AKP កំពង់ធំ ថ្ងៃទី០៩ ខែតុលា ឆ្នាំ២០២៥-- ដោយទទួលបានព័ត៌មានពីអាជ្ញាធរដែនដី និងព្រះសង្ឃអំពីក្រុមគ្រួសារយោធិនដែលកំពុងបំពេញភារកិច្ចនៅសមរភូមិមុខមានជីវភាពលំបាកខ្វះខាត កាលពីថ្ងៃទី០៨ ខែតុលា ឆ្នាំ២០២៥ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការី ទៅសំណេះសំណាលសាកសួរសុខទុក្ខ និងនាំយកនូវអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នីទៅជួយដោះស្រាយកាលលំបាកខ្វះខាត ជូនដល់គ្រួសារយោធិនសមរភូមិមុខចំនួន០១គ្រួសារដែលមានកូនតូចៗនៅក្នុងបន្ទុកចំនួន៦នាក់កំពុងស្នាក់អាស្រ័យបណ្ដោះអាសន្ននៅជាមួយផ្ទះបងប្អូននៅភូមិកប់ថ្លុក ឃុំដំរីស្លាប់ ស្រុកកំពង់ស្វាយ ខេត្តកំពង់ធំ។

លោកស្រី កាន ឡឹង អាយុ៣៥ឆ្នាំ បានបញ្ជាក់ថា គាត់មានស្វាមីឈ្មោះភឿន ភីន នៅអង្គភាពកងការពារព្រំដែនលេខ៤០៣ ដែលកំពុងបំពេញភារកិច្ចនៅសមរភូមិមុខក្នុងការការពារបូរណភាពទឹកដីនៅតំបន់ព្រំដែនកម្ពុជា-ថៃ។ លោកស្រីមានកូនតូចៗនៅក្នុងបន្ទុកចំនួន៦នាក់ ហើយកន្លងមករស់នៅក្នុងអង្គភាពជាមួយស្វាមី។ ក្នុងពេលសង្គ្រាមផ្ទុះអាវុធដោយការឈ្លានពានពីពួកទាហានសៀមនៅតំបន់មុំបី កូនតូចរបស់គាត់មានអាយុទើបតែបីថ្ងៃប៉ុណ្ណោះ គាត់ត្រូវបានស្វាមីឱ្យវិលត្រឡប់មកកាន់ស្រុកកំណើតដើម្បីចៀសវាងគ្រោះថ្នាក់ដោយប្រការផ្សេងៗ ក្នុងពេលសង្គ្រាម។ បច្ចុប្បន្នកូនប្រុសរបស់គាត់មានអាយុជាង៣ខែហើយ។

ឧត្តមសេនីយ៍ទោ សោម ស៊ុន បានថ្លែងនូវការគោរពដឹងគុណចំពោះវីរភាពដ៏អង់អាចក្លាហានរបស់កងយោធពលខេមរភូមិន្ទនៅសមរភូមិមុខ ដែលបាន និងកំពុងលះបង់គ្រប់បែបយ៉ាង ដើម្បីការពារបូរណភាពទឹកដី និងការពារប្រជាជនកម្ពុជា ក្រោមការដឹកនាំបញ្ជាពីសំណាក់សម្ដេចតេជោ សម្ដេចធិបតី និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ហើយកងកម្លាំងនៅសមរភូមិក្រោយបានត្រៀមខ្លួនរួចជាស្រេចដើម្បីអនុវត្តតាមបទបញ្ជា។ ជាមួយនោះដែរក៏បានបំពេញភារកិច្ចបម្រើឱ្យសមរភូមិមុខដោយបានយកចិត្តទុកដាក់ជួយមើលថែ និងជួយដោះស្រាយការលំបាកជូនបងប្អូននៅសមរភូមិមុខព្រមទាំងក្រុមគ្រួសារវីរយុទ្ធជនដែលកំពុងរស់នៅនៅសមរភូមិក្រោយផងដែរ។

ក្នុងឱកាសនោះ ឧត្តមសេនីយ៍ទោ សោម ស៊ុន បានឧបត្ថម្ភស្បៀងអាហារ គ្រឿងឧបភោគបរិភោគ ភេសជ្ជៈ ថ្នាំពេទ្យ ភួយសម្រាប់ដណ្ដប់ សម្ភារប្រើប្រាស់ និងថវិកាមួយចំនួន ដែលជាអំណោយដ៏ថ្លៃថ្លារបស់សម្ដេចមហាបវរធិបតីហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនលោកស្រី កាន ឡឹង សម្រាប់ដោះស្រាយក្នុងជីវភាពប្រចាំថ្ងៃ។ ដោយមានការជួយឧបត្ថម្ភដីពីបងប្អូនសាច់ញាតិរបស់គាត់ ដីដែលមានទំហំ១៥ម៉ែត្រគុណ២០ម៉ែត្រ ឧត្តមសេនីយ៍ទោ សោម ស៊ុន បានសន្យាថានឹងរៀបចំសាងសង់ជម្រកស្នាក់នៅបណ្ដោះអាសន្នធ្វើអំពីឈើ ដំបូល និងជញ្ជាំងប្រក់ស័ង្កសី ដែលមានទំហំ៤ម៉ែត្រគុណ៦ម៉ែត្រ ជូនលោកស្រី និងកូនតូចៗបានស្នាក់នៅបានសមរម្យនាពេលដ៏ខ្លីខាងមុខនេះ៕

ដោយ ស៊ុម វណ្ណា