AKP កំពង់ធំ ថ្ងៃទី១៧ ខែកញ្ញា ឆ្នាំ២០២៥--ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ និងលោក អ៊ុង វុទ្ធី អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តកំពង់ធំអញ្ចើញជាអធិបតីក្នុងសិក្ខាសាលាផ្សព្វផ្សាយផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨ ជូនសមាជិកសមាជិកាក្រុមប្រឹក្សាសកម្មភាពជនពិការខេត្តកំពង់ធំនៅសាលប្រជុំសាលាខេត្តកំពង់ធំ កាលពីថ្ងៃទី១៦ ខែកញ្ញា ឆ្នាំ២០២៥ ដោយមានការចូលរួមពីប្រធាន អនុប្រធានមន្ទីរជុំវិញខេត្ត កងកម្លាំងទាំង៣ អភិបារងក្រុង ស្រុក សមាជិកសមាជិការក្រុមប្រឹក្សាសកម្មភាពជនពិការខេត្ត មេឃុំ ចៅសង្កាត់ ស្មៀន ឃុំសង្កាត់និងតំណាងអង្គការដៃគូផងដែរ។

លោក ឈុន សារ៉ន ប្រធានមន្ទីរសង្គមកិច្ច អតីយុទ្ធជន និងយុវនីតិសម្បទាខេត្តកំពង់ធំ បានធ្វើរបាយការណ៍វឌ្ឍនភាពលើវិស័យពិការភាពរបស់ក្រុមប្រឹក្សាសកម្មភាពជនពិការខេត្តស្តីពីការសម្របសម្រួលនិងពិនិត្យផ្ទៀងផ្ទាត់ ដើម្បីបញ្ជូនទិន្នន័យជនមានពិការភាពដែលបានសម្ភាសន៍កំណត់អត្តសញ្ញាណកម្មពិការភាពដោយមន្ត្រីឃុំ សង្កាត់ទៅតាមប្រភេទនិងកម្រិតពិការភាពនៅទូទាំងខេត្តមកដល់ពេលនេះមានចំនួន១៣៣៩៧នាក់ (ស្រី៦៦៨៥នាក់) បានទទួលមរណភាព ៣៦៤នាក់ (ស្រី១៩១នាក់)ក្នុងនោះជនមានពិការភាពស្ថិតក្នុងគ្រួសារមានបណ្ណសមធម៌សរុបចំនួន៣៤៥៨នាក់ជនមានពិការភាពបានទទួលបណ្ណសម្គាល់ចំនួន១៣២០១នាក់ (ស្រី៦៦០១នាក់) និងជនមានពិការភាពទទួលបានប្រាក់ឧបត្ថម្ភពីកម្មវិធីជាតិជំនួយសង្គមក្នុងកញ្ចប់គ្រួសារជារៀងរាល់ខែចំនួន២៨៤៦នាក់។

លោក អ៊ុង វុទ្ធី អភិបាលរងខេត្ត និងជាប្រធានក្រុមប្រឹក្សាសកម្មភាពជនពិការខេត្តកំពង់ធំបានលើកឡើងថាក្រុមប្រឹក្សាសកម្មភាពជនពិការខេត្តមានសមាសភាពលោក លោកស្រី មកពីកងកម្លាំងប្រដាប់អាវុធទាំងបី មន្ទីរ អង្គភាព ជុំវិញខេត្ត លោក លោកស្រីអភិបាលរងក្រុង ស្រុក និងអង្គការដៃគូ ជាសមាជិក សរុបចំនួន៣៦នាក់(ស្រី០៦នាក់)ជនមានពិការភាព១នាក់(ស្រី១នាក់)ដោយយោងតាមសេចក្តីសម្រេចលេខ១១១/២៥សសរចុះថ្ងៃទី២៨ ខែកក្កដា ឆ្នាំ២០២៥។

