AKP ភ្នំពេញ ថ្ងៃទី០៩ ខែតុលា ឆ្នាំ២០២៥-- លោក ដាតុ ផាន យិង ផុង ប្រធានក្រុមប្រឹក្សាភិបាល និងជាអគ្គនាយកគ្រប់គ្រងទូទៅនៃធនាគារ អូរៀនថល ម.ក (Oriental Bank Plc.) បានបេ្តជ្ញានៅចំពោះមុខឯកឧត្តម ហួត ហាក់ រដ្ឋមន្ត្រីក្រសួងទេសចរណ៍កម្ពុជា ថានឹងចូលរួមសហការជាមួយក្រសួងទេសចរណ៍ ដើម្បីផ្សព្វផ្សាយសក្តានុពលទេសចរណ៍កម្ពុជាដល់អតិថិជនជាតិ និងអន្តរជាតិរបស់ខ្លួនតាមដែលអាចធ្វើទៅបាន ប្រយោជន៍ទាក់ទាញភ្ញៀវទសចរឱ្យមកទស្សនាកម្ពុជាច្រើនឡើងបន្ថែមទៀត។ ការប្តេជ្ញារបស់លោក ដាតុ ផាន យិង ផុង យ៉ាងដូច្នេះធ្វើឡើងក្នុងឱកាសចូលជួបសម្ដែងការគួរសម និងពិភាក្សាការងារអំពីកិច្ចសហប្រតិបត្តិការទេសចរណ៍ជាមួយឯកឧត្តម ហួត ហាក់ រដ្ឋមន្ត្រីក្រសួងទេសចរណ៍កម្ពុជា នៅទីស្តីការក្រសួង នាថ្ងៃទី០៨ ខែតុលា ឆ្នាំ២០២៥។

ក្នុងជំនួបនេះ ឯកឧត្តមរដ្ឋមន្រ្តី ក្នុងនាមរាជរដ្ឋាភិបាលកម្ពុជាបានថ្លែងអំណរគុណ កោតសរសើរ និងវាយតម្លៃខ្ពស់ចំពោះការចូលរួមចំណែកដ៏សកម្មរហូតមករបស់ធនាគារ អូរៀនថល ម.ក (Oriental Bank Plc.) ក្នុងការអភិវឌ្ឍវិស័យទេសចរណ៍តាមរយៈការផ្តល់សេវាកម្មទូទាត់ដល់ភ្ញៀវទេសចរជាតិ និងអន្តរជាតិ ព្រមទាំងប្រតិបត្តិករទេសចរណ៍។ ទន្ទឹមនឹងនេះដែរ ឯកឧត្តមរដ្ឋមន្រ្តីក៏បានកត់ត្រាទុកនូវគំនិតផ្តួចផ្តើមកិច្ចសហការថ្មីៗ និងប្រកបដោយការច្នៃប្រឌិតខ្ពស់ដែលបានលើកឡើងដោយធនាគារ ដែលថានឹងជួយផ្សព្វផ្សាយសក្តានុពលទេសចរណ៍ និងកាលានុវត្តភាពវិនិយោគកម្ពុជាយ៉ាងទូលំទូលាយដល់អតិថិជនជាតិ និងអន្តរជាតិរបស់ខ្លូន ដៃគូសហការរបស់ខ្លួនទាំងនៅក្នុង និងក្រៅប្រទេស៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)