AKP ភ្នំពេញ ថ្ងៃទី១៦ ខែកញ្ញា ឆ្នាំ២០២៥-- ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាពក្នុងជំនួបពិភាក្សាការងារជាមួយលោកវរសេនីយ៍ឯក S.muthukrishnan នាយការិយាល័យអនុព័ន្ធយោធាឥណ្ឌាប្រចាំព្រះរាជាណាចក្រកម្ពុជា នាមជ្ឈមណ្ឌលជាតិរក្សាសន្តិភាព រសៀលថ្ងៃទី១៦ ខែកញ្ញា ឆ្នាំ២០២៥ បានថ្លែងអំណរគុណយ៉ាងជ្រាលជ្រៅចំពោះប្រទេសឥណ្ឌាសម្រាប់កិច្ចសហប្រតិបត្តិការជាបន្តបន្ទាប់ជាមួយកម្ពុជា។

ឯកឧត្តម ឧត្តមសេនីយ៍ទោ សែម រតនា បានថ្លែងថា ការសហការរបស់មជ្ឈមណ្ឌលជាតិរក្សាសន្តិភាពជាមួយប្រទេសឥណ្ឌាបានធ្វើឡើងនៅក្នុងកិច្ចការផ្សេងៗគ្នាមួយចំនួនជាពិសេសការងារបណ្តុះបណ្តាលដល់កងកម្លាំងរបស់កម្ពុជាលើជំនាញបោសសម្អាតមីន និងយុទ្ធភណ្ឌមិនទាន់ផ្ទុះ ការបណ្តុះបណ្តាល បុគ្គលិក និងប្រតិបត្តិការរក្សាសន្តិភាព ក្នុងនោះរដ្ឋាភិបាលឥណ្ឌាក៏បានផ្តល់សម្ភារបណ្តុះបណ្តាលក្នុងការបោសសម្អាតមីន និងយុទ្ធភណ្ឌមិនទាន់ផ្ទុះជាច្រើនផងដែរ។

ឯកឧត្តមបានជម្រាបជូនលោកវរសេនីយ៍ឯក S.muthukrishnan ផងដែរថា សម្រាប់ការបំពេញបេសក កម្មក្រោមឆ័ត្រអង្គការសហប្រជាជាតិនៅតាមបណ្តាប្រទេសនានាគឺកងកម្លាំងមួកខៀវកម្ពុជា និងឥណ្ឌា មានកិច្ចសហប្រតិបត្តិការល្អជាមួយគ្នា ក្នុងនោះនៅតំបន់បេសកកម្មនៅសាធារណរដ្ឋលីបង់ កងកម្លាំងកម្ពុជា និងឥណ្ឌា ដែលមានទីតាំងនៅជាប់គ្នាបានអនុញ្ញាតឱ្យកងកម្លាំងទាំងពីរចែករំលែកបទពិសោធន៍ និងប្រពៃណីដល់គ្នាទៅវិញទៅមក។ កងកម្លាំងឥណ្ឌាបានផ្តល់ការការពារដល់កងកម្លាំងកម្ពុជាក្នុងអំឡុងពេលបំពេញបេសកកម្មនៅក្នុង និងជុំវិញមូលដ្ឋានរបស់ពួកគេ ខណៈដែលកម្លាំងវិស្វកម្មកម្ពុជាក៏ជួយសាងសង់ប៉ុស្តិ៍សន្តិសុខ ប៉ុស្តិ៍ត្រួតពិនិត្យ និងទីជម្រកផងដែរ។

ដោយឡែកនៅតំបន់បេសកកម្មនៅសាធារណរដ្ឋស៊ូដង់ខាងត្បូង កម្លាំងឥណ្ឌាបាន និងកំពុងផ្តល់កិច្ចសហប្រតិបត្តិការល្អជាមួយកងកម្លាំងកម្ពុជា ដោយពិនិត្យ និងផ្តល់ការព្យាបាលដល់កងកម្លាំងកម្ពុជា ដែលឈរជើងនៅជូបា និងម៉ាឡាកាល់ ព្រមទាំងផ្តល់ការការពារដល់កងកម្លាំងកម្ពុជា ដែលឈរជើងនៅម៉ាឡាកាល់ថែមទៀតផង ដែលកិច្ចការទាំងប៉ុន្មានខាងលើនេះខាងភាគីកម្ពុជាសូមថ្លែងអំណរគុណយ៉ាង ជ្រាលជ្រៅចំពោះភាគីឥណ្ឌា ដែលជាប្រទេសជាមិត្ត ហើយតែងតែមានទំនាក់ទំនងយ៉ាងជិតស្និទ្ធជាមួយកម្ពុជាជារៀងរហូតមក។

ជាការឆ្លើយតប លោកវរសេនីយ៍ឯក S.muthukrishnan នាយការិយាល័យអនុព័ន្ធយោធាឥណ្ឌាប្រចាំកម្ពុជាបានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការល្អរវាងកម្ពុជា និងឥណ្ឌា ព្រមទាំងបានបង្ហាញនូវការពេញចិត្តចំពោះកិច្ចសហប្រតិបត្តិការរបស់កងទ័ពឥណ្ឌាជាមួយមជ្ឈមណ្ឌលជាតិរក្សាសន្តិភាពរបស់កម្ពុជាលើការបណ្តុះបណ្តាលកងកម្លាំងរក្សាសន្តិភាពអង្គការសហប្រជាជាតិ។ 

លោកវរសេនីយ៍ឯកបានបញ្ជាក់ជូនឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាពថា ឥណ្ឌានឹងនៅតែបន្តកិច្ចសហការជាមួយមជ្ឈ មណ្ឌលជាតិរក្សាសន្តិភាពរបស់កម្ពុជា ដោយផ្តល់នូវអ្វីៗតាមតែលទ្ធភាពដែលឥណ្ឌាមាន៕

ដោយ៖ ចាន់ សុភឿន