AKP កំពង់ធំ ថ្ងៃទី០៩ ខែតុលា ឆ្នាំ២០២៥-- លោកស្រី លំ គន្ធារី អភិបាលរងខេត្តកំពង់ធំ មានប្រសាសន៍លើកឡើងថា គណនេយ្យភាពសង្គមគឺជាយន្តការដែលមិនអាចខ្វះបានក្នុងការកសាងទំនុកចិត្តរវាងប្រជាពលរដ្ឋ និងអ្នកផ្ដល់សេវាសាធារណៈ ក្នុងឱកាសអញ្ជើញដឹកនាំនូវកិច្ចប្រជុំប្រចាំត្រីមាសទី៣ស្ដីពីការអនុវត្តសកម្មភាពការងារគណនេយ្យភាពសង្គម កាលពីរសៀលថ្ងៃទី០៨ ខែតុលា ឆ្នាំ២០២៥ ដើម្បីឱ្យខេត្តកំពង់ធំបន្តធ្វើជាគំរូមួយក្នុងការអនុវត្តការងារគណនេយ្យភាពសង្គម ប្រកបដោយជោគជ័យ និងនិរន្តរភាពសម្រាប់ត្រីមាសទី៤ ឆ្នាំ២០២៥ និងឆ្នាំបន្តបន្ទាប់ទៀតដោយមានការចូលរួមពីសំណាក់មន្ត្រីពាក់ព័ន្ធមកពីក្រុង-ស្រុកទាំង៩ មន្ទីរអង្គភាព និងអង្គការ ដែលជាដៃគូសហការជាមួយរដ្ឋបាលខេត្តផងដែរ។

លោកស្រី លំ គន្ធារី មានប្រសាសន៍ថា ជាក់ស្តែងដូចដែលយើងដឹងហើយថា គណនេយ្យភាពសង្គមគឺជាយន្តការដែលមិនអាចខ្វះបានក្នុងការកសាងទំនុកចិត្តរវាងប្រជាពលរដ្ឋ និងអ្នកផ្តល់សេវាសាធារណៈ។ មតិយោបល់ និងកង្វល់ របស់ប្រជាពលរដ្ឋត្រូវបានប្រមូល វិភាគ និងប្រើប្រាស់ជាធាតុចូលក្នុងការរៀបចំផែនការកែលម្អសេវាសំដៅឆ្លើយតបទៅនឹងតម្រូវការពិតប្រាកដរបស់ពួកគាត់។

លោកស្រីបានបញ្ជាក់ថា ភាពជោគជ័យនៃគណនេយ្យភាពសង្គមមិនមែនគ្រាន់តែជាការអនុវត្តគម្រោងនោះទេប៉ុន្តែជាការកសាងនូវទំនុកចិត្តរវាងរដ្ឋបាលនិងប្រជាពលរដ្ឋព្រមទាំងការលើកកម្ពស់គុណភាពសេវាសាធារណៈឱ្យកាន់តែប្រសើរឡើង៕

ដោយ ស៊ុម វណ្ណា