AKP កំពង់ស្ពឺ ថ្ងៃទី២៨ ខែសីហា ឆ្នាំ២០២៥-- ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានលើកឡើងថា ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ នឹងផ្តល់រង្វាន់ដល់បេក្ខជនទាំងឡាយណាដែលទទួលបាននិទ្ទេសA ក្នុងការប្រឡងសញ្ញាបត្រទុតិយភូមិឆ្នាំ២០២៥ នាសម័យប្រឡងថ្ងៃទី២៨-២៩ ខែសីហា ឆ្នាំ២០២៥។ ការលើកឡើងដូចនេះក្នុងពេលដែលឯកឧត្តមបណ្ឌិតអញ្ជើញបើកវិញ្ញាសារប្រឡង នៅព្រឹកថ្ងៃទី២៨ ខែសីហា ឆ្នាំ២០២៥ នៅមណ្ឌលប្រឡងនៃវិទ្យាល័យកំពង់ស្ពឺ។

ឯកឧត្តមបណ្ឌិត ជាម ច័ន្ទសោភ័ណ បានលើកឡើងថា ការប្រឡងសញ្ញាបត្រទុតិយភូមិគឺជាការវាស់ស្ទង់នូវរាល់កម្រិតនៃចំណេះដឹងដែលបានខិតខំសិក្សារៀនសូត្រ នៅមធ្យមសិក្សាទុតិយភូមិ ដើម្បីឈានចូលទៅបន្តការសិក្សានៅកម្រិតថ្នាក់មហាវិទ្យាល័យ សាកលវិទ្យាល័យបន្តទៀត ដូច្នេះត្រូវខិតខំឱ្យអស់ពីលទ្ធភាព ដើម្បីឱ្យការប្រឡងនេះបានជាប់គ្រប់ៗគ្នា។ ពិសេសជាងនេះ ត្រូវអនុវត្តឱ្យបានតាមការណែនាំរបស់ក្រសួងអបរំ យុវជន និងកីឡា ដោយគោរពឱ្យបាននូវគោលការណ៍ទាំង៤នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន (អ្នកចេះគឺជាប់)។

សូមបញ្ជាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២៨-២៩ ខែសីហា ឆ្នាំ២០២៥ ខេត្តកំពង់ស្ពឺ បានរៀបចំឱ្យមានមណ្ឌលប្រឡងចំនួន១៣មណ្ឌល ដែលមានបន្ទប់ប្រឡងចំនួន២៣៦បន្ទប់ និងមានបេក្ខជនប្រឡងចំនួន៥៨៤៥នាក់ (ស្រីចំនួន៣៣០៧នាក់)។ ចំពោះការងារសន្តិសុខមានលក្ខណៈល្អប្រសើរ ដោយកម្លាំងសមត្ថកិច្ចទាំងពីរប្រភេទមានកម្លាំងនគរបាល និងកម្លាំងកងរាជអាវុធហត្ថ នៅឈរយាមកាមយ៉ាងប្រុងប្រយ័ត្នបំផុត ជាមួយនិងក្រុមគ្រូពេទ្យកំពុងប្រុងជើងការក្នុងការសម្រួល និងសង្គ្រោះបេក្ខជនដែលមានបញ្ហាសុខភាពក្នុងពេលប្រឡង៕

ដោយ លឹម សាន្ត