AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៥--

អ្នកស្រីបណ្ឌិត Sang Lee នាយិកាអង្គការ WWF អន្តរជាតិប្រចាំតំបន់អាស៊ីអាគ្នេយ៍ដែលទើបតែងតាំងថ្មី បានចូលជួបពិភាក្សាជាមួយឯកឧត្តម បណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន រួមជាមួយថ្នាក់ដឹកនាំរបស់ អង្គការ WWF-កម្ពុជា ដើម្បីពង្រឹងកិច្ចសហប្រតិបត្តិការលើការការពារជីវៈចម្រុះនៅកម្ពុជា ពិសេសនោះ គឺតំបន់ទេសភាពខ្ពង់រាបភាគខាងកើត និងប្រភេទសត្វជិតផុតពូជ។ នេះបើតាមការឱ្យដឹងពីអង្គការ WWF នៅថ្ងៃទី១៦ ខែកញ្ញា ឆ្នាំ២០២៥។

នៅក្នុងជំនួបពិភាក្សានេះ ភាគីទាំងអស់បានជជែកដោយផ្តោតលើការងារសំខាន់ៗដូចជា កម្មវិធីស្ដារឡើងវិញនូវប្រភេទសត្វព្រៃ ការគ្រប់គ្រងតំបន់ការពារប្រកបដោយនិរន្តរភាព និងការតភ្ជាប់ទេសភាព រួមនឹងការបង្ហាញពីកម្មវិធីថ្មីដែលនឹងធ្វើការទៅលើបញ្ហាការប្រែប្រួលអាកាសធាតុ ដែលគាំទ្រទៅដល់កិច្ចខិតខំប្រឹងប្រែងរបស់កម្ពុជាទៅកាន់អនាគតដែលមានការបំភាយតិចតួច ធម្មជាតិស្អាត ការរួមបញ្ចូលថាមពលកកើតឡើងវិញ ប្រសិទ្ធភាពថាមពល និងការអនុវត្តការប្រើប្រាស់ដីប្រកបដោយនិរន្តរភាព។

នៅក្នុងកិច្ចពិភាក្សានេះដែរ ក៏បានបង្ហាញពីសារៈសំខាន់នៃភាពជាដៃគូយុទ្ធសាស្ត្ររវាងអង្គការ WWF និងក្រសួងបរិស្ថាន ដើម្បីការពារសត្វព្រៃដែលជានិមិត្តរូប ពង្រឹងប្រព័ន្ធអេកូឡូស៊ី និងជំរុញការអភិវឌ្ឍន៍ប្រកបដោយចីរភាពដែលផ្តល់ផលប្រយោជន៍ទាំងមនុស្ស និងធម្មជាតិ៕

ដោយ ណយ នឿន (ប្រភព៖ WWF)