AKP កំពង់ធំ ថ្ងៃទី២៨ ខែសីហា ឆ្នាំ២០២៥-- លោក ហាក់ ម៉ុងហួត អភិបាលស្រុកតាំងគោក កាលពីល្ងាចថ្ងៃទី២៧ ខែសីហា ឆ្នាំ២០២៥ បានអញ្ជើញជួបសំណេះសំណាលជាមួយសិស្សានុសិស្សក្រីក្រចំនួន២៩នាក់ មកពី៣វិទ្យាល័យនៃស្រុកតាំងគោក ដែលត្រៀមប្រឡងសញ្ញាបត្រមធ្យមសិក្សាទុតិយភូមិថ្ងៃទី២៨-២៩ ខែសីហា ឆ្នាំ២០២៥ នៅមណ្ឌលខេត្តកំពង់ធំ។

ក្នុងឱកាសនោះ លោក ហាក់ ម៉ុងហួត បានពាំនាំនូវផ្តាំផ្ញើសាកសួរសុខទុក្ខពីថ្នាក់ដឹកនាំគ្រប់លំដាប់ថ្នាក់ដល់ក្មួយៗសិស្សានុសិស្សដែលថ្នាក់ដឹកនាំតែងតែជំរុញឱ្យស្វែងយល់ពីការលំបាករបស់ក្មួយៗនៅពេលមកប្រឡងទាំងការស្នាក់នៅ ហូបចុក និងការធ្វើដំណើរទៅមណ្ឌលប្រឡង។លោកបានបញ្ជាក់ថាជំនាន់នេះពិតជាមានសំណាងណាស់ដែលមានឱកាសអង្គុយរៀន ក្រោមម្លប់សន្តិភាព មានគ្រូបង្រៀនល្អៗ មានបន្ទប់រៀន មានសាលារៀនល្អៗ មានសៀវភៅសិក្សារៀនសូត្រសមរម្យគ្រប់គ្រាន់ មានប្រព័ន្ធអីនធឺរណែតសម្រាប់សិក្សាស្រាវជ្រាវ និងមានអ្នកជួយគាំទ្រសព្វបែបយ៉ាងដូចនេះក្មួយៗត្រូវក្តាប់ឱកាសឱ្យជាប់ដើម្បីប្រែក្លាយខ្លួនឯងជាមនុស្សល្អរស់នៅក្នុងសង្គមជាតិ។

លោកអភិបាលស្រុកបានបង្ហាញការជឿជាក់ថា សិស្សានុសិស្សថ្នាក់ទី១២ទាំងអស់ក្នុងស្រុកតាំងគោកនឹងប្រឡងបានជាប់ទាំងអស់គ្នា ព្រោះមានលោកគ្រូ អ្នកគ្រូ បានខិតខំបង្ហាត់បង្ហាញសិស្សានុសិស្សនូវចំណេះដឹងទាំងអស់ ដើម្បីឱ្យក្មួយៗទទួលបានលទ្ធផលល្អ ជាកិត្តិយសរបស់ស្រុកដល់លោកគ្រូ អ្នកគ្រូ ដល់សាលារៀន និងដល់គ្រួសារ។

ដើម្បីជាការលើកទឹកចិត្តដល់ក្មួយៗទាំង២៩នាក់ លោក ហាក់ ម៉ុងហួត អភិបាលស្រុកតាំងគោក បានឧបត្ថម្ភថវិកាផ្ទាល់ខ្លួនមួយចំនួន ដើម្បីមានឱកាសត្រៀមប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅនៅថ្ងៃទី២៨-២៩ ខែសីហា ឆ្នាំ២០២៥នេះ៕

ដោយ ស៊ុម វណ្ណា