ កសិកម្ម ដាំដំណាំ ឡើងវិញនៅពេល ទឹកស្រក សម្រាប់ទ្រទ្រង់ជីវភាពរស់នៅរបស់ខ្លួន៕

ដោយ ឆាយ ម៉ុត