AKP បាត់ដំបង ថ្ងៃទី១៧ ខែកញ្ញា ឆ្នាំ២០២៥--ឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មានបានជំរុញដល់មន្ត្រីទទួលបន្ទុកព័ត៌មាន និងសាធារណមតិ ត្រូវធ្វើការងារឱ្យបានជិតស្និទ្ធជាមួយថ្នាក់ដឹកនាំមន្ត្រីជំនាញជុំវិញរាជធានី ខេត្តរបស់ខ្លូនសម្រាប់ក្ដាប់ព័ត៌មានឱ្យជុំក្នុងការបកស្រាយ ពន្យល់ដល់ប្រជាពលរដ្ឋឱ្យបានច្បាស់ និងលឿន ដើម្បីគ្រប់គ្រងទប់ស្កាត់ និងបន្សាបព័ត៌មានមិនពិតឱ្យមានប្រសិទ្ធភាព។ ការលើកឡើងរបស់ឯកឧត្ដមរដ្ឋលេខាធិការបែបនេះ ក្នុងពិធីបើកវគ្គបំពាក់បំប៉ន ស្តីពីការពង្រឹងសមត្ថភាពលើការងារព័ត៌មាន និងសាធារណមតិដល់មន្ត្រីពាក់ព័ន្ធមកពីមន្ទីរព័ត៌មានខេត្តបាត់ដំបង ប៉ៃលិន បន្ទាយមានជ័យ ឧត្តរមានជ័យ កំពង់ឆ្នាំង និងមន្ទីរព័ត៌មានខេត្តពោធិ៍សាត់ នាព្រឹកថ្ងៃទី១៧ ខែកញ្ញា ឆ្នាំ២០២៥ នៅសាលាខេត្តបាត់ដំបង។

ឯកឧត្តមបណ្ឌិត ឆាយ សុផល តំណាងឯកឧត្តម នេត្រ ភាក្រ្តា រដ្ឋមន្ត្រីក្រសួងព័ត៌មានបានមានប្រសាសន៍ថា ការងារព័ត៌មាន និងសាធារណមតិគឺជាការងារសំខាន់ ដែលរាជរដ្ឋាភិបាល ក៏ដូចជាក្រសួងព័ត៌មានកំពុងយកចិត្តទុកដាក់ខ្ពស់។ ឯកឧត្ដមបានបញ្ជាក់ថា ក្រសួងព័ត៌មានបានដាក់ចេញនូវចក្ខុវិស័យ ធ្វើយ៉ាងណាប្រែក្លាយក្រសួងព័ត៌មានឱ្យទៅជាស្ថាប័នទំនាក់ទំនងសាធារណៈរបស់រាជរដ្ឋាភិបាល ប្រកបដោយបុរេសកម្ម សកម្ម អន្តរសកម្ម ប្រសិទ្ធភាព និងប្រសិទ្ធផល ផ្អែកលើអភិក្រម «ថ្មី ពិត លឿន និងទូលំទូលាយ» ប្រកបដោយជំនឿទុកចិត្ត និងវិជ្ជាជីវៈ។ ឯកឧត្ដមរដ្ឋលេខាធិការបានបញ្ជាក់បន្ថែមថា៖ «ក្នុងនាមអ្នកសារព័ត៌មានយើងត្រូវប្រឈមនូវទស្សនៈចម្រុះ គឺមកពីខាងក្នុងផង និងមកពីខាងក្រៅប្រទេសផង។ ដូច្នេះ យើងត្រូវស្វែងយល់រៀនសូត្រឱ្យទាន់នូវបច្ចេកវិទ្យា និងចេះសម្របសម្រួលជាមួយមន្ទីរផ្សេងៗ ក្នុងនាមអ្នកគាំទ្រ និងអ្នកសម្របសម្រួលដើម្បីបានដំណឹងផ្សព្វផ្សាយដល់សាធារណជនផង ថ្នាក់ដឹកនាំខេត្ត និងបញ្ជូនទៅរដ្ឋមន្ត្រីក្រសួងព័ត៌មានផង»។

