AKP ភ្នំពេញ ថ្ងៃទី២៨ ខែសីហា ឆ្នាំ២០២៥--ឯកឧត្ដម ឃួង ស្រេង អភិបាលរាជធានីភ្នំពេញ នាព្រឹកថ្ងៃទី២៨ សីហា ឆ្នាំ២០២៥ បានអញ្ជើញចូលរួមជាមួយឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡានិងឯកឧត្តមហ៊ុន ម៉ានី ឧបនាយករដ្ឋមន្ត្រីរដ្ឋមន្ត្រីក្រសួងមុខងាសាធារណៈ និងជាប្រធានសហភាពសហពន្ធ័យុវជនកម្ពុជា ក្នុងពិធីបើកវិញ្ញាសាប្រឡងសញ្ញាប័ត្រមធ្យមសិក្សាទុតិយភូមិ ដែលបានធ្វើឡើងនៅវិទ្យាល័យព្រះស៊ីសុវត្ថិ ខណ្ឌដូនពេញ។

     ឯកឧត្តមបណ្ឌិតសភាចារ្យ ហង់ជួន ណារ៉ុន បានមានប្រសាសន៍ថា ដោយមានការឈ្លានពានពីទាហានថៃ នៅតាមបណ្ដោយព្រំដែនកម្ពុជា-ថៃពិសេសនៅក្នុងខេត្តព្រះវិហារនិងខេត្តឧត្ដរមានជ័យបានធ្វើឲ្យសាលារៀនមួយចំនួនត្រូវបានបិទទ្វារ ដែលធ្វើឱ្យការប្រឡងបញ្ញាប័ត្រមធ្យមសិក្សាទុតិយភូមិឆ្នាំនេះត្រូវបានពន្យារពេល។

 ការប្រឡងសញ្ញាប័ត្រមធ្យមសិក្សាទុតិយភូមិគ្រោងនឹងត្រូវធ្វើឡើងនៅថ្ងៃទី១៨សីហា តែឆ្នាំនេះយើងបានពន្យាពេលសម័យប្រឡងមកនៅថ្ងៃទី២៨ខែសីហាវិញ។

   ឯកឧត្ដមបន្តថាដោយសារខេត្ត២ បានប្រឈមទៅនឹងការឈ្លានពានរបស់កងទ័ពថៃ ក្រសួងអប់រំយុវជននិងកីឡាបានបង្កើតមណ្ឌលប្រឡងនៅក្នុងទីរួមខេត្តព្រះវិហារ ដែលមានចំងាយប្រមាណជា១០០គីឡូម៉ែត្រពីព្រំដែន ហើយសម្រាប់ខេត្តឧត្ដរមានជ័យយើងក៏បានដាក់មណ្ឌលប្រឡងនៅក្នុងស្រុកពួកខេត្តសៀមរាប ជាមួយនឹងការគិតគូរ ដល់បេក្ខជនពីការស្នាក់នៅ និងកាជួយឧបត្ថម្ភដល់បេក្ខជនផងដែរ។

   ឯកឧត្តមក៏បានថ្លែងនូវការអរគុណយ៉ាងជ្រាលជ្រៅផងដែរ ចំពោះ បងប្អូនប្រជាពលរដ្ឋក៏ដូចជាសប្បុរសជននានា ដែលបានជួយឧបត្ថម្ភទៅដល់ជនភៀសសឹក និងសិក្សានុសិស្ស នៅពេលដែលចោរសៀមឈ្លានពាន។ នេះបានបង្ហាញឱ្យឃើញពីសាមគ្គីភាពជាធ្លុងមួយរបស់ប្រជាពលរដ្ឋខ្មែរ ហើយក៏បានបង្ហាញឲ្យឃើញពីការគាំទ្រ ចំពោះការដឹកនាំរបស់សម្ដេចតេជោហ៊ុន សែន អតីតនាយករដ្ឋមន្ត្រីនិងសម្ដេចបវរអធិបតី ហ៊ុន ម៉ាណែតនាយករដ្ឋមន្ត្រី ក្នុងកិច្ចការពារបូរណភាពទឹកដី ដោយមិនឲ្យបាត់បង់ដីមួយមីលីម៉ែត្រណាឡើយ ។  ក្រសួងអប់រំយុវជននិង កីឡា បានឧបត្ថម្ភការស្នាក់នៅរបស់បេក្ខជនចំនួន៤កន្លែងនៅខេត្តឧត្ដរមានជ័យនិង២កន្លែងទៀតនៅខេត្តព្រះវិហារ ដោយផ្ដល់ថវិកាគាំទ្រ ក្នុងម្នាក់ៗចំនួន២ម៉ឺនរៀល។