លោក អ៊ុង វុទ្ធី បញ្ជាក់បន្ថែមថារាល់បញ្ហាប្រឈមក៏ដូចជាសំណូមពរ គឺក្រុមប្រឹក្សាសកម្មភាពជនពិការខេត្ត តែងតែលើកយកមកពិភាក្សា និងរួមគ្នាដោះស្រាយទាំងក្នុងពេលកិច្ចប្រជុំនានានិងក្នុងក្រុមតេឡេក្រាមហើយបញ្ហាប្រឈមនិងសំណូមពរណា ដែលក្រុមប្រឹក្សាសកម្មភាពជនពិការខេត្តដោះស្រាយមិនបានគឺគោរពស្នើសុំគោលការណ៍ដ៏ខ្ពង់ខ្ពស់ពីឯកឧត្តមអភិបាលខេត្តដែលជាប្រធានកិត្តិយសក្រុមប្រឹក្សាសកម្មភាពជនពិការខេត្ត ពិនិត្យនិងដាក់ចេញនូវអនុសាសន៍ដើម្បីឱ្យក្រុមប្រឹក្សាសកម្មភាពជនពិការខេត្តបន្តអនុវត្ត។

ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការបញ្ចាក់ថា ផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨ មានគោលបំណងលើកទឹកចិត្ត ធ្វើសកម្មភាពទាំងឡាយ ដើម្បីឆ្លើយតបចំពោះសិទ្ធិនិងភាពចម្រុះរបស់កុមារ យុវជន មនុស្សពេញវ័យនិងមនុស្សវ័យចាស់ ដែលមានពីការភាពប្រភេទផ្សេងៗគ្នាមិនថាពិការភាពនោះបណ្តាលមកពីមូលហេតុអ្វីឡើយ ដូចជាវិកលសម្បទាផ្នែករាងកាយ គំហើញ ការស្តាប់ ញាណដឹងសតិបញ្ញា និងចិត្តសង្គម។

ឯកឧត្តមបន្តថាផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨ នេះបានកំណត់ទិសដៅនិងផែនការ ដែលត្រូវអនុវត្តផ្តោតលើការងារអាទិភាពសំខាន់ៗចំនួន៧រួមមាន÷ ១.ការងារមុខរបរនិងសន្តិសុខផ្នែកសេដ្ឋកិច្ច។ ២.សុខភាពការស្តារលទ្ធភាពពលកម្មនិងសុខុមាលភាព។ ៣.ការអប់រំ និងការសិក្សាពេញមួយជីវិត។ ៤.ប្រព័ន្ធគាំពារសង្គមនិងជីវភាពរស់នៅសមស្រប។ ៥.សហគមន៍ដែលមានបរិយាបន្ននិងមានផាសុកវត្ថុ។ ៦.សមភាពយេនឌ័រសុវត្ថិភាពសិទ្ធិនិងយុត្តិធម៌ និង៧. ស្ថានភាពហានិភ័យ គ្រោះមហន្តរាយនិងការប្រែប្រួលអាកាសធាតុ។

ឯកឧត្តមសង្ឃឹមយ៉ាងមុតមាំថា ក្រោយពីសិក្ខាសាលាផ្សព្វផ្សាយនេះបញ្ចប់ លោក លោកស្រី និងទទួលបាននូវចំណេះដឹងថ្មីៗ ព្រមទាំងចូលរួមលើលកំពស់ដល់ជនមានពិការភាពគ្រប់វ័យគ្រប់ប្រភេទនិងក្រុមគ្រួសាររស់នៅប្រកបដោយស្មើភាពក្នុងសង្គមមានការគោរពសិទ្ធិ សេចក្តីថ្លៃថ្នូរនិងភាពចម្រុះ ព្រមទាំងមានបរិយាបន្នពិការភាពនិងនិរន្តរភាពក្នុងគ្រប់វិស័យ៕

ដោយ ស៊ុម វណ្ណា