AKP បាត់ដំបង ថ្ងៃទី២៧ ខែសីហា ឆ្នាំ២០២៥-- ឯកឧត្ដម សុខ លូ អភិបាលនៃគណៈអភិបាលខេត្តបាត់ដំបង នារសៀលថ្ងៃអង្គារ ទី២៦ ខែសីហា ឆ្នាំ២០២៥ បានអញ្ជើញទទួលអំណោយ ជាគ្រឿងឧបភោគ បរិភោគ ពីក្រុមហ៊ុន ភីអិលស៊ី គ្រុប (PLC Group) ដែលបានឧបត្ថម្ភតាមរយៈរដ្ឋបាលខេត្ត សម្រាប់ជូនដល់បងប្អូនពលករដែលវិញត្រឡប់មកពីប្រទេសថៃ និងឧបត្ថម្ភគាំទ្រដល់កងកម្លាំងប្រដាប់អាវុធ ដែលកំពុងឈរជើងការពារតាមខ្សែបន្ទាត់ព្រំដែនកម្ពុជា-ថៃ ក្នុងភូមិសាស្រ្តខេត្តបាត់ដំបង។

ក្នុងឱកាសនោះ ឯកឧត្តម សុខ លូ បានមានប្រសាសន៍ថា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា គឺបានគិតគូរយកចិត្តទុកដាក់ឧបត្ថម្ភគាំទ្រនិងផ្គត់ផ្គង់គ្រប់បែបយ៉ាងដល់កងទ័ពកម្ពុជាពុំឱ្យមានការខ្វះខាតនោះឡើយ។ អំណោយរបស់សប្បុរសជននាពេលនេះគឺជាការជួយគាំទ្រដល់កងកម្លាំងជួរមុខក្រោមស្មារតីស្នេហាជាតិ និងការចូលរួមចំណែកជួយជាតិតាមរយៈសមរភូមិក្រោយជួយសមរភូមិជួរមុខ។ ក្នុងនាមរដ្ឋបាលខេត្តបាត់ដំបង ខ្ញុំសូមថ្លែងអំណរគុណយ៉ាងជ្រាលជ្រៅជូនចំពោះ សប្បុរសជនដែលបានឧបត្ថម្ភគាំទ្រជាថវិកា គ្រឿងឧបភោគបរិភោគ និងសម្ភារប្រើប្រាស់ផ្សេងៗ សម្រាប់ចូលរួមទ្រទ្រង់ដល់បងប្អូនប្រជាពលករខ្មែរត្រឡប់ពីប្រទេសថៃ និងជួយគាំទ្រដល់កងកម្លាំងជួរមុខ ដែលជាការចូលរួមចំណែកជួយជាតិតាមរយៈសមរភូមិក្រោយ និងជាការលើកទឹកចិត្តដល់វីរៈកងទ័ព ជួរមុខរបស់ប្រទេសកម្ពុជាយើង។

អំណោយទាំងអស់រួមមាន ទឹកសុទ្ធកម្ពុជាចំនួន១៥០កេស មីកញ្ចប់ចំនួន៥០កេស នំប៉័ងកញ្ចប់ចំនួន២០កេស ចាហួយហ្វាហ្វាចំនួន២០កេស សាច់ក្រកចង្កាក់កញ្ចប់ចំនួន១០កេស និងដំឡូងកញ្ចប់ចំនួន៣២កេស៕

ដោយ ណយ នឿន (ប្រភព៖ រដ្ឋបាលខេត្តបាត់ដំបង)