AKP សៀមរាប ថ្ងៃទី២៨ ខែសីហា ឆ្នាំ២០២៥-- ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានឱ្យដឹងថា បើទោះបីជាខេត្តជាយដែនមួយនេះកំពុងត្រូវបានញាំញីដោយអំពើឈ្លានពានពីសំណាក់ភាគីប្រទេសថៃ នៅតាមបន្ទាត់ព្រំដែនយ៉ាងណាក្តី ក៏អាជ្ញាធររំពឹងខ្ពស់ថា នៅក្នុងសម័យប្រឡងបាក់ឌុបឆ្នាំ២០២៥នេះ បេក្ខជននឹងទទួលបានលទ្ធផលល្អជាងឆ្នាំមុន។

ឯកឧត្តម មាន ចន្ទ័យ៉ាដា បានមានប្រសាសន៍បែបនេះក្នុងឱកាសដែលអញ្ជើញបើកវិញ្ញាសារប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៥ នាព្រឹកថ្ងៃទី២៨ ខែសីហា ឆ្នាំ២០២៥ នៅមណ្ឌលប្រឡងវិទ្យាល័យចំណេះទូទៅ និងបច្ចេកទេសពួក ក្នុងស្រុកពួក ខេត្តសៀមរាប។ ឯកឧត្តមបានបន្តថា បើទោះបីជាមានបញ្ហានៅតាមបណ្តាព្រំដែនកម្ពុជា-ថៃដែលតម្រូវឱ្យរៀបចំមណ្ឌលប្រលង នៅក្នុងខេត្តសៀមរាបក្តី ក៏អាជ្ញាធររំពឹងថា បេក្ខជនទាំងអស់នឹងធ្វើបានល្អជាងឆ្នាំមុន។

ឯកឧត្តមបានបញ្ជាក់ថា “សម្រាប់ការប្រឡងមធ្យមសិក្សាទុតិយភូមិកាលពីឆ្នាំទៅក្នុងក្របខ័ណ្ឌខេត្តឧត្តរមានជ័យទាំងមូល សិស្សទទួលបាននិទ្ទេសA ៨នាក់ ហើយឆ្នាំនេះយោងទៅតាមពិសោធន៍ដែលខេត្តឧត្តរមានជ័យ បានមករៀនសូត្រពីខេត្តសៀមរាប ដែលខេត្តសៀមរាបទទួលបាននិទ្ទេសA ជាង២០០នាក់ រួមផ្សំជាមួយការយកចិត្តទុកដាក់របស់នាយកសាលាជាមួយគ្រូបង្រៀនតាមរយៈវគ្គបំប៉នយើងសង្ឃឹមថា និទ្ទេសAឆ្នាំនេះនឹងបានខ្ពស់ជាងឆ្នាំទៅ បើទោះបីជាខេត្តឧត្តរមានជ័យកំពុងទទួលរងនូវសង្គ្រាមឈ្លានពានពីប្រទេសថៃក៏ដោយ ក៏ប៉ុន្តែវាមិនបានប៉ះពាល់ដល់ការសិក្សារៀនសូត្ររបស់ប្អូនៗកន្លងមកទេ”។

សូមជម្រាបថា ខេត្តឧត្តរមានជ័យមានមណ្ឌលប្រឡងនៅស្រុកពួក ខេត្តសៀមរាប ចំនួន០៣មណ្ឌល ដោយមានបេក្ខជនសរុបចំនួន១,៧៧០នាក់ ស្រី១,០១២នាក់ អវត្តមាន០៩នាក់ ស្រី០៤នាក់៕

ដោយ ឃុត សៅ