AKP ភ្នំពេញ ថ្ងៃទី០៩ ខែតុលា ឆ្នាំ២០២៥-- ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានចាត់ទុកការផ្អែកលើចំណេះដឹងមូលដ្ឋានដែលមានស្រាប់ និងការរុញបញ្ហាដោយដាក់បន្ទុកតែទៅលើភាគី ឬប្រទេសណាមួយថាជាកត្តានាំឱ្យការប្រយុទ្ធប្រឆាំងបទល្មើសបច្ចេកវិទ្យា និងអំពើលាងសម្អាតប្រាក់មិនមានប្រសិទ្ធភាព។ ផ្ទុយទៅវិញយើងចាំបាច់ត្រូវបង្កើនសមត្ថភាព និងបោះដៃសហការជាសកលដើម្បីធ្វើកិច្ចការនេះជាមួយគ្នា។ ការថ្លែងបញ្ជាក់របស់ឯកឧត្តមអភិសន្តិបណ្ឌិត ស សុខា ដូចនេះក្នុងដំណើរការសិក្ខាសាលាស្តីពីការផ្លាស់ប្តូរបទពិសោធន៍ក្នុងការបង្ក្រាបបទល្មើសឆបោក និងសម្អាតប្រាក់ នៅទីស្ដីការក្រសួងមហាផ្ទៃ នាថ្ងៃទី០៨ ខែតុលា ឆ្នាំ២០២៥។

ឯកឧត្តមអភិសន្តិបណ្ឌិតបានសង្កត់ធ្ងន់ថា ការផ្លាស់ប្ដូរបទពិសោធន៍ជាទៀងទាត់ និងការបង្កើនសមត្ថភាពមន្ត្រីជំនាញឱ្យទាន់និន្នាការនៃបទល្មើសជាប្រចាំគឺជារឿងចាំបាច់បំផុត ខណៈដែលយើងបានមើលឃើញពីការវិវត្តឥតឈប់ឈរនៃប្រព័ន្ធបច្ចេកវិទ្យាឌីជីថល ដែលបាន និងកំពុងផ្សារភ្ជាប់ក្នុងជីវភាពប្រចាំថ្ងៃរបស់ប្រជាពលរដ្ឋកម្ពុជាក៏ដូចគ្នានឹងមនុស្សជាតិទូទាំងពិភពលោក។

ឯកឧត្តមបានបន្តថា ក្នុងបរិបទនេះ ជនខិលខូចមានលទ្ធភាពប្រព្រឹត្តអំពើឆបោក លួចបន្លំតាមគ្រប់វិធីសាស្ត្រ ដោយប្រើបច្ចេកវិទ្យាឌីជីថល ឬតាមបណ្ដាញអ៊ីនធឺណិតចេញពីទីតាំងគ្រប់កន្លែងលើពិភពលោក ដែលបញ្ហានេះទាមទារចាំបាច់នូវមន្ត្រីមានសមត្ថភាព និងក៏ទាមទារជាចាំបាច់ផងដែរនូវការផ្លាស់ប្ដូរព័ត៌មាន និងបទពិសោធន៍រវាងស្ថាប័នអនុវត្តច្បាប់នៃបណ្ដាប្រទេសពាក់ព័ន្ធ។

ឯកឧត្តមអភិសន្តិបណ្ឌិត ស សុខា បានគូសបញ្ជាក់ថា បច្ចុប្បន្នកម្ពុជាក៏កំពុងទទួលរងគ្រោះដូចសកលលោកដែរ និងក៏កំពុងទទួលបន្ទុកចូលរួមដោះស្រាយករណីសម្អាតប្រាក់ និងការឆបោកតាមប្រព័ន្ធបច្ចេកវិទ្យា ដោយមិនមែនខិតខំសម្រាប់តែប្រជាពលរដ្ឋកម្ពុជាប៉ុណ្ណោះទេ ប៉ុន្តែក៏ដើម្បីបង្ការ ទប់ស្កាត់ និងជួយសង្រ្គោះមនុស្សជាតិនៅតាមប្រទេសផ្សេងទៀតក្នុងតំបន់ និងពិភពលោកទាំងមូលថែមទៀតផង ហើយថា ឯកឧត្តមមិនគាំទ្រឡើយរាល់ការចង្អុលមុខ ឬទម្លាក់កំហុសតែទៅលើភាគីណាមួយនៅពេលនិយាយពីផលលំបាកបង្កឡើងដោយបទល្មើសទាំងពីរប្រភេទនេះ។

សូមបញ្ជាក់ថា សិក្ខាសាលាស្តីពីការផ្លាស់ប្តូរបទពិសោធន៍ក្នុងការបង្ក្រាបបទល្មើសឆបោក និងសម្អាតប្រាក់ត្រូវបានក្រសួងមហាផ្ទៃរៀបចំឡើង ដោយមានការអញ្ជើញឱ្យចូលរួមពីវាគ្មិនសំខាន់ៗចំនួនពីររូបមកពីប្រទេសសិង្ហបុរី និងសហរដ្ឋអាម៉េរិក ដែលវាគ្មិនទាំងពីររូបនោះ រួមមាន លោកវរសេនីយ៍ឯក ហូ បានស្យុង  ប្រធានអង្គភាពប្រឆាំងការឆបោកតាមប្រព័ន្ធបច្ចេកវិទ្យាសិង្ហបុរីនៃនាយកដ្ឋានកិច្ចការធុរកិច្ចពាណិជ្ជកម្ម និងលោកស្រី ជូលា ស្ទេវិន ប្រធានការិយាល័យអនុព័ន្ធច្បាប់ (FBI) អមស្ថានទូតសហរដ្ឋអាម៉េរិកប្រចាំនៅកម្ពុជា៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)