AKP ព្រះសីហនុ ថ្ងៃទី ២៨ សីហា ឆ្នាំ២០២៥ -- លោកស្រីភារធារីនៃទូតស្ថានទូតអាម៉េរិក Bridgette Walker បានដឹកនាំមន្ត្រីការទូត និងបុគ្គលិកស្ថានទូតសហរដ្ឋអាមេរិក ទៅបំពេញទស្សនកិច្ចការងារ នៅខេត្តព្រះសីហនុ ចាប់ពីថ្ងៃទី ២៦ ដល់ ៣០ ខែសីហា ដើម្បីអបអរសាទរខួបលើកទី ៧៥ ឆ្នាំនៃទំនាក់ទំនងការទូតរវាងសហរដ្ឋអាមេរិក និងកម្ពុជា តាមរយៈសកម្មភាពជាច្រើនក្នុងកម្មវិធី «សប្តាហ៍ស្ថានទូត ខេត្តព្រះសីហនុ ២០២៥ ៖ ៧៥ ឆ្នាំនៃភាពជាដៃគូ និងមិត្តភាព»។

ដោយសារមានគំនិតផ្តួចផ្តើមនេះ មន្ត្រី និងបុគ្គលិកស្ថានទូតអាមេរិក ធ្វើដំណើរទៅខេត្តព្រះសីហនុ ដើម្បីសម្តែងការគោរពចំពោះគុណតម្លៃ និងចក្ខុវិស័យរួម ដែលបានកំណត់ភាពជាដៃគូយូរអង្វែង រវាងសហរដ្ឋអាមេរិក និងប្រទេសកម្ពុជា ចាប់តាំងពីឆ្នាំ ១៩៥០ មក។ កម្មវិធីដែលមានរយៈពេលមួយសប្តាហ៍ ផ្តោតលើការលើកកម្ពស់កាលានុវត្តភាពសេដ្ឋកិច្ច ការលើកកម្ពស់ផ្នែកសុខភាព សន្តិសុខ ការគាំទ្រ ដល់ការអភិរក្សបេតិកភណ្ឌវប្បធម៌ខ្មែរ និងការចូលរួមរបស់យុវជនកម្ពុជាក្នុងសកម្មភាពនានា។ នេះបើយោងតាមសេចក្ដីប្រកាសព័ត៌មានរបស់ស្ថានទូតអាម៉េរិកប្រចាំកម្ពុជា។

លោកស្រីភារធារី Bridgette Walker និងមន្រ្តីស្ថានទូត ដែលតំណាងឱ្យទីភ្នាក់ងារនានារបស់រដ្ឋាភិបាលសហរដ្ឋអាមេរិកចំនួន ៦ បានជួបជាមួយ ឯកឧត្ដម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ដើម្បីពង្រឹងទំនាក់ទំនងទ្វេភាគី និងពង្រឹងបន្ថែម នូវទំនាក់ទំនងសេដ្ឋកិច្ច។ ភាគីទាំងពីរ ថែមទាំងបានបើកសម្ពោធស្លាកអបអរសាទរខួបលើកទី ៧៥ ឆ្នាំ នៅលើផ្លូវជាតិលេខ ៤ ជាផ្លូវសំខាន់មួយ ដែលសហរដ្ឋអាមេរិកបាន កសាងនៅឆ្នាំ ១៩៥៩ ដើម្បីតភ្ជាប់កំពង់ផែក្រុងព្រះសីហនុ ទៅកាន់តំបន់ផ្សេងទៀតនៃប្រទេសកម្ពុជា។

លោកស្រីភារធារី Walker បានមានប្រសាសន៍ថា៖ «ព្រឹត្តិការណ៍ដ៏សំខាន់នេះបង្ហាញពីភាពរឹងមាំនៃទំនាក់ទំនងរវាងសហរដ្ឋអាមេរិក និងប្រទេសកម្ពុជា និងការប្តេជ្ញារួមគ្នា ក្នុងការកសាងអនាគតដ៏ភ្លឺស្វាងជាមួយគ្នា។ សប្តាហ៍ស្ថានទូតនៅខេត្តព្រះសីហនុ បង្ហាញពីការប្តេជ្ញារបស់យើងក្នុងការលើកស្ទួយទំនាក់ទំនងដ៏មានន័យនៅទូទាំងព្រះរាជាណាចក្រកម្ពុជា ហើយបង្កើតឱកាសដែលមានប្រយោជន៍សម្រាប់ប្រទេសទាំងពីរ»។

