AKP ភ្នំពេញ ថ្ងៃទី២៨ ខែសីហា ឆ្នាំ២០២៥-- ក្រសួងសាធារណការ និងដឹកជញ្ជូន និងក្រសួងរៀបចំដែនដី នគរូបនីយកម្ម និងសំណង់ បានរៀបចំពិធីចុះអនុស្សរណៈនៃការយោគយល់គ្នារវាងមន្ទីរពិសោធន៍ជាតិសំណង់នៃក្រសួងរៀបចំដែនដី នគរូបនីយកម្ម និងសំណង់ និងមន្ទីរពិសោធន៍សំណង់ និងសាធារណការនៃក្រសួងសាធារណការ និងដឹកជញ្ជូន នារសៀលថ្ងៃពុធ ទី២៧ ខែសីហា ឆ្នាំ២០២៥ នៅទីស្ដីការក្រសួងរៀបចំដែនដី ក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំ និងមន្រ្តីជំនាញ នៃក្រសួងទាំងពីរ។

ពិធីចុះអនុស្សរណៈនាពេលនេះមានគោលបំណងលើកកម្ពស់កិច្ចសហការ ការផ្លាស់ប្ដូរបទពិសោធន៍ ចំណេះជំនាញបច្ចេកទេស និងលទ្ធផលស្រាវជ្រាវ ដែលនឹងជួយកសាងសមត្ថភាពមន្ត្រី និងអ្នកជំនាញរបស់យើង ដើម្បីធានាបាននូវគុណភាពនៃសម្ភារសំណង់ និងផលិតផលសំណង់ ដែលត្រូវប្រើប្រាស់នៅក្នុងវិស័យសំណង់នៃក្រសួងទាំងពីរ។ ជាងនេះទៀត តាមរយៈកម្មវិធីបណ្តុះបណ្តាលសិក្ខាសាលា ការផ្លាស់ប្តូរទស្សនកិច្ច ការហ្វឹកហាត់ក្នុងមន្ទីរពិសោធន៍ និងការស្រាវជ្រាវរួមគ្នា អនុស្សរណៈនេះក៏នឹងជំរុញការផ្តល់សេវាកម្មដែលមានគុណភាព ប្រសិទ្ធភាព និងទាន់ពេលវេលា ស្របតាមបទដ្ឋានបច្ចេកទេសច្បាស់លាស់។

ថ្លែងទៅកាន់អង្គពិធី ឯកឧត្តមរដ្ឋមន្ត្រីបានលើកឡើងថា តាងនាមក្រសួងសាធារណការ និងដឹកជញ្ជូន សូមយកឱកាសនេះថ្លែងអំណរគុណយ៉ាងជ្រាលជ្រៅចំពោះឯកឧត្តមឧបនាយករដ្ឋមន្ត្រី សាយ សំអាល់ ដែលបានផ្តួចផ្តើមឱ្យមានកិច្ចសហប្រតិបត្តិការរវាងស្ថាប័នរដ្ឋដែលមានមុខងារបច្ចេកទេសដូចគ្នាលើការងារពិសោធន៍ លើវិស័យជំនាញផ្សេងគ្នា រហូតឈានទៅរៀបចំអនុស្សរណៈនៃការយោគយល់គ្នារវាង មន្ទីរពិសោធន៍ទាំងពីរនេះឡើង ហើយសូមធ្វើការកោតសរសើរ និងវាយតម្លៃខ្ពស់ដល់ថ្នាក់ដឹកនាំទទួលបន្ទុកដែលជួយជំរុញ ដឹកនាំការងាររៀបចំអនុស្សរណៈនេះ ជាពិសេសមន្ទីរពិសោធន៍ជាតិសំណង់ និងមន្ទីរពិសោធន៍សំណង់ និងសាធារណការ ដែលបានសហការរៀបចំអនុស្សរណៈដោយជោគជ័យ ហើយសង្ឃឹមយ៉ាងមុតមាំថា មន្ទីរពិសោធន៍ទាំងពីរនឹងខិតខំសហការគ្នា ដើម្បីជំរុញអនុវត្តតាមខ្លឹមសារដូចមានចែងនៅក្នុងអនុស្សរណៈនៃការយោគយល់គ្នានេះ ជាពិសសការផ្លាស់ប្ដូរបទពិសោធន៍ និងជំនាញបច្ចេកទេសបំពេញគ្នាទៅវិញទៅមក។

គួរបញ្ជាក់បន្ថែមថា មន្ទីរពិសោធន៍សំណង់ និងសាធារណការ ដំបូងត្រូវបានបង្កើតឡើងដំបូងនៅថ្ងៃទី២៨ ខែមករា ឆ្នាំ១៩៩៥ ក្រោមគម្រោងជំនួយបច្ចេកទេស និងហិរញ្ញវត្ថុរបស់រដ្ឋាភិបាលនៃសាធារណរដ្ឋបារាំង។ រហូតមកដល់ឆ្នាំ១៩៩៦ គម្រោងជំនួយនេះត្រូវបានបញ្ចប់មន្ទីរពិសោធន៍សំណង់ និងសាធារណការ ក៏ត្រូវបានដាក់ឱ្យដំណើរការស្ថិតនៅក្រោមក្រសួងសាធារណការ និងដឹកជញ្ជូន និងដាក់ឱ្យចូលជាមន្ទីរពិសោធន៍នេះបានចូលជាសហគ្រាសសាធារណៈរបស់រដ្ឋឆ្នាំ១៩៩៧៕

ដោយ ទេស ច័ន្ទសុធារី (ប្រភព៖ ក្រសួងសាធារណការ)