ជាមួយគ្នានេះ ឯកឧត្តមបណ្ឌិត ឆាយ សុផល បានលើកឡើងផងដរថា មន្ទីរព័ត៌មានរាជធានី-ខេត្ត គឺជាអ្នកសម្របសម្រួល និងជាអ្នកនាំពាក្យក្នុងខេត្ត គឺជាអ្នកពាំនាំព័ត៌មាន សំណូមពរពីមហាជនសម្រាប់ខេត្តបានដឹង និងផ្សព្វផ្សាយព័ត៌មានពីសមិទ្ធផល និងដំណោះស្រាយរបស់ខេត្តជូនដល់ប្រជាពលរដ្ឋតាមបណ្តាសហគមន៍មូលដ្ឋានបានដឹងផងដែរ។

លោក សុវណ្ណ វិទិត្យា ប្រធានមន្ទីរព័ត៌មានខេត្តបាត់ដំបងបានឱ្យដឹងថា ក្រុមការងារសម្របសម្រួលព័ត៌មាននិងសាធារណមតិនៃមន្ទីរព័ត៌មានខេត្ត  បានអនុវត្តន៍តាមផែនការសកម្មភាព និងក្តាប់សភាពការណ៍ថ្មីៗ   ដោយប្រកាន់ខ្ជាប់នូវភាពបុរេសកម្ម សកម្ម ប្រសិទ្ធភាព និងប្រសិទ្ធផល។ ក្រៅពីនេះ ក្រុមការងារសម្របសម្រួលព័ត៌មាន និងសាធារណមតិ បានបង្កើនកិច្ចសហការល្អជាមួយថ្នាក់ដឹកនាំ មន្ទីរ អង្គភាព អាជ្ញាធរមូលដ្ឋានក្រុងស្រុក។ លោកប្រធានមន្ទីរបានបន្ដថា ក្នុងនោះ មន្ទីរបានបង្កើតច្រកព័ត៌មានតាមគ្រុបតេឡេក្រាម  គឺក្រុមព័ត៌មាន និងដោះស្រាយមតិមហាជន ដែលមានថ្នាក់ដឹកនាំខេត្ត មន្ទីរ អង្គភាព ក្រុង-ស្រុក ហើយបានធ្វើការឆ្លើយតប បកស្រាយរាល់ព័ត៌មានរសើបក្នុងខេត្ត និងបានទាន់ពេលវេលា  ។

ក្នុងឱកាសនោះ លោក ផេង សុទ្ធី អភិបាលរង ខេត្តបាត់ដំបងបានវាយតម្លៃខ្ពស់ចំពោះមន្ទីរព័ត៌មានខេត្តបាត់ដំបងដែលបានធ្វើការងារយ៉ាងសកម្មជាមួយថ្នាក់ដឹកនាំខេត្តលើការងារព័ត៌មាន និងសាធារណមតិនេះ។ លោកអភិបាលរងខេត្ដបានបញ្ជាក់ឱ្យដឹងថា វគ្គបំពាក់បំប៉ននៅខេត្តបាត់ដំបងនេះ គឺពិតជាមានសារៈសំខាន់ក្នុងការផ្ដល់ចំណេះដឹងអំពីការគ្រប់គ្រង ការចងក្រងបណ្តាញព័ត៌មាន សាធារណមតិក្នុងបរិបទថ្មី ការផលិតមាតិកា សម្រាប់ការផ្សព្វផ្សាយបែបឌីជីថល ជាពិសេសលើបណ្តាញសង្គម ការតាមដាន ការវិភាគ និងការឆ្លើយតបទៅនឹងព័ត៌មានក្លែងក្លាយ ជាដើម។

