AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៥-- លោកជំទាវ មឹន មាណវី អគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក និងជារដ្ឋលេខាធិការក្រសួងសាធារណការ និងដឹកជញ្ជូនបានឱ្យដឹងថា រយៈពេល៩ថ្ងៃនៃពិធីកាន់បិណ្ឌមានអ្នកស្លាប់ដោយសារគ្រោះថ្នាក់ចរាចរណ៍ជិត៥០នាក់ ដែលចំនួននេះគឺជាការព្រួយបារម្ភមួយនាំឱ្យផ្នែកពាក់ព័ន្ធទាំងឡាយបន្តធ្វើការអំពាវនាវដល់អ្នកប្រើប្រាស់ផ្លូវទាំងអស់ឱ្យគោរពច្បាប់ចរាចរណ៍ ដោយមិនត្រូវបើកបរលើសល្បឿនកំណត់ អ្នកជិះម៉ូតូត្រូវតែពាក់មួកសុវត្ថិភាព ហើយចំពោះមធ្យោបាយសម្រាប់ធ្វើដំណើរមុននឹងចេញដំណើរត្រូវពិនិត្យទៅលើកង់ ហ្វ្រាំង ស៊ីផ្លេ ភ្លើងហ្វា ភ្លើងស៊ីញ៉ូឱ្យបានត្រឹមត្រូវ ជាពិសេសត្រូវគោរពស្លាកសញ្ញាចរាចរណ៍នៅពេលបើកបរ។

ការលើកឡើងរបស់លោកជំទាវ មឹន មាណវី យ៉ាងដូច្នេះ ក្នុងឱកាសនៃយុទ្ធនាការអប់រំផ្សព្វផ្សាយច្បាប់ស្តីចរាចរណ៍ផ្លូវគោកមុនពិធីបុណ្យភ្ជុំបិណ្ឌ នាព្រឹកថ្ងៃទី១៧ ខែកញ្ញា ឆ្នាំ២០២៥ មុខវត្តនិរោធន៍នៅតាមបណ្តោយផ្លូវជាតិលេខ១។

លោកជំទាវបានគូសបញ្ជាក់ថា កន្លងទៅអាស្រ័យដោយមានការចូលរួមអប់រំផ្សព្វផ្សាយពីបញ្ហាគ្រោះ ថ្នាក់ចរាចរណ៍ ដែលក្នុងនោះប្រព័ន្ធផ្សព្វផ្សាយគឺជាចំណែកមួយយ៉ាងសំខាន់ក្នុងការធ្វើឱ្យគ្រោះថ្នាក់ចរាចរណ៍នៅទូទាំងប្រទេសមានការថយចុះបានបន្តិច តែវាក៏ជាការល្អប្រសើរដែរ ហើយថាសម្រាប់ យុទ្ធនាការអប់រំផ្សព្វផ្សាយច្បាប់ស្តីចរាចរណ៍ផ្លូវគោកមុនពិធីបុណ្យភ្ជុំបិណ្ឌនាពេលនេះ បើតាមលោក ជំទាវ មឹន មាណវី ថាធ្វើឡើងដើម្បីជាការពញ្ញាក់អារម្មណ៍អ្នកប្រើប្រាស់ផ្លូវទាំងអស់ឱ្យគិតអំពីច្បាប់ចរាចរណ៍ផ្លូវគោក ដោយត្រូវគោរពច្បាប់ចរាចរណ៍នៅពេលបើកបរ ដើម្បីបញ្ចៀសគ្រោះថ្នាក់ចរាចរណ៍នៅ ក្នុងឱកាសនៃពិធីបុណ្យភ្ជុំបិណ្ឌ ដែលជាពេលវេលាមានចរាចរណ៍មមាញឹក។

លោកជំទាវបានបន្តថា នាពេលនេះអាស្រ័យដោយយើងកំពុងមានបញ្ហាជាមួយប្រទេសជិតខាង យើងបានបន្ធូរបន្ថយនូវការរឹតបន្តឹងបន្តិច តែគ្រោះថ្នាក់ចរាចរណ៍ក្នុងមួយរយៈពេលនៃការបន្ធូរបន្ថយនេះពុំមានការកើនឡើងនោះទេ នេះគឺអាស្រ័យដោយស្មារតីនៃការចូលរួមរបស់បងប្អូនប្រជាពលរដ្ឋ ក្នុងការគោរពច្បាប់ចរាចរណ៍ផ្លូវគោក ក្នុងនោះប្រព័ន្ធផ្សព្វផ្សាយបានដើរតួនាទីយ៉ាងសំខាន់នៅក្នុងការអប់រំផ្សព្វផ្សាយពីបញ្ហាគ្រោះថ្នាក់ចរាចរណ៍ ដែលធ្វើឱ្យគ្រោះថ្នាក់ចរាចរណ៍មានការថយចុះបន្តិ។ លោកជំទាវសង្ឃឹមថា អ្នកប្រើប្រាស់ផ្លូវទាំងអស់នឹងបន្តការគោរពច្បាប់ចរាចរណ៍ដើម្បីបញ្ចៀស ឬកាត់បន្ថយគ្រោះថ្នាក់ចរាចរណ៍ ព្រោះថាគ្រោះថ្នាក់មួយនេះបានធ្វើឱ្យកម្ពុជាខាតបង់រាប់លានដុល្លារអាម៉េរិកនៅក្នុង១ឆ្នាំៗ ដោយបានបន្សល់ទុកនូវជនពិការដោយសារគ្រោះថ្នាក់ចរាចរណ៍ និងបានបន្សល់ទុកនូវភាពឈឺចាប់ចំពោះក្រុមគ្រួសារដែលមានសមាជិកបានបាត់បង់ជីវិតដោយសារគ្រោះថ្នាក់ចរាចរណ៍។

សូមជម្រាបជូនថា ក្នុងយុទ្ធនាការផ្សព្វផ្សាយច្បាប់ស្តីពីចរាចរណ៍ផ្លូវគោកនេះក៏មានការឆ្លើយសំនួរពីមហាជនដើម្បីយកមួកសុវត្ថិភាពផងដែរ៕

ដោយ៖ ចាន់ សុភឿន