AKP កណ្ដាល ថ្ងៃទី២៨ ខែសីហា ឆ្នា២០២៥-- ដើម្បីឱ្យការប្រឡងសញ្ញាបត្រមធ្យមសិក្សាទុតិយភូមិប្រព្រឹត្តទៅមានសណ្តាប់ធ្នាប់រៀបរយល្អ ធានានូវភាពយុត្តិធម៌ ប្រកបដោយគុណភាព និងតម្លាភាព នៅថ្ងៃទី២៨ ខែសីហា ឆ្នាំ២០២៥នេះ ឯកឧត្តម គួច ចំរើន អភិបាលខេត្តកណ្តាល ព្រមទាំងអាជ្ញាធរក្រុងតាខ្មៅ បានអញ្ជើញចុះពិនិត្យការប្រឡង និងចូលរួមបើកវិញ្ញាសារប្រលងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៨ សីហា ២០២៥ នៅវិទ្យាល័យ ហ៊ុន សែន សេរីភាព ក្រុងតាខ្មៅ។

ក្នុងឱកាសនោះ ឯកឧត្តម គួច ចំរើន បានលើកទឹកចិត្ត និងផ្តាំផ្ញើដល់ក្មួយៗជាសិស្សានុសិស្សទាំងអស់ សូមកុំមានការភិតភ័យ ត្រូវខិតខំប្រឹងប្រែងឱ្យអស់ពីសមត្ថភាព ធ្វើឱ្យបានរួចរាល់លើគ្រប់វិញ្ញាសា និងសូមបេក្ខជនទាំងអស់ ត្រូវគោរពបទប្បញ្ញត្តិនៃការប្រឡងឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិកគ្រប់ប្រភេទ និងឯកសារផ្សេងៗចូលក្នុងមណ្ឌលប្រឡង ឬបន្ទប់ប្រឡងជាដាច់ខាត ករណីរកឃើញនោះនឹងត្រូវកំណត់ឱ្យធ្លាក់ដោយស្វ័យប្រវត្តិ។ ឯកឧត្តមក៏បានជូនពរដល់សិស្សានុសិស្សទាំងអស់ សូមទទួលបានលទ្ធផលជោគជ័យ និងទទួលបាននិទ្ទេសល្អគ្រប់ៗគ្នាក្នុងសម័យប្រឡងឆ្នាំនេះ ដើម្បីជាទុនសម្រាប់បន្តការសិក្សានៅថ្នាក់ឧត្តមសិក្សាបន្ថែមទៀត។

យោងតាមរបាយការណ៍របស់លោក ចេង សំអ៊ុល ប្រធានមន្ទីរអប់រំ យុវជន និងកីឡាខេត្តកណ្ដាល បានឱ្យដឹងថា ឆ្នាំនេះខេត្តកណ្ដាលមានមណ្ឌលប្រឡងសញ្ញាបត្រមធ្យមសិក្សាទុតិយភូមិចំនួន១៩មណ្ឌល ស្មើនឹង៥០៤បន្ទប់ កើន៣៩បន្ទប់  ដែលមានថ្នាក់វិទ្យាសាស្ត្រ០៦មណ្ឌល និងថ្នាក់វិទ្យាសាស្ត្រសង្គម១៣មណ្ឌល។ មណ្ឌលទាំង១៩នោះគឺមាននៅតាមសាលាក្នុងក្រុង-ស្រុកចំនួន៦ មានបេក្ខជនចុះឈ្មោះក្នុងបញ្ជីប្រឡងសញ្ញាបត្រមធ្យមសិក្សាទុតិយភូមិ សរុបចំនួន១២៤២១នាក់ ស្រី៧០០៥នាក់ ក្នុងនោះថ្នាក់វិទ្យាសាស្រ្តចំនួន៣១៨៤នាក់ ស្រី១៩៦១នាក់ និងថ្នាក់វិទ្យាសាស្រ្តសង្គម ចំនួន៧៩៨០នាក់ ស្រី៤៤៨១នាក់។ បេក្ខជនស្វៃរិនចំណេះទូទៅ ថ្នាក់វិទ្យាសាស្រ្ត ០១នាក់ ស្រី ថ្នាក់វិទ្យាសាស្រ្តសង្គម ៩០៥នាក់ ស្រី៤៥៩នាក់។ បេក្ខជនបំពេញវិជ្ជា ថ្នាក់វិទ្យាសាស្រ្ត៖ គ្មាន និងថ្នាក់វិទ្យាសាស្រ្តសង្គម ចំនួន៣១៦នាក់ ស្រី ៩២នាក់។ បេក្ខជនស្វៃរិនបំពេញវិជ្ជា ថ្នាក់វិទ្យាសាស្រ្ត៖ គ្មាន និងថ្នាក់វិទ្យាសាស្រ្តសង្គម ចំនួន៣៥នាក់ ស្រី១១នាក់៕

ដោយ ណយ នឿន (ប្រភព៖ រដ្ឋបាលខេត្តកណ្តាល)