AKP ភ្នំពេញ ថ្ងៃទី០៩ ខែតុលា ឆ្នាំ២០២៥-- ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចប្រជុំពិភាក្សាលើការរៀបចំកិច្ចសន្យាវិនិយោគជួលទីតាំងទ្រព្យសម្បត្តិរដ្ឋ សម្រាប់វិនិយោគនៅខេត្តក្រចេះ នារសៀលថ្ងៃទី០៨ ខែតុលា ឆ្នាំ២០២៥ នៅទីស្តីការក្រសួងសេដ្ឋកិច្ច ដោយមានការអញ្ជើញចូលរួមពីឯកឧត្តមអនុរដ្ឋលេខាធិការ និងសមាជិកនៃលេខាធិការដ្ឋាន ក.វ.ឦសាន តំណាងអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ ព្រមទាំងមន្ត្រីជំនាញពាក់ព័ន្ធ។

កិច្ចប្រជុំនេះមាគោលបំណងជួយសម្របសម្រួលនីតិវិធីជូនក្រុមហ៊ុន ក្នុងការអនុវត្តគម្រោងសាងសង់កំពង់ផែពហុបំណង ដែលមានទីតាំងស្ថិតក្នុងឃុំព្រែកប្រសព្វ ស្រុកព្រែកប្រសព្វ ខេត្តក្រចេះ ព្រមទាំងការសាងសង់ហេដ្ឋារចនាសម្ព័ន្ធចាំបាច់នានា សម្រាប់បម្រើដល់ការវិនិយោគ និង ការដឹកជញ្ជូនកសិផល។

បន្ទាប់ពីបានពិនិត្យ និង ពិភាក្សាលើទិដ្ឋភាពច្បាប់ បច្ចេកទេស និងបទប្បញ្ញត្តិពាក់ព័ន្ធ ឯកឧត្តមបណ្ឌិតសភាចារ្យ បានប្រគល់ភារកិច្ចជូនលេខាធិការដ្ឋាន ក.វ.ឦសាន ឱ្យធ្វើការសិក្សាស៊ីជម្រៅជាមួយមន្រ្តីជំនាញនៃអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ និងភាគីក្រុមហ៊ុន សំដៅជំរុញបញ្ចប់សេចក្តីព្រាងកិច្ចសន្យាជួលទីតាំងដីខាងលើនេះឱ្យបានឆាប់ ក្នុងគោលបំណងបង្កបរិយាកាសវិនិយោគក្នុងខេត្តនៃភូមិភាគឦសាន ឱ្យកាន់តែមានភាពល្អប្រសើរ។

សូមជម្រាបជូនបន្ថែមថា តាមផែនការនៃគម្រោងវិនិយោគនេះ ក្រុមហ៊ុនមានផែនការសាងសង់កំពង់ផែ និងមជ្ឈមណ្ឌលភស្តុភារកម្មទំនើប បង្កើតមណ្ឌលកែច្នៃ និងវេចខ្ចប់ផលិតផលកសិកម្ម សម្រាប់បម្រើឱ្យការនាំចេញ និងជាមជ្ឈមណ្ឌលប្រមូលទិញកសិផលរបស់ប្រជាពលរដ្ឋ នៅខេត្តតាមបណ្តោយទន្លេមេគង្គភាគខាងលើ សំដៅរួមចំណែកអភិវឌ្ឍសេដ្ឋកិច្ចជាតិ និងជំរុញឱ្យមានសន្ទុះរីកចម្រើនលើការដឹកជញ្ជូនតាមផ្លូវទឹក នៅតាមបណ្តាខេត្តក្នុងភូមិភាគឦសាននៃព្រះរាជាណាចក្រកម្ពុជា ជាពិសេសនៅក្នុងខេត្តក្រចេះ៕

ដោយ ទូច វលក័្ខណ (ប្រភព៖ ក្រសួងសេដ្ឋកិច្ច)