AKP តាកែវ ថ្ងៃទី២៧ ខែសីហា ឆ្នាំ២០២៥-- នៅសាលប្រជុំរដ្ឋបាលខេត្តតាកែវបានរៀបចំបើកកិច្ចប្រជុំគណៈកម្មការអប្បមាទទូទាំងប្រទេស ប្រធានអនុប្រធានមណ្ឌលប្រឡង និងអាជ្ញាធរពាក់ព័ន្ធ ដើម្បីធ្វើយ៉ាងណាឲ្យដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២៨ ខែសីហា ឆ្នាំ២០២៥ ប្រព្រឹត្តទៅដោយរលូនទទួលបានជោគជ័យ និងមិនមានបញ្ហាអ្វីកើតឡើង ក្រោមអធិបតីភាពឯកឧត្តម ហោ ប៉េង អនុប្រធានគណមេប្រយោគទូទាំងប្រទេស និងជាប្រធានគណមេប្រយោគប្រចាំខេត្តតាកែវ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ឯកឧត្តម ឡេង តុលា តំណាងអង្គភាពប្រឆាំងអំពើពុករលួយ និងជាប្រធានក្រុមការងារដឹកនាំសង្កេតការនៃការប្រឡងសញ្ញាបត្រមធ្យមសិក្សាទុតិយភូមិប្រចាំខេត្តតាកែវ កាលពីព្រឹកថ្ងៃអង្គារ ទី២៦ ខែសីហា ឆ្នាំ២០២៥ ព្រមទាំងមានការអញ្ជើញចូលរួមពីលោកលោកស្រីអភិបាលរងខេត្តតាកែវ លោកលោកស្រីប្រធានអនុប្រធានមន្ទីរអង្គភាពជុំវិញខេត្ត អភិបាលអភិបាលរងក្រុង-ស្រុក កងកម្លាំងប្រដាប់អាវុធ និងមន្ត្រីរាជការពាក់ព័ន្ធចូលរួមជាច្រើនរូបផងដែរ។

មានប្រសាសន៍សំណេះសំណាលក្នុងពិធីនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានធ្វើការណែនាំដល់គណមេប្រយោគ ប្រធានអនុប្រធានមណ្ឌលប្រឡង និងអាជ្ញាធរពាក់ព័ន្ធទាំងអស់ ត្រូវធ្វើយ៉ាងណាចូលរួមរៀបចំ ដំណើរការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម័យប្រឡង៖ ថ្ងៃទី២៨ ខែសីហា ឆ្នាំ២០២៥ខាងមុខនេះ ឱ្យប្រព្រឹត្តទៅដោយរលូន ទទួលបានជោគជ័យ និងមិនមានបញ្ហាអ្វីកើតឡើងឡើយ។

ឯកឧត្តម វ៉ី សំណាង បានមានប្រសាសន៍បន្តថា ការប្រឡងសញ្ញាបត្រមធ្យមសិក្សាទុតិយភូមិកន្លងមកក៏ដូចជានៅឆ្នាំនេះ គឺជាកំណែទម្រង់ស៊ីជំម្រៅរបស់វិស័យអប់រំ។ ស្របតាមគោលនយោបាយរបស់រាជរដ្ឋាភិបាល ដែលចង់កែប្រែឥរិយាបទឱ្យសិស្សានុសិស្ស ងាកមកទទួលខុសត្រូវប្រឹងប្រែងសិក្សាឡើងវិញ តាមរយៈសុភាសិត ថា «អ្នកចេះគឺជាប់»។ម្យ៉ាងទៀតក៏ដើម្បីពង្រឹងវិស័យអប់រំនៅកម្ពុជា ឱ្យកាន់តែមានគុណភាព និងដើម្បីប្រកួតប្រជែងទីផ្សារការងារនៅក្នុងតំបន់ ក៏ដូចជានៅលើឆាកអន្តរជាតិផងដែរ។ 

ឯកឧត្តមអភិបាលខេត្តបានមានប្រសាសន៍បន្ថែមថា មន្ត្រីពាក់ព័ន្ធទាំងអស់ត្រូវធ្វើយ៉ាងណា ទប់ស្កាត់ចំពោះជនណាដែលបង្កបញ្ហាដល់ដំណើរការប្រឡងតាមរយៈការបង្ហោះព័ត៌មានចម្លើយវិញ្ញាសារប្រឡង នៅតាមបណ្ដាញសង្គមហ្វេសប៊ុកឬតាមបណ្ដាញផ្សព្វផ្សាយនានា ត្រូវចាត់វិធានការណ៍ទប់ស្កាត់ឱ្យបានទាន់ពេលវេលា។

ក្នុងឱកាសនោះ ឯកឧត្តម វ៉ី សំណាង ក៏បានធ្វើការណែនាំដល់លោកគ្រូ អ្នកគ្រូ ដែលជាប្រធានអនុប្រធានមណ្ឌល មន្រ្តីអនុរក្ស និងមន្រ្តីអប្បមាទទាំងអស់ ត្រូវគោរពវិន័យដោយចៀសវាងបង្កកំហុសដោយចេតនា ដែលនាំឱ្យមានបញ្ហាដល់ខ្លួន។ ជាពិសេសត្រូវធ្វើយ៉ាងណា ចូលរួមរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិនេះ ឱ្យទទួលបានជោគជ័យ និងមានការទទួលស្គាល់ពីបេក្ខជនប្រឡង និងប្រជាពលរដ្ឋផងដែរ។

ទន្ទឹមនឹងនេះ ឯកឧត្តមអភិបាលខេត្តក៏បានណែនាំអាជ្ញាធរ ក្រុង-ស្រុក ទាំងអស់ ត្រូវពិនិត្យមើលតាមផ្ទះសំណាក់ ឬសណ្ឋាគារមិនឱ្យដំឡើងថ្លៃឡើយ។ ជាពិសេសរាល់ការផ្ញើកង់-ម៉ូតូ នៅតាមមណ្ឌលប្រឡងបាក់ឌុប មិនត្រូវបង់ប្រាក់នោះទេ៕

ដោយ អ៊ុច សៀង