AKP ភ្នំពេញ ថ្ងៃទី០៩ ខែតុលា ឆ្នាំ២០២៥-- ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបន្តដឹកនាំក្រុមការងារជំនាញ សហការជាមួយអាជ្ញាធរមូលដ្ឋាន អញ្ជើញចុះជួបសំណេះសំណាល និងពិនិត្យការងារបង្កបង្កើនផលរបស់ប្រជាកសិករ និងវាយតម្លៃផលប៉ះពាល់ និងការខូចខាតដោយទឹកជំនន់ ធ្វើឡើងនៅក្រុងស្ទឹងត្រែង ស្រុកសៀមបូក និងស្រុកថាឡាបរិវ៉ាត់ ក្នុងខេត្តស្ទឹងត្រែង នារសៀលថ្ងៃទី០៨ ខែតុលា ឆ្នាំ២០២៥។

នាឱកាសនោះ ឯកឧត្តម តូច ប៊ុនហួរ និងក្រុមការងារ បានចុះជួបជាមួយ៖ ១- សមាជិកសហគមន៍កសិកម្មអូរពងមាន់ (ភូមិរាជានុកូល១ សង្កាត់ស្ទឹងត្រែង ក្រុងស្ទឹងត្រែង) ដើម្បីស្វែងយល់ពីការថែទាំដំណាំ និងការប្រើប្រាស់ជីថ្នាំតាមលក្ខណៈបច្ចេកទេស។ ជាមួយគ្នានោះ ក្រុមការងារបានណែនាំឱ្យសហគមន៍ខិតខំស្វែងរកដៃគូវិនិយោគ (ឈ្មួញ) ឬរោងចក្រកែច្នៃក្នុងស្រុក ដើម្បីត្រៀមរៀបចំ កិច្ចសន្យាទិញ-លក់ គ្រាប់ស្វាយចន្ទីឱ្យបានច្បាស់លាស់ (អនុវត្តកសិកម្មតាមកិច្ចសន្យា) សម្រាប់រដូវកាលប្រមូលផលខាងមុខ។

២- សមាជិកសហគមន៍កសិកម្មស្រែក្រសាំង ស្ថិតនៅឃុំស្រែក្រសាំង ស្រុកសៀមបូក ដើម្បីសិក្សាស្វែងយល់ពីការថែទាំ និងការប្រើប្រាស់ជីថ្នាំដំណាំ ព្រមទាំងណែនាំឱ្យសហគមន៍ពន្លឿនការស្វែងរក ដៃគូទិញ-លក់ ដើម្បីធានាទីផ្សារគ្រាប់ស្វាយចន្ទីក្នុងរដូវប្រមូលផល។ ជាមួយគ្នានោះ តំណាងសហគមន៍ក៏បានស្នើសុំវគ្គបណ្តុះបណ្តាលបច្ចេកទេសបន្ថែមលើដំណាំស្វាយចន្ទី និងសុំឱ្យក្រសួងកសិកម្មពិនិត្យលទ្ធភាពក្នុងការបង្កើតសហគមន៍កសិកម្មទំនើបស្វាយចន្ទី (តំបន់នេះមានផ្ទៃដីដំណាំស្វាយចន្ទីប្រមាណជាង ៤,០០០ហិកតា)។

៣-ជួបកសិករដែលរងផលប៉ះពាល់ដោយទឹកជំនន់ និងពិនិត្យ វាយតម្លៃជាក់ស្តែងពីការខូចខាតលើដំណាំស្រូវ និងដំណាំរួមផ្សំនៅតាមទីតាំងមានដូចជា៖ ភូមិដំរីផុង ឃុំកោះសំពាយ ស្រុកសៀមបូក ខេត្តស្ទឹងត្រែង និងភូមិស្រែឬស្សី ឃុំស្រែឬស្សី ស្រុកថាឡាបរិវ៉ាត់ ខេត្តស្ទឹងត្រែង៕

ដោយ៖ ពេជ្រ សំអឿន (ប្រភព៖ ក្រសួងកសិកម្ម រុក្ខាប្រមាញ់ និងនេសាទ)