AKP ភ្នំពេញ ថ្ងៃទី២៨ ខែសីហា ឆ្នាំ២០២៥--
អ្នកសារព័ត៌មានមកពី៦ ប្រទេស រួមមាន ឥណ្ឌូណេស៊ី ម៉ាឡេស៊ី វៀតណាម ចិន សឹង្ហបុរី និងកម្ពុជា ចូលរួមសិក្ខាសាលាថ្នាក់តំបន់ស្តីពី «ការគ្រប់គ្រងសុវត្ថិភាព និងហានិភ័យក្នុងការរាយការណ៍ស្តីពីជម្លោះ» (Safety and Risk Management Conflict Reporting) នៅព្រឹកថ្ងៃទី២៨ ខែសីហា ឆ្នាំ២០២៥ ក្នុងខេត្តសៀមរាប។
ពិធីបើកសិក្ខាសាលានេះប្រព្រឹត្តធ្វើឡើងក្រោមវត្តមានឯកឧត្ត ហាស់ សំអាត រដ្ឋលេខាធិការ ក្រសួងព័ត៌មាន, ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន, ឯកឧត្តម ស្លេះ អាល់ហ្វីន អនុរដ្ឋលេខាធិការ ក្រសួងព័ត៌មាន, ឯកឧត្តម លឹម ជ័យ ទ័ត្ត ទីប្រឹក្សាក្រសួងព័ត៌មាន។ 

តាមរយៈសិក្ខាសាលាអ្នកសារព័ត៌មានបានស្វែងយល់មួយកម្រិតបន្ថែមទៀតពីការរាយកាណ៍ក្នុងស្ថានភាពតានតឹង និងជម្លោះ។ ក្នុងនោះ អ្នកសារព័ត៌មានក្នុងតំបន់ក៏បានចែករំលែកបទពិសោធន៍ និងការអនុវត្តល្អៗទៅវិញទៅមកផងដែរ។ 
គួរបញ្ជាក់ផងដែរថា បន្ទាប់ពីសិក្ខាសាលានាព្រឹកថ្ងៃទី២៨នេះ អ្នកសារព័ត៌មាននឹងចុះពិនិត្យ និងយកព័ត៌មាននៅទីតាំងដែលរងការប៉ះពាល់ដោយការវាយប្រហារដោយកងទ័ពថៃក្នុងខេត្តបន្ទាយមានជ័យ មណ្ឌលសុវត្ថិភាពពោធិ៍៥០០០ដើម ក្នុងខេត្តព្រះវិហារ និងភូមិជោគជ័យ និងភូមិព្រៃចាន់ ក្នុងខេត្តបន្ទាយមានជ័យ៕

ដោយ៖ រិទ្ធី