AKP ភ្នំពេញ ថ្ងៃទី២៨ ខែសីហា ឆ្នាំ២០២៥-- ឯកឧត្តម ខូវ មាស អគ្គលេខាធិការរងអាជ្ញាធរទន្លេសាប និងក្រុមការងារ នាថ្ងៃទី២៧ ខែសីហា ឆ្នាំ២០២៥ នៅសណ្ឋាគារ Hyatt Regency រាជធានីភ្នំពេញ បានចូលរួមសិក្ខាសាលាថ្នាក់ជាតិស្តីពីការផ្តល់សុពលភាពលើការវាយតម្លៃតម្រូវការក្នុងការត្រៀមសម្រាប់មូលនិធិអាកាសធាតុបៃតងក្នុងប្រទេសកម្ពុជា (National Validation Workshop, The Green Climate Fund (GCF) ReadinessNeeds Assessment) ដែលរៀបចំឡើងដោយក្រសួងបរិស្ថាន។

សិក្ខាសាលាមានគោលបំណងចំនួន៦គឺ៖ ទី១. បង្ហាញការរកឃើញសំខាន់ៗនៃតម្រូវការត្រៀមខ្លួនសម្រាប់ការវាយតម្លៃ ទី២. ធ្វើឱ្យមានសុពលភាពនូវតម្រូវការសមត្ថភាព និងបច្ចេកទេសរបស់ស្ថាប័ន ទី៣. បញ្ជាក់អំពីវិស័យអាទិភាព ដោយស្របតាមយុទ្ធសាស្ត្រជាតិ ស្តីអំពីអាកាសធាតុ ទី៤. ពិនិត្យឡើងវិញនូវក្របខ័ណ្ឌត្រួតពិនិត្យ និងវាយតម្លៃដែលបានស្នើឡើង ទី៥. ប្រមូលធាតុចូលដើម្បីកែលម្អសម្រាប់ផែនការសកម្មភាពត្រៀមអនុវត្តបន្ត និងទី៦. មតិយោបល់ក្នុងចំណោមស្ថាប័នពាក់ព័ន្ធសំខាន់ៗសម្រាប់ការអនុវត្ត។ 

ក្នុងនោះផងដែរអង្គសិក្ខាសាលាក៏បានធ្វើការស្នើសុំ និងលើកទឹកចិត្តដល់ក្រសួង ស្ថាប័ន ដៃគូអភិវឌ្ឍន៍នានា ឱ្យស្វែងយល់អំពីតម្រូវការរបស់ខ្លួននាពេលបច្ចុប្បន្នព្រមទាំងស្វែងរកដៃគូសហការរៀបចំជាគម្រោងស្នើសុំថ្មីៗបន្ថែមទៀតដើម្បីអនុវត្តរួមគ្នា៕

ដោយ ណយ នឿន (ប្រភព៖ អាជ្ញាធរទន្លេសាប)