AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៥-- អគ្គលេខាធិការដ្ឋាននៃក្រុមប្រឹក្សាជាតិកម្ពុជាដើម្បីស្ត្រី បានរៀបចំកិច្ចប្រជុំសាមញ្ញលើកទី ៥៩ ក្រោមអធិបតីភាពលោកជំទាវកិត្តិបណ្ឌិត អ៊ឹង កន្ថាផាវី ប្រធានក្រុមប្រឹក្សាជាតិកម្ពុជាដើម្បីស្ត្រី និងជារដ្ឋមន្ត្រីក្រសួងកិច្ចការនារី ដោយមានការអញ្ជើញចូលរួមពីលោកជំទាវអនុប្រធាន លោកជំទាវ ឯកឧត្តមសមាជិក សមាជិកា ក.ជ.ក.ស. អមដោយមន្ត្រីបច្ចេកទេសអន្តរក្រសួង និងមន្រ្តីអគ្គលេខាធិការដ្ឋាន ក.ជ.ក.ស. សរុបចំនួន ៨៩រូប (ស្រ្តី ៧៤រូប) នាព្រឹកថ្ងៃទី១៧ ខែកញ្ញា ឆ្នាំ២០២៥ ដើម្បីពិនិត្យ ពិភាក្សា និងសម្រេចលើកិច្ចការមួយចំនួនរបស់ក្រុមប្រឹក្សាជាតិកម្ពុជាដើម្បីស្ត្រី។

ជាលទ្ធផលនៃកិច្ចប្រជុំតាមរបៀបវារៈដែលបានអនុម័ត៖ ១. របាយការណ៍វឌ្ឍនៈភាពឆ្លើយតបពីក្រសួងស្ថាប័ននៃការអនុវត្តផែនការឆ្លើយតបទៅនឹងសេចក្តីសង្កេតសន្និដ្ឋាន (COB) ៥៧ចំណុច លើរបាយការណ៍ជាតិលើកទី៦ ស្តីពីការអនុវត្តអនុសញ្ញា CEDAW របស់គណៈកម្មាធិការ CEDAW នៃអង្គការសហប្រជាជាតិ ត្រូវបានដាក់ជូនពិនិត្យដើម្បីកែសម្រួលចុងក្រោយទាំងភាសាខ្មែរ និងភាសាអង់គ្លេស និងបញ្ចប់ នៅទីថ្ងៃទី៣០ ខែកញ្ញា ឆ្នាំ២០២៥។ ២. បទបង្ហាញស្តីពីការចុះតាមដានវាយតម្លៃរបស់ ក.ជ.ក.ស. និងស្ថានភាពស្រ្តីកំពុងជាប់ឃុំក្នុងពន្ធនាគារត្រូវបានបង្ហាញជូនសមាជិក សមាជិកានៃអង្គប្រជុំជ្រាប។ ៣. របាយការណ៍ស្តីពីការអនុវត្តគម្រោងផ្តល់សេវាការពារក្តីដល់ស្រ្តី និងក្មេងស្រីក្រីក្ររងគ្រោះដោយអំពើហិង្សា ជាមួយគណៈមេធាវីព្រះរាជាណាចក្រកម្ពុជាត្រូវបានបង្ហាញជូនជ្រាបជាពត៌មាន និង៤. ការងារផ្សេងៗត្រូវបានពិភាក្សា សម្រេច។

រាល់ចំណុចដែលបានលើកយកមកបង្ហាញ និងភាក្សាជាពិសេសកិច្ចការសំខាន់ៗគឺ ដើម្បីឈានឆ្ពោះទៅសម្រេចលើការអនុវត្តអនុសញ្ញា CEDAW និងការពារសិទ្ធិស្រ្តី និងក្មេងស្រីនៅកម្ពុជា៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)