លោកអភិបាលរងខេត្ដបានអះអាងផងដែរថា ការងារគ្រប់គ្រង និងផ្សព្វផ្សាយវិស័យព័ត៌មាន និងសោតទស្សន៍ក្នុងខេត្តបាត់ដំបង មានការរីកចម្រើនគួរឱ្យកត់សម្គាល់។ ក៏ប៉ុន្តែក្នុងនេះ ក៏មានបញ្ហាមួយចំនួនក្នុងខេត្ត ក៏ដូចជាព័ត៌មានទូទៅ ជាអាទិ៍៖ ព័ត៌មានក្លែងក្លាយ ព័ត៌មានប្រឌិត អ្នកផលិតមាតិកា (Content Com MMO, intuencer និងព័ត៌មានអសកម្មមួយចំនួន ដែលរដ្ឋបាលខេត្តត្រូវបានយកចិត្តទុកដាក់ និងបានរៀបចំបង្កើតឱ្យមានរចនាសម្ព័ន្ធគ្រប់គ្រងនៅតាមមន្ទីរ អង្គភាពជំនាញក្នុងខេត្ត តាមបណ្តារដ្ឋបាលក្រុង ស្រុក និងដល់រដ្ឋបាលឃុំ សង្កាត់ មានយន្តការសម្រាប់តាមដាន សាធារណមតិ បណ្តាញសង្គមនានា ដើម្បីឆ្លើយបំភ្លឺ និងបកស្រាយបានទាន់ពេលវេលាតាមរយៈ Messenger ឬ Telegram ជាដើម។

សូមបញ្ជាក់ថា វគ្គបំពាក់បំប៉ន ស្តីពីការពង្រឹងសមត្ថភាពលើការងារព័ត៌មាន និងសាធារណមតិ រយៈពេលពីរថ្ងៃ ចាប់ពីថ្ងៃទី១៧ ដល់ថ្ងៃទី១៨ ខែកញ្ញា ឆ្នាំ២០២៥នេះ មានបទអន្តរាគមន៍ស្តីពីប្រធានបទការងារជំនាញរួមមាន  ១- បច្ចេកទេសរៀបចំ និងខ្លឹមសារបែបសាធារណមតិ ដោយឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មាន ២- ការគ្រប់គ្រងព័ត៌មាន និងសាធារណមតិក្នុងរបត់ថ្មី  ដែលបង្ហាញដោយឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន  ៣- ការចងក្រងបណ្តាញ ការគ្រប់គ្រងព័ត៌មាន ការផលិតមាតិកា សម្រាប់ផ្សាយបែបឌីជីថល ជាពិសេសបណ្តាញសង្គម ដោយកញ្ញា បូរិន សុភាវុទ្ធតី អនុព័ន្ធសារព័ត៌មាន នៃខុទ្ទកាល័យឯកឧត្តមរដ្ឋមន្ត្រីក្រសួងព័ត៌មាន    ៤-ការតាមដាន វិភាគចងក្រងព័ត៌មាន និងការឆ្លើយតបព័ត៌មានក្លែងក្លាយដោយកញ្ញា ឆន ណាវី អគ្គនាយិការង នៃអគ្គនាយកដ្ឋានព័ត៌មាន និងសោតទស្សន៍  ៥- របៀបរបបការងាររបស់មន្ទីរព័ត៌មាន និងក្រុមការងារពាក់ព័ន្ធ ដោយលោក ខាត់ សុគន្ធឌីណា ប្រធានមន្ទីរសម្របសម្រួលមន្ទីររាជធានី ខេត្ត និងទី៦- ការគ្រប់គ្រង និងវាយតម្លៃសមិទ្ធកម្មការងារ ដោយកញ្ញា ម៉ា បុប្ផា អនុប្រធាននាយកដ្ឋាននីតិកម្ម នៃអគ្គនាយកដ្ឋានព័ត៌មាន និងសោតទស្សន៍ ៕

ដោយ៖ រិទ្ធី