AKP បន្ទាយមានជ័យ ថ្ងៃទី២៧ ខែសីហា ឆ្នាំ២០២៥-- ឯកឧត្តម កែ គឹមយ៉ាន តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ បានអំពាវនាវដល់ប្រជាពលរដ្ឋក្នុងខេត្ត ឱ្យមានភាពអត់ធ្មត់ខ្ពស់ និងជឿជាក់លើការដឹកនាំរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាព្រំដែនដ៏ស្មុគស្មាញ ជាពិសេសករណីឈ្លានពានរបស់កងទ័ពថៃនាពេលថ្មីៗនេះ។

ការអំពាវនាវនេះធ្វើឡើងក្នុងឱកាសដែលឯកឧត្តមបានអញ្ជើញចុះសួរសុខទុក្ខប្រជាពលរដ្ឋ និងពិនិត្យមើលស្ថានភាពជាក់ស្តែង នៅភូមិជោគជ័យ ឃុំអូរបីជាន់ ស្រុកអូរជ្រៅ កាលពីរសៀលថ្ងៃទី២៦ ខែសីហា ឆ្នាំ២០២៥។ ភូមិនេះបានរងការរំលោភបំពានយ៉ាងគឃ្លើនពីសំណាក់កងទ័ពថៃ ដែលបានប៉ុនប៉ងបន្តដាក់របងបន្លាលួសបន្ថែមទៀតចូលមកក្នុងទឹកដីកម្ពុជានោះកាលពីរសៀលថ្ងៃទី២៥ ខែសីហានេះ។ ទោះជាយ៉ាងណា ប្រជាពលរដ្ឋ និងកងកម្លាំងមានសមត្ថកិច្ចបានរួមសាមគ្គីគ្នា ចេញទប់ស្កាត់យ៉ាងក្លាហាន រហូតធ្វើឱ្យកងទ័ពថៃត្រូវដកថយ។

ឯកឧត្តមបានសង្កត់ធ្ងន់ថា រាជរដ្ឋាភិបាលកម្ពុជាដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី និងសម្តេចអគ្គមហាសេនាបតីតេជោ ហ៊ុន សែន ជាប្រធានព្រឹទ្ធសភា កំពុងដោះស្រាយបញ្ហានេះយ៉ាងយកចិត្តទុកដាក់ និងឈ្លាសវៃបំផុត ដើម្បីការពារបូរណភាពទឹកដីកម្ពុជា។ ដូច្នេះ ប្រជាពលរដ្ឋគួរតែរក្សាភាពស្ងប់ស្ងាត់ និងជឿជាក់លើកិច្ចខិតខំប្រឹងប្រែងរបស់រដ្ឋាភិបាល។

គួររំលឹកផងដែរថា កាលពីថ្ងៃទី២៥ ខែសីហា ឆ្នាំ២០២៥ កងកម្លាំងយោធាថៃបានប៉ុនប៉ងរាយបន្លាលួសបន្ថែមទៀតនៅចំណុចភូមិសាស្ត្រភូមិជោគជ័យ ឃុំអូរបីជាន់ ដែលទល់មុខនឹងភូមិ Nong Chan របស់ថៃ។ ប៉ុន្តែ ដោយមានការទប់ស្កាត់យ៉ាងខ្លាំងក្លាពីសំណាក់ប្រជាពលរដ្ឋ និងសមត្ថកិច្ចកម្ពុជា កងទ័ពថៃក៏បានដកថយទៅវិញ។ ជុំវិញករណីនេះ កម្ពុជាបានអំពាវនាវជាថ្មីម្តងទៀត ដល់ភាគីថៃឱ្យគោរពឱ្យបានពេញលេញនូវបទឈប់បាញ់ និងស្មារតីនៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) កាលពីថ្ងៃទី២២ ខែសីហា ឆ្នាំ២០២៥។ កម្ពុជាបានសង្កត់ធ្ងន់ថា ភាគីទាំងពីរត្រូវចៀសវាងរាល់ទង្វើដែលអាចបង្កឱ្យមានភាពតានតឹង និងពង្រីកភូមិសាស្ត្រជម្លោះ។ រាល់បញ្ហាព្រំដែនទាំងអស់ ត្រូវដោះស្រាយតាមយន្តការដែលមានស្រាប់ គឺតាមរយៈគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ និងអនុស្សរណៈនៃការយោគយល់ឆ្នាំ២០០០ (MOU 2000)។

នៅរដូវវស្សានេះ ឯកឧត្តម កែ គឹមយ៉ាន ក៏បានណែនាំដល់ប្រជាពលរដ្ឋឱ្យថែរក្សាសុខភាពជាប្រចាំផងដែរ ដើម្បីចៀសវាងពីជំងឺផ្សេងៗដែលអាចកើតឡើងនៅរដូវនេះ៕

ដោយ ឈុន សារ៉ាត