AKP ភ្នំពេញ ថ្ងៃ០៥  ខែតុលា  ឆ្នាំ២០២៥---

តួនាទី និង្ភារកិច្ចរបស់ក្រសួងអភិវឌ្ឍន៍ជនបទ គឺជួយអភិវឌ្ឍនៅតំបន់ជនបទឱ្យមានការរីកចម្រើន តាមរយៈការលើកកម្រិតគុណភាពផ្លូវឱ្យមានភាពធន់នឹងអាកាសធាតុ, លើកកម្ពស់សុខភាព អនាម័យ និងបរិស្ថានរស់នៅរបស់សហគមន៍ជនបទ, ការអភិវឌ្ឍសហគមន៍ និងចលនាភូមិគំរូ, ព្រមទាំងការបណ្ដុះបណ្ដាលជំនាញមូលដ្ឋាន និងបំណិនជីវិតដើម្បីឱ្យប្រជាពលរដ្ឋមានមុខរបរ និងរកប្រាក់ចំណូលបន្ថែម ក្នុងគោលដៅធ្វើឱ្យតំបន់ជនបទមានភាពស៊ីវិល័យ ។

ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទមានប្រសាសន៍បែបនេះក្នុងឱកាសអញ្ជើញដឹកនាំក្រុមការងារ មន្ដ្រីបច្ចេកទេសក្រសួង និងមន្ទីរអភិវឌ្ឍន៍ជនបទខេត្តបាត់ដំបង អញ្ជើញទៅពិនិត្យស្ថានភាព សក្ដានុពល និងការអភិវឌ្ឍនៅសហគមន៍តាសីសាមគ្គី ស្ថិតនៅភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង ដោយមានការអញ្ជើញចូលរួមពីសំណាក់អាជ្ញាធរមូលដ្ឋានផងដែរ   នាព្រឹកថ្ងៃសៅរ៍ ទី៤ ខែតុលា ឆ្នាំ២០២៥ ។

សូមបញ្ជាក់ថា  .សហគមន៍គំរូតាសីសាមគ្គី មានផ្ទៃដីដាំដុះសរុប ៥០ហិកតា ដែលមានសមាជិកសរុបចំនួន ១៦១គ្រួសារ ។ សហគមន៍ កំពុងអនុវត្តមុខរបរចំបងៗចំនួន ៣ រួមមាន
១- ដាំបន្លែសុវត្ថិភាពក្នុងផ្ទះសំណាញ់ ដូចជា ស្ពៃ ខាត់ណា សាឡាដ ជី
២- សាងសង់និងតម្លើងផ្ទះសំណាញ់ និង
៣- សេវាកម្មប្រើប្រាស់រួមគ្នារៀបចំប្រព័ន្ធទឹក។
សហគមន៍មានឃ្លាំងចំនួន១ អាគារទីស្នាក់ការចំនួន១ ផ្ទះសំណាញ់សចំនួន ២៦០ខ្នង និងផ្ទះសំណាញ់ស្បៃខ្មៅចំនួន ៩១ខ្នង ព្រមទាំងហេដ្ឋារចនាសម្ព័ន្ធស្រោចស្រប់ផងដែរ។ សហគមន៍ក៏មានចិញ្ចឹមសត្វ ដែលមានដូចជា ក្ងាន មាន់ ទា ជ្រូក ត្រី កណ្ដូប ការបណ្ដុះផ្សិតក្នុងរោងផងដែរ។ 

ជួបសំណេះសំណាលជាមួយប្រជាពលរដ្ឋក្នុងសហគមន៍ ឯកឧត្តមរដ្ឋមន្ដ្រី បានកោតសរសើរ និងវាយតម្លៃខ្ពស់ចំពោះប្រជាសហគមន៍តាសីសាមគ្គី ដែលបានខិតខំបង្កបង្កើនផល ដើម្បីលើកស្ទួយសេដ្ឋកិច្ចគ្រួសារ ពិសេសកំណើនប្រាក់ចំណូលកានតែខ្ពស់ ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ។

ក្រុមការងារបានអញ្ជើញពិនិត្យស្ថានភាពផ្លូវនៅក្នុងសហគមន៍ចំនួន ២ខ្សែ រួមមាន៖ ខ្សែទី១ ជាផ្លូវក្រាលកៅស៊ូពីរជាន់ (DBST) មានប្រវែង ៣,២៥គីឡូម៉ែត្រ ទទឹង ៥ម៉ែត្រ និងខ្សែទី២ ជាផ្លូវក្រាលល្បាយក្រួស មានប្រវែង ២, ៤៩គីឡូម៉ែត្រ ទទឹង ៥ម៉ែត្រ។ ផ្លូវទាំងពីរខ្សែនេះ ត្រូវបានស្ថាបនាចប់ជាស្ថាពរ ក្នុងឆ្នាំ២០២៥ ក្នុងក្របខ័ណ្ឌគម្រោងពិពិធកម្មកសិកម្មកម្ពុជា (CASDP)៕

ដោយ៖ ពេជ្រ សំអឿន( ប្រភព៖ក្រសួងអភិវឌ្ឍន៍ជនបទ )