AKP ភ្នំពេញ ថ្ងៃទី២៧ ខែសីហា ឆ្នាំ២០២៥-- មន្ត្រីអង្គការអភិរក្សអន្តរជាតិកម្ពុជា (អង្គការ CI) បានបានឱ្យដឹងនៅថ្ងៃទី២៧ ខែសីហា ឆ្នាំ២០២៥ ថា អង្គការរបស់ខ្លួនបានរៀបចំដំណើរទស្សនកិច្ចសម្រាប់ម្ចាស់ជំនួយ Fondation Franklinia ដែលបាន និងកំពុងផ្តល់មូលនិធិក្នុងការគាំទ្រការពារ និងស្ដារឡើងវិញនូវប្រភេទដើមឈើដែលត្រូវបានគំរាមកំហែង ទៅកាន់តំបន់គោលដៅសំខាន់ៗនៅជុំវិញតំបន់បឹងទន្លេសាប រួមមានសហគមន៍នេសាទផាត់សណ្តាយ កោះព្រែករាំងទិល កំពង់ប្រាក់ និងអូរតាប្រុក កាលពីថ្មីៗកន្លងទៅ។ ដំណើរទស្សនកិច្ចនេះមានការចូលរួមពីតំណាងម្ចាស់ជំនួយ តំណាងរដ្ឋបាលជលផលថ្នាក់ខេត្ត អាជ្ញាធរមូលដ្ឋាន និងប្រជាសហគមន៍ សរុបចំនួន៤៣នាក់ ក្នុងនោះមានស្ត្រី៧នាក់។

ដំណើរទស្សនកិច្ចសម្រាប់ម្ចាស់ជំនួយនេះត្រូវបានរៀបចំឡើងក្នុងគោលបំណងបង្ហាញពីទិដ្ឋភាពទូទៅនៃតំបន់គោលដៅ ដំណើរការ និងវឌ្ឍនភាពនៃការអនុវត្តគម្រោងដល់ម្ចាស់ជំនួយ និងភាគីពាក់ព័ន្ធ។ អ្នកចូលរួមបានស្វែងយល់អំពីស្ថានភាពនៃប្រភេទដើមឈើដែលកំពុងរងការគំរាមកំហែងនៅជុំវិញតំបន់បឹងទន្លេសាប ទស្សនាថ្នាលបណ្តុះកូនឈើកម្រ ព្រមទាំងបានស្វែងយល់បន្ថែមអំពីកិច្ចខិតខំប្រឹងប្រែងអភិរក្ស និងការដាំស្តារព្រៃឈើឡើងវិញនៅតំបន់បឹងទន្លេសាបផងដែរ។ ការណ៍នេះបានគូសបញ្ជាក់ពីកិច្ចសហការដ៏រឹងមាំជាមួយម្ចាស់ជំនួយ និងដៃគូពាក់ព័ន្ធសំខាន់ៗ និងទទួលស្គាល់នូវការរួមចំណែកដ៏មានតម្លៃរបស់ពួកគេ ក្នុងការជំនះរាល់ឧបសគ្គដែលបានជួបប្រទះក្នុងដំណើរការការពារអភិរក្ស និងស្ដារប្រព័ន្ធអេកូឡូស៊ីព្រៃឈើលិចទឹកឡើងវិញ។

សូមជម្រាបថា អង្គការ CI បាន និងកំពុងធ្វើការយ៉ាងសកម្មនៅក្នុងការអភិរក្ស និងស្តារឡើងវិញនូវព្រៃលិចទឹកជុំវិញបឹងទន្លេសាប ដោយផ្តោតសំខាន់លើប្រភេទដើមឈើរងការគំរាមកំហែងជាសកលរួមមានដើមស្តីរ ទាំង សណ្តាន់ ត្អួ ក្របៅ និងអញ្ជែងជាដើម៕

ដោយ ណយ នឿន (ប្រភព៖ CI)