AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៥-- ឯកឧត្តមបណ្ឌិត Santo Darmosumarto ឯកអគ្គរដ្ឋទូតនៃសាធារណរដ្ឋឥណ្ឌូណេស៊ីប្រចាំព្រះរាជាណាចក្រកម្ពុជា បានវាយតម្លៃខ្ពស់ចំពោះការផ្តល់កិច្ចសហការគាំទ្រប្រកបដោយការយកចិត្តទុកដាក់ខ្ពស់ពីសំណាក់ក្រសួងអប់រំ យុវជន និងកីឡាកម្ពុជានាពេលកន្លងមក និងបានបង្ហាញពីការប្តេជ្ញាចិត្តបន្តជំរុញកិច្ចសហប្រតិបត្តិការលើវិស័យអប់រំច្រើនបន្ថែមទៀតនាពេលខាងមុខ។

ការលើកឡើងរបស់ឯកឧត្តមឯកអគ្គរដ្ឋទូតយ៉ាងដូច្នេះ ក្នុងឱកាសដែលឯកឧត្តមអញ្ជើញចូលជួបសម្តែងការគួរសម និងពិភាក្សាការងារជាមួយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី១៦ ខែកញ្ញា ឆ្នាំ២០២៥ នៅទីស្ដីការក្រសួង ដើម្បីពង្រឹង និងពង្រីកកិច្ចសហប្រតិបត្តិការក្នុងវិស័យអប់រំរវាងប្រទេសទាំងពីរ។

តាមរយៈជំនួបនេះ ប្រធានបទសំខាន់ៗជាច្រើនត្រូវបានលើកយកមកពិភាក្សា ដូចជា ១. ឱកាសសិក្សានៅប្រទេសឥណ្ឌូនេស៊ី តាមរយៈអាហារូបករណ៍របស់រដ្ឋាភិបាលឥណ្ឌូនេស៊ី និងកម្មវិធីផ្លាស់ប្តូរបទពិសោធន៍សម្រាប់សិស្សនិស្សិត និងមន្ត្រីរាជការ។ ២. ស្វែងយល់ពីកិច្ចសហប្រតិបត្តិការក្នុងការបង្កើតមូលដ្ឋានទិន្នន័យសម្រាប់និស្សិតកម្ពុជានៅប្រទេសឥណ្ឌូនេស៊ី។ ៣. ពិនិត្យលទ្ធភាពរៀបចំការបង្កើតមជ្ឈមណ្ឌលឥណ្ឌូនេស៊ី ដោយសហការជាមួយសាកលវិទ្យាល័យនៅកម្ពុជា និងការបង្រៀនភាសាឥណ្ឌូនេស៊ីនៅក្នុងសាកលវិទ្យាល័យនៅកម្ពុជា។ ៤. ពង្រឹងទំនាក់ទំនងរវាងប្រជាជន និងប្រជាជន តាមរយៈការបង្កើតសមាគមនិស្សិតកម្ពុជាដែលបានបញ្ចប់ការសិក្សាពីប្រទេសឥណ្ឌូនេស៊ី និង៥. ការជំរុញទំនាក់ទំនងលើកម្មវិធីអភិវឌ្ឍន៍យុវជន និងកីឡារវាងប្រទេសទាំងពីរ។

ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណចំពោះស្ថានទូតឥណ្ឌូណេស៊ីប្រចាំកម្ពុជា ដែលតែងតែយកចិត្តទុកដាក់ចូលរួមចំណែកគាំទ្រដល់រាល់ផែនការសកម្មភាពអភិវឌ្ឍន៍ជាតិរបស់រាជរដ្ឋាភិបាលកម្ពុជា ជាពិសេសចំពោះការប្តេជ្ញាចិត្តបន្តលើកកម្ពស់កិច្ចសហប្រតិបត្តិការជាមួយក្រសួងអប់រំ យុវជន និងកីឡា ដោយបានរំលេចនូវសមិទ្ធផលនៃគម្រោងកិច្ចសហប្រតិបត្តិការផ្នែកអប់រំ និងការបណ្តុះបណ្តាលធនធានមនុស្សចាប់តាំងពីឆ្នាំ១៩៩៤មក តាមរយៈការផ្តល់អាហារូបករណ៍របស់រដ្ឋាភិបាលឥណ្ឌូនេស៊ីដល់និស្សិត-មន្ត្រីកម្ពុជាទៅបន្តការសិក្សាថ្នាក់ក្រោយឧត្តមសិក្សា និងចូលរួមវគ្គសិក្សាខ្លីជាច្រើន រួមទាំងកិច្ចសហប្រតិបត្តិការផ្នែកយុវជន ការចូលរួមព្រឹត្តិការណ៍កីឡា កិច្ចសហប្រតិបត្តិការរវាងគ្រឹះស្ថានឧត្តមសិក្សាកម្ពុជា និងឥណ្ដូនេស៊ី ដែលមានគោលដៅដើម្បីធ្វើការផ្លាស់ប្តូរនិស្សិត បុគ្គលិក សាស្ត្រាចារ្យលើការសិក្សា ការចុះកម្មសិក្សា ព្រមទាំងការចូលរួមក្នុងសកម្មភាពសហគមន៍ និងវប្បធម៌ផ្សេងៗទៀត៕

ដោយ៖ ចាន់ សុភឿន (ប្រភព៖ ក្រសួងអប់រំ)