  ឯកឧត្តមក៏បានបន្ថែមទៀតថា៖ក្នុងរយៈពេល១២ឆ្នាំចុងក្រោយនេះ ប្រាក់ខែគ្រូបង្រៀន បានកើនឡើងដល់ជិត៣ដង។ជាមួយគ្នានោះដែរ សិស្សដែលមាននិន្ទេស A B និងCបានចូលធ្វើជាគ្រូបង្រៀនប្រមាណ៧៥% នេះបង្ហាញឲ្យឃើញពី អ្នកមានសមត្ថភាព ចូលធ្វើជាគ្រូបង្រៀន។ រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោហ៊ុន សែននិងបន្តមកសម្ដេចបវធិបតីហ៊ុន ម៉ាណែត បានកសាងអគារសិក្សា បានចំនួន៤៥០០អគារ ហើយអ គារដែល សាងសង់ដោយក្រសួងអប់រំយុវជននិងកីឡាមានប្រមាណ ១០០០អគារ។
  ឯកឧត្តមរដ្ឋមន្ត្រីក៏បានបញ្ជាក់ផងដែរថា យុវជនយើងបច្ចុប្បន្ននេះ ពិតជាមានសមត្ថភាពល្អប្រសើរជាងមុន ដោយយើងបានរៀបចំជាសាលាគំរូ។ ពាក់ព័ន្ធនឹងសាលាគំរូនេះដែរ យើងនឹងរៀបចំឲ្យមានសាលាគំរូនេះពី៥០០ទៅ១០០០ សាលានៅឆ្នាំ ២០២៨ខាងមុខ ។ សាលាជំនាន់ថ្មី ព្រះស៊ីសុវត្ថិ សិស្សានុសិស្ស ពិតជាមានសមត្ថភាព មិនចាញ់សិស្សនៅសិង្ហបុរីនោះទេ ពេលខ្លះសិស្សរបស់យើងមានសមត្ថភាពខ្លាំងជាងសិស្សនៅសង្ហបុរី ទៀតផងពិសេសគឺសិស្សនារី ហើយសូម្បីតែការនិយាយភាសាក៏មានលក្ខណៈល្អប្រសើរជាងសិស្សនៅសិង្ហបុរីដែរ។
   ឯកឧត្តមឧបនាយករដ្ឋមន្ត្រីហ៊ុន ម៉ានី ក្នុងឱកាសនោះក៏បាន មានប្រសាសន៍ផងដែរថា៖ សម្រាប់សហភាពសហពន្ធ័យុវជនកម្ពុជា តែងបានសហការ ជាមួយនឹងក្រសួងអប់រំយុវជននិងកីឡាក្នុងការរៀបមណ្ឌលប្រឡងដោយបានជួយសម្របសម្រួលដល់ការស្នាក់នៅរបស់បេក្ខជនប្រឡងជាមួយនឹងដាក់កម្លាំង ការពារម៉ូតូ កង់របស់បេក្ខជន កុំឲ្យពួកគាត់មានការព្រួយបារម្ភពីការបាត់បង់។
   ដើម្បីចូលរួមចំណែកឱ្យដំណើរការប្រឡងសញ្ញាបត្រមធ្យមសិក្សាទុតិយភូមិ នៅរាជធានីភ្នំពេញ ប្រព្រឹត្តទៅដោយរលូន និងជោគជ័យ ជាពិសេសធានារក្សាបាននូវសន្តិសុខ សុវត្ថិភាព សណ្តាប់ធ្នាប់ តម្លាភាព និង របៀបរៀបរយសាធារណៈនៅជុំវិញមណ្ឌលប្រឡងទាំង ៣៥មណ្ឌល ក្នុងរាជធានីភ្នំពេញ រដ្ឋបាលរាជធានីភ្នំពេញ ក៏បានសម្រេចឱ្យ ផ្អាកជាបណ្តោះអាសន្នចំពោះទីតាំងអាជីវកម្មថតចម្លងឯកសារ អិនធឺណិត និងអាជីវកម្មលក់សម្ភារៈសិក្សា គ្រប់ប្រភេទ ចាប់ពីថ្ងៃទី២៨-២៩ ខែសីហា ឆ្នាំ២០២៥។ ផ្អាកជាបណ្តោះអាសន្ននូវអាជីវកម្មនានា ជុំវិញបរិវេណមណ្ឌលប្រឡងនិងមិនតម្រូវឱ្យបង់ប្រាក់សម្រាប់ ការផ្ញើកង់-ម៉ូតូនៅតាមមណ្ឌលប្រឡងឡើយ៕ ដោយ៖  សួស សំរិត