សកម្មភាពសំខាន់ៗនៃកម្មវិធី «សប្តាហ៍ស្ថានទូត ខេត្តព្រះសីហនុ ២០២៥ ៖ ៧៥ ឆ្នាំនៃភាពជាដៃគូ និងមិត្តភាព» រួមមានការពង្រឹងភាពជាដៃគូផ្នែកសេដ្ឋកិច្ច និងកាលានុវត្តភាពផ្នែកធុរកិច្ច និងការតភ្ជាប់ទំនាក់ទំនងគ្នារវាងអ្នកដឹកនាំធុរកិច្ចអាមេរិក និងកម្ពុជា។ ដើម្បីលើកកម្ពស់សុវត្ថិភាព សន្តិសុខ និងសហប្រតិបត្តិការផ្នែកសុខភាព មន្រ្តីស្ថានទូតបានផ្តល់ការបណ្តុះបណ្តាលលើកកម្ពស់សមត្ថភាពដល់មន្ត្រីមានសមត្ថកិច្ច សន្តិសុខនៅខេត្តព្រះសីហនុ និងបានចុះពិនិត្យមន្ទីរពេទ្យព្យាបាលជំងឺអេដស៍ ដែលទទួលបានការជួយគាំទ្រថវិកាពីសហរដ្ឋអាមេរិក។
កម្មវិធីនេះជាផ្នែកមួយនៃការលើកកម្ពស់ការចូលរួមរបស់យុវជន និងការផ្លាស់ប្តូរការសិក្សាអប់រំ លោកស្រីភារធារី Walker ក៏បានដឹកនាំកិច្ចសំណេះសំណាលជាមួយយុវជន ដើម្បីទទួលស្តាប់ផ្ទាល់ពីពួកគេ ផ្តល់ព័ត៌មានអំពីឱកាសទទួលជំនួយគាំទ្រពីសហរដ្ឋអាមេរិកសម្រាប់សិក្សាភាសាអង់គ្លេស សិក្សានៅសហរដ្ឋអាមេរិក ចូលរួមក្នុងកម្មវិធីផ្លាស់ប្តូរការសិក្សា និងផ្តល់ព័ត៌មានត្រឹមត្រូវ អំពីដំណើរការសុំទិដ្ឋាការ។ លោកស្រីភារធារី ក៏បានប្រកាសជ័យលាភីអ្នកឈ្នះរង្វាន់ ក្នុងការប្រកួតសរសេរអត្ថបទជាភាសាអង់គ្លេស ស្តីពីអនាគតនៃទំនាក់ទំនងទ្វេភាគី ដែលជាការចូលរួមប្រកួតពីនិស្សិតសាកលវិទ្យាល័យ និងសិស្សវិទ្យាល័យ នៅខេត្តព្រះសីហនុផងដែរ។

ជាបន្ថែមលើការជួយគាំទ្រជាយូរមករបស់សហរដ្ឋអាមេរិកលើការអភិរក្សបេតិកភណ្ឌវប្បធម៌ និងសិល្បៈ ស្ថានទូតបានដាក់បញ្ចាំងភាពយន្តឯកសារដែលមានចំណងជើងថា ៖ «Loot: A Story of Crime and Redemption» ជាភាពយន្តឯកសារទាក់ទងនឹងឧក្រិដ្ឋកម្មនៃការជួញដូរវត្ថុបុរាណ ដែលសហរដ្ឋអាមេរិកបានជួយសម្របសម្រួលលើការធ្វើមាតុភូមិនិវត្តន៍នៃវត្ថុបុរាណខ្មែរជាទីសក្ការៈ ត្រឡប់មកវិញ។ កម្មវិធីនេះក៏មានវេទិកាសន្ទនាជាមួយមន្រ្តីស្ថានទូតអាមេរិក មន្រ្តីក្រសួងវប្បធម៌ និងវិចិត្រសិល្បៈ និង សហអ្នកនិពន្ធនិងកែសម្រួលសាច់រឿង។
សូមជម្រាបជូនថា កម្មវិធី «សប្តាហ៍ស្ថានទូត ខេត្តព្រះសីហនុ ២០២៥ ៖ ៧៥ ឆ្នាំនៃភាពជាដៃគូ និងមិត្តភាព» បញ្ជាក់ពីការប្តេជ្ញារបស់សហរដ្ឋអាមេរិក ក្នុងការគាំទ្រការអភិវឌ្ឍ និងភាពរុងរឿងរបស់កម្ពុជា ក្នុងពេលអបអរនូវប្រវត្តិសាស្ត្រដ៏សម្បូរបែបនៃកិច្ចសហប្រតិបត្តិការរវាងប្រទេសទាំងពីរ។ សកម្មភាពទាំងនេះ មិនត្រឹមតែជំរុញគោលដៅរួមតែប៉ុណ្ណោះទេ ប៉ុន្តែថែមទាំងពង្រឹងបន្ថែម នូវភាពជាអ្នកដឹកនាំរបស់សហរដ្ឋអាមេរិក ក្នុងការលើកស្ទួយស្ថិរភាព កំណើនសេដ្ឋកិច្ច និងសន្តិសុខក្នុងសាកលលោកថែមទៀតផង ៕

ដោយ៖ រិទ